फ्रान्सय् कोरोनाबिरुद्धया खोप मकाःपिं मनूतय्त तःगु प्रतिबन्धबिरुद्ध ब्यापक प्रदर्शन जूगु दु ।

राजधानी पेरिसलिसेंया शहरय् मुंपिं द्वलंद्वः सर्वसाधारणं राष्ट्रपति इमानुएल म्याक्रोंयात कोरोना भाइरसया नां ब्युसें प्रदर्शन याःगु खः ।

आः जुइगु चुनावय् राष्ट्रपति पदया उम्मेदवार फ्लोरियन फिलिपपोटया नेतृत्वय् याःगु बिरोध प्रदर्शनय् राजनीतिक दलया कार्यकर्ता अले सर्वसाधारणया ब्वति दुगु खः ।

प्रदर्शनकारीतय्सं फ्रान्सय् ल्याय्म्हतय्त खोपया बारे जानकारी तकं मदुगु धासें खोप अनिवार्य याये गलत जूगु नं धाःगु दु । प्रदर्शनया हे झ्वलय् टेनिस स्टार नोभाक जोकोभिजयात अष्ट्रेलिया सरकारं खोप मकाःगु हे हुनिं भिसा मब्यूगुलिइ नं प्रदर्शनकारीं अष्ट्रेलियाली सरकारबिरुद्ध नं नारा थ्वयेकूगु खः ।

फ्रान्सया इतिहासय् एलो टिसर्ट धुंकाःया थ्व हे तःधंगु प्रदर्शन जूगु धाःगु दु । प्रदर्शनयात ध्यानय् तयाः सुरक्षा ब्यबस्था क्वात्तुकूगु दु । फ्रान्सय् कोरोनाबिरुद्धया खोप मकाःपिं तःधंगु ल्याखय् दनि ।

थ्वयां न्ह्यः, फ्रान्सया तःधंगु सदनं खोप अनिवार्य यायेगु बिधेयकयात मान्यता ब्यूगु खः ।

जापान व अमेरिकाय् सुनामी वयेफू धका चेतावनी बिउगु दु।

प्रशान्त महासागरय् ज्वालामुखी विस्फोट जुगुलि सुनामीया जोखिम बढे जुगु धका अनया मौसम विभागं चेतावनी बिउगु दु।

जापानया मौसम विभागं ३ मिटर उचाइ तक सुनामीयन लहर वयेफूगु सम्भावना दु धका धाउगु दु। अथेहे, अमेरिकाया क्यालिफोर्निया, ओरेगन, वाशिङ्टन, अलास्का लगायत क्षेत्रय् सुनामीया खतरा दु धका बीबीसीं धाउगु दु।

अथेहे, रुसं न सुनामीय चेतावनी जारी याउगु दु।

भारतय् लिपागु २४ घण्टाय् २ लाख  ६८ हजार ८ सय ३३ म्हेसित कोरोना संक्रमण पुष्टि जूगु दु।

थ्व न्हापागु दु दिं स्वया ४ हजार ६ सय ३१ म्ह स्वया अप्पो खः। भारतया स्वास्थ्य तथा परिवार कल्याण मन्त्रालयया कथं भारतय् सक्रिय संक्रमितपि १४ लाख १७ हजार स्वया अप्पो थ्यंगु दु।

अथेहे वंगु २४ घण्टाय् भारतय् कोरोनां ४ सय २ जम्ह सीउगु दु। भारतय् आःतक कोरोना संक्रमणं ४ लाख ८५ हजार ७ सय ५२ म्ह सी धुकुगु दु।

वंगु २४ घण्टाय् महाराष्ट्रय् ४३ हजार २ सय ११ म्ह, मुम्बईलय् ११ हजार ३ सय १७ म्ह, दिल्लीइ २४ हजार ३ सय ८३ म्ह, पश्चिम बंगालय् २२ हजार ६ सय ४५ म्ह, कर्नाटकय् २८ हजार ७ सय २३ म्ह व केरलय् १६ हजार ३ सय ३८ म्हेसित संक्रमण पुष्टि जुगु खः।

चीनय् हाकन कोरोना सङ्क्रमण अप्पो जुगु दु। सङ्क्रमित जूपि न्हिया न्हिथं बढे जुगु दु धका चिनियाँ स्वास्थ्य अधिकारीं धाउगु दु।

हिजो हेनान व तियाजिन प्रान्तय् १४३ म्हेसित सङ्क्रमित पुष्ठ जुगु धका स्वास्थ्य अधिकारीं चिनियाँ समाचार संस्था सिन्ह्वां धाउगु ख।

सङ्क्रमण बढे जुगुलि चीनया उत्तरी सहर सियानय् न्हापा हे लकडाउन याये धुकुगु दु। डिसेम्बर दथुइ न्हि १५० म्ह स्वया अप्पो कोरोना सङ्क्रमण पुष्टि जुगुलि सरकारं लकडाउन याउगु खः।

संयुक्त राष्ट्रसंघं अफगानिस्तानया लखौंलख सर्वसाधारण सिइफइगु ख्याच्वः बिउगु दु ।

राष्ट्रसंघया महासचिव एन्टोनियो गुटेरसं अफगानिस्तानया आर्थिक संकटं लखौंलख मनूया ज्यान काये फइगु अवस्था वयेफइगु ख्याच्वः बियादीगु खः ।

राष्ट्रसंघया ५ गु अर्ब डलरया मानवीय सहायता कोषय् ग्वहालि यायेत विश्व समुदाययात अपिल याना वयेकलं अफगानिस्तानया रोक्का यानातःगु खाता फुकुवा यायेत विश्व बैंक, आइएमएफ लिसेंयात इनाप यानादीगु दु ।

तसकं ख्वामूगु व सम्पतिविहिन अवस्था अफगान जनताया नितिं तसकं ग्यानापूगु जूगु नं महासचिव गुटेरसया धापू दु । दाताया ग्वहालिइ न्ह्यानावःगु अफगानिस्तानया अर्थतन्त्र तालिवानं सत्ता कजये कायेधुंका झंझं क्वन्ह्यानाच्वंगु दु ।

उकिइ नं तालिवानया शासनयात हाथ्याः बिइत अमेरिका लिसेंया विश्व समुदायं अफगानिस्तानया सम्पति व खाता रोक्का याःगुलिं अर्थतन्त्र चरम संकटय् तक्यंगु दु ।

अमेरिकां जक अफगानिस्तानया ७गू अर्ब डलर रोक्का याःगु दु । अन अस्पतालया चिकित्सक, सेना, पुलिस व सरकारी कर्मचारीं तकं तलब चूलाकाच्वंगु मदु  ।

राष्ट्रसंघया महासचिव गुटेरसं ८७ गू लख अफगानीत आः नं निछा नयेखनिगु अवस्थाय् दूगु धका अनया अर्थतन्त्रया नितिं आवश्यक तरलता थथें चूमलाकेगु खःसा अवस्था ग्यानापूगु जुइगु ख्याच्वः नं बियादीगु दु ।