अस्ट्रियाय् नक्कली खोप पास जूगु धका निगू दर्जन सिवें अप्वः स्वास्थ्य संस्थाय् छापा तःगु दु ।

अष्ट्रियाया गृहमन्त्री गेर्हार्ड कर्नरं  खोप पास नक्कली दयेकुगु  आशंकाय् प्रहरीं निगू दर्जन सिवें अप्वः स्वास्थ्य संस्थाय् छापा तःगु धयादीगु खः ।

खोप पासया  किर्ते याःगु शंकाय् २२म्हसित अनुसन्धानया दायराय् तःगु गृहमन्त्री गेर्हार्डं जानकारी बियादीगु दु ।

छापा तयेगु झ्वलयल् खोप पास दयेकेत छ्यलिगु उपकरण तकं जफत जूगु प्रहरीं जानकारी बिउगु दु ।

घटनाय् ज्वंपिं २२म्ह मनूखं थःपिनि नितिं जक मजुसें पासापिं व म्हस्युपिं मनूतये नितिं नं भ्वँत किर्ते याःगु जुइफइगु धाःगु दु ।

बेलयतय् कोरोना महामारीया नितिं धका तःगु प्रतिबन्ध छ्वासुकिगु जूगु दु ।

बेलायती प्रधानमन्त्री बोरिस जोन्सनं डाउनिङ स्ट्रीट ब्रिफिङया झ्वलय् प्रतिबन्धत छ्वासुका हे कोरोना नियन्त्रण याये फइगु अवस्था दूगुलिं प्रतिबन्धत छ्वासुकेगु  घोषणा यानादीगु खः ।

आम मनूयात छेँ नं हे ज्या यायेगु व्यवस्था व मास्क अनिवार्य जूगु वयेकलं धयादील । देशय् ओमिक्रोन संक्रमण दर उच्च दूगु नालाकासें वयेकलं प्रतिबन्ध छ्वासुकिबलय् छुं हदतक्क असहज महशुष जूसा नं आःयात प्रतिबन्ध छ्वासुकेगु निर्णय जूगु धयादील ।

बेलायतय् वइगु १० जनवरी निसें न्हियान्हिथं १गू लखया दरं कोरोना परिक्षण यायेगु घोषणा नं प्रधानमन्त्री जोन्सनं यानादीगु दु ।

गुकिइ खाद्य् प्रशोधन, यातायात व उद्योग धन्दाय् ज्या यानाच्वंपिं कर्मचारीतयेत प्राथमिकताय् तःगु दु ।

भारतीय राजधानी न्हू दिल्लीइ वालय् २ न्हू शनिबाः व आइतबाः कर्फ्यू तयेत्यंगु दु । कोरोना संक्रमण अप्वःगुलिं न्ह्याकुगु  रात्रीकालीन कफर््यु जारी दूगु हे इलय् वालय् २ न्हू पूवंक कफर््यु तयेगु निर्णय जूगु खः ।

भारतय् न्हूगु भेरियन्ट ओमिक्रोन न्यंगु लिसें कोभिड संक्रमितया ल्याः छक्वःलं अप्वःगु दु । म्हिगः तक्क भारतयंक द्वःछि व ७ सःम्हसिके ओमिक्रोन खनेदूगु खः ।

थ्वहे दथुइ कोभिड सक्रमणया जोखिम कायम हे दूगुलिं सार्वजनिक यातायातय् यात्रा यायेबलय् मास्क मतयेकं यात्रा याये मदइगु नियमयात कडाइलिसें लागू याःगु दु ।

अथेहे सरकारं निजी ज्याकुतयेत नं ५०गू प्रतिशत कर्मचारीं ज्या न्ह्याकेत धाःगु दु । ५०गू प्रतिशत कर्मचारीयात बिदा बिइत वा छेँ नं ज्या यायेगु व्यवस्था यायेत निर्देशन बिउगु दु ।

वंगु वालय् मेट्रोरेल व बसयात  क्षमताया ५०गू प्रतिशत जक यात्रु तयेत धाःगु खःसा ब्वनेकु व कलेजत बन्द यायेधुंकुगु दु ।

क्यारेबियन देय् हेइटीया कार्यबाहक राष्ट्रपति एरिएल हेन्रीयात गोलीं कयेका स्यायेगु कुतः जूगु दु ।

वंगु शनिबाः राष्ट्रिय स्वतन्त्रता दिवसया लसताय् ग्वसाःग्वःगु ज्याझ्वलय् कार्यबाहक राष्ट्रपति हेन्रीयात स्यायेगु कुतः जूगु खुलासा जूगु खः । उत्तरी शहर गोनाइवेसस्थित छगू चर्चय् जूगु ज्याझ्वलय् दुथ्याम्ह हेन्रीयात आपराधिक पुचःलं गोलीं कयेकुगु खः ।

हेन्री व वयेकया अंगरक्षकत गाडीपाखे ब्वाये वनाच्वंगु लुँ सार्वजनिक जूगु खः । घटनाय् सुरक्षाकमीतयेसं कयेकुगु गोलीं लाना १म्ह सीगु दुसा २म्ह घाःपाः जूगु दु । वंगु जुलाई ७ य् हेइटीया राष्ट्रपति जोबेनल मोइजयात थःगु हे निवासय् स्यागु खः ।

मोइजया सरकारय्  प्रधानमन्त्री दूम्ह हेन्री मोइजया हत्यालिपा कार्यबाहक राष्ट्रपति जूगु खः । मोइजया हत्या याःगु आपराधिक पुचःलं हे हेन्रीया नं हत्याया कुतः याःगु विश्वास याःगु दु ।

तर घटनाया भाला धाःसा आःतक्क सुनांनं काःगु मदुनि । कार्यबाहक राष्ट्रपति हेनरीं आपराधिक पुचःयात न्हंकेगु प्रतिवद्धता न्ह्यथनावयादीगु दु  ।

घटना सार्वजनिक जुइधुंका कार्यबाहक राष्ट्रपतिया ज्याकुथिं नं  आतंकवादी पुचःलं हत्याया कुतः याःगु न्ह्यथंगु दु ।

दक्षिण अफ्रिकाया संसद् भवनय् मिं नःगु दु । देय्या दक्वःलय् पुलांगु व निगूगु तःधंगु शहर केपटाउनय् दूगु दक्षिण अफ्रिकी संसद् भवनय् थौं सुथय् मिं नःगु खः ।

सुरक्षाया नितिं गठन जूगु केपटाउन मेयर कमिटीया दुजः जेपी स्मिथया कथं मिं नःगुया हुनिं पुलांगु एसेम्बली हलया पौ छ्वगु दु व पुलांगु चेम्बरय् नं आपालं क्षति जूगु दु ।

दक्षिण अफ्रिाकी अधिकारीतये कथं मिं नःगुया हुनिं भवनय् तःतःधंगु चिरा बाःगु दु । क्षतिया पूर्ण विवरण वयेत धाःसा ल्यंदनिइ । मिं नःगु संसद्या सभा हलं न्ह्यागु खः ।

संसद भवनय् जडान यानातःगु फायर अलार्मं बाँलाक्क ज्या मयाःगु धाःगु दु । घटनास्थलया स्थलगत अवलोकन यासें  राष्ट्रपति सिरिल रामापोसां भवनयु जडान यानातःगु अग्नि नियन्त्रण उपकरणं बाँलाक्क ज्या मयाःगु पत्रकारतयेत जानकारी बियादीगु दु ।

अयेसां अग्नि नियन्त्रक टोली ६गू मिनेट दुने हे घटनास्थल थ्यंका मिं नियन्त्रणय् काःगु धका राष्ट्रपति रामापोसां उमिगु च्वछायादील ।