Display Style:
Column Style
तमिलनाडुया मुख्यमन्त्री जयललिता मन्त
लहनान्यूज सम्वाददाता | थिंलाथ्व सप्तमी ११३७ (डिसेम्बर ६ २०१६)
भारत तमिलनाडुया मुख्यमंत्री जे जयललिता वंगु चान्हय् मन्त ।
चेन्नईया अपोलो अस्पतालं पिथंगु प्रेस नोटया कथं जयललिता वंगु चान्हय् ११ः३०ताः इलय् मदुगु खः । ६८दँयाम्ह जयललितायात वंगु आइतबाः (डिसेम्बर ४ कुन्हु) हृदयाभात जुइधुंकाः अपोलो अस्पतालया आइसीयूलय् तयाः वासः यानाच्वंगु खः ।
जनताया दथुइ तसकं लोकंव्हाःम्ह जयललितां दक्षिण भारतीय संकिपाय् अभिनय नं यानादीगु दु । १४० संकिपा म्हितादीगु दु ।
वयकलं ८क्वः विधानसभाया चुनाव ल्वायेगुया लिसें छक्वः राज्यसभाया नितिं मनोनीत जुयादीगु दुसा ४क्वः तमिलनाडुया मुख्यमंत्री जुयादीगु दु ।
थाइलायन्डया यूवराज न्हूम्ह जुजु घोषित
लहनान्यूज सम्वाददाता | थिंलाथ्व तृतीया ११३७ (डिसेम्बर २ २०१६)
थाइलायन्डय् युवराज महावचिरालङकनयात अनया न्हूम्ह जुजु घोषणा याःगु दु ।
७०दँतक्क शासन याःम्ह जुजु भूमिबोल वंगु अक्टोम्बर १३य् मदयेधुंकाः युवराजयात न्हूम्ह जुजु दयेकूगु खः । अबु भूमिबोल अदुल्यादेज मदुगु लत्या लिपा युवराज महावचिरालङकनयात थायलायन्डया न्हूम्ह जुजु घोषित याःगु खः ।
बिहीबार थाइलायन्डया टेलिभिजनय् प्रत्यक्ष प्रसारण जुयाच्वंगु छगू ज्याझ्वलय् युवराजं न्हूम्ह जुजु जुइत संसदं ब्यूगु ब्वनायात स्वीकार याःगु खः ।
पपुलर मतय् नं बहुमत वःगु ट्रम्पया दावी
ने.सं. ११३७ कछलागा बालाचःह्रे, २०१६ नोभेम्बर २८, सोमवाः
अमेरिकाया थीथी राज्यय् हाकनं मतगणनाया बहस न्ह्यानाच्वंगु इलय् नव निर्वाचित राष्ट्रपति डोनाल्ड ट्रम्पं पपुलर मतय् नं थःत बहुमत प्राप्त जूगु दावी यानादीगु दु । क्लिण्टनया समर्थकं लखौं फर्जि मत कुर्कूगु दावी यासें ट्रम्पं उकियात क्वपालेगु खःसा पपुलर मतय् नं थःगु हे बर्चश्व दइगु जिकिर यानादिल । महत्वपूर्ण इलेक्टोरल मत त्याकादीम्ह रिपब्लिकन ट्रम्पं थःगु धापू पुष्टि याय्गु पर्याप्त प्रमाण धाःसा मब्यूगु विबिसीं न्ह्यथंगु दु ।
राष्ट्रपतिइ बूम्ह डेमोक्राटिक हिलारी क्लिण्टन समर्थक अभियन्तां विस्कन्सिनय् जुइत्यंगु पुनः मतगणनाय् सहभागी जुइगु धाय्वं ट्रम्पया लिपांगु धापू सार्वजनिक जूगु खः । पपुलर भोटय् क्लिण्टनं ट्रम्पस्वयां २०गू लख अप्वः मत प्राप्त याःगु खः । अथेखःसां ट्रम्प २७० स्वयां अप्वः इलेक्टोरल मत कासें राष्ट्रपतिइ निर्वाचित जुयादीधुंकूगु दु ।
हिंसाया द्वपनय् युगाण्डाया जुजुयात ज्वन
ने.सं. ११३७ कछलागा बालाचःह्रे, २०१६ नोभेम्बर २८, सोमवाः
युगाण्डाया रबेनजुरुरु क्षत्रया जुजुयात हिंसा न्यंकेत ग्वाहालि याःगु द्वपनय् ज्वंगु दु । प्रहरी व जुजया समर्थक दथुइ जूगु ल्वापुइ ५५म्ह सीगु खः । चाल्र्स वेस्ले मुम्बेरेयात हिंसा न्यंकूगु द्वपं बियातःगु दु ।
मुम्बेरेया गृहनगर कासेसेय् मिलिसिया लडाकुं प्रहरी चौकीइ आक्रमण याःगु खः । सरकारी सुरक्षा बलं जुजु मुम्बेरेया दरबारय् छापा मारेयानाः हिरासतय् काःगु खः । वय्कःयात हिंसाय् दुथ्याःगु लडाकुतय्त संरक्षण ब्यूगु द्वपं बियातःगु खः । तर जुजुं थःत बियातःगु द्वपंया खण्डन यानावयाच्वंगु दु । हिंसाया झ्वलय् १४म्ह प्रहरी व ४१म्ह लडाकु सीगु बिबिसीं न्ह्यथंगु दु ।
जुजु मुम्बेरेया ग्वाहालि यानाच्वंगु पुचलं डेमोक्राटिक रिपब्लिक अफ कंगोया सीमय् न्हूगु देय् दय्केगु योजना दय्कूगु नं युगाण्डा सरकारं द्वपं ब्यूगु दु ।
जापानय् भुखाय् धुंकाः सूनामीया चेतावनि
लहनान्यूज सम्वाददाता | कछलागा अष्टमि ११३७ (नोभम्बर २२ २०१६)
जापानया उत्तर पूर्वी तटय् भुखायया तःधंगु धक्का महसूस जुइधुंकाः फुकुशिमा परमाणु संयन्त्रया लागाय् १ मिटर जाःतक्क सूनामी वःगु दु ।
आःतक्क छुं नं कथंया क्षतिया खबर मदुनि तर सूनामीया चेतावनी धाःसा जारी याःगु दु । २०११य् वःगु सुनामीया हुनिं थुगु परमाणु संयन्त्र पूवंक हे क्षतिग्रस्त जूगु खः ।
भुखाय् लिपा जापानय् क्याबिनेटया मुख्य सचिव योशिहिदे सुगां फुकुशिमा परमाणु संयन्त्रया स्वंगूगु रियाक्टरया कुलिङ सिस्टमं ज्या मयाःगु धाःगु दु ।
यद्यपि आःतक्क तापक्रम थहांवंगु खनेमदुनि । मेमेगु परमाणु संयन्त्रय् नं छुं नं कथंया अनियमितता खनेमदुनि ।
सुगां सरकारं स्थितीया जाँचया नितिं टास्क फोर्स गठन याःगु धाःगु दु ।
जापान मौसम विज्ञान एजेन्सीयाया कथं स्थानीय ई कथं मंगलबार सुथसिया ६ताः इलय् भुखाय् ब्वःगु खः ।
६.९ म्याग्निच्यूड मापन जूगु भुखायया केन्द्र फुकुशिमां ७० किलोमिटर तापाक ११ गालय् लाःगु खः ।
आःतक्क भुखाचं छुं नं कथंया धनजनया क्षतिया खबर मदुनि तर भुखायया धक्का टोकियोतक्क मससूस जूगु धाःगु दु ।
जापानया कमामोटो प्रान्तय् वंगु अप्रिलय् ब्वःगु भुखाचय् ५० सीगु खः । २०११य् फुकुशिमाय् ब्वःगु भुखाचय् १८द्वःम्ह स्वयां आपाःसिया स्थिती आःतक्क सीमदुनि ।
