शान्ति सुरक्षाय् लिच्वः लाका राष्ट्रघाती ज्या याःगु द्वपनय् क्युवाय् ७सः सिवें अप्वःसित मुद्दा दायर याःगु दु ।

थगुने सरकारया  विरोधय् ब्वज्या याःपिं उमित सार्वजनिक प्रशासन ज्याकुथिं मुद्दा दायर याःगु खः । थ्वयान्ह्यः नं थुगु विषययात कया सच्छि व ७२म्हसित मुद्दा न्ह्याका कसा न्यंकुगु खः ।

थुखे मानव अधिकारवादी अभियन्तातयेसं धाःसा मुद्दा पक्षपातपूर्ण जूगु धका कुँख्यंगु दु  । मुद्दा दायर याःपिं १६ दँ निसें ५५ दँ वैंशयापिं जूगु अन्तर्राष्ट्रिय समाचार संस्थातयेसं न्ह्यथंगु  दु ।

दँबदँलिपा जूगु क्युवाया दक्वःलय् तःधंगु विरोध ब्वज्याया झ्वलय् सलंसःम्ह सर्वसाधरणया ज्वंगु खः ।

थगुनेया जुलाईलय् कम्युनिस्ट टापु देय् क्युवाय् खाद्यान्न व वासःया अभाव, मूल्युवृद्धि व कोरोना महामारी नियन्त्रण लिसें रोकथामया नितिं जूगु सरकारी कुतः प्रति असन्तुष्टि न्ह्यथसें द्वलंद्वःम्ह जनतां सतक ब्वज्या याःगु खः ।

अमेरिकी राष्ट्रपति जो बाइडेनं रुसं युक्रेनय् हताः याःसा भ्लादिमिर पुटिनयात व्यक्तिगत रुपय् हे प्रतिवन्ध तयेगु ख्याच्वः बियादीगु दु ।

रुसं दक्षिण पश्चिम सीमाय् दूगु देय् विरुद्ध पलाः न्ह्याकुसा प्रतिबन्धय् कडाइ जुइगु वयेकया धापू दु । रुसं थःगु पलाः मभिंकुसा निगूगु विश्वयुद्ध लिपाया तःधंगु हताः जुइ फइगु वाइडेनया ख्याच्वः दु ।

रुसं युक्रेन लिसेंया जःलाखला देशय् हताः याःसा तःधंगु मू पुलेमालिगु पश्चिमा नेतातयेसं तकं ख्याच्वः बिउगु बीबीसीं न्ह्यथंगु दु । अमेरिका व मेपिन्त युक्रेनया विषयलं थप तनाव अप्वयेकुगु रुसयात द्वपं दु ।

तर युक्रेन दुहाँवनेगु थःगु योजना मदूगु धका रुसं उगु द्वपंया खण्डन यानावःगु दु । अयेसां मस्कों युक्रेनया सीमाय् छगू लख सिवें अप्वः सैनिक तैनाथ याःगु न्ह्यथंगु दु ।

तर अमेरिकां नं करिब १०द्वःम्ह सेना तयारी अवस्थाय् तयातःगु धाःगु दु । युक्रेनय् थःगु सेना छ्वयेगुृ छुं नं योजना मदूसा नं रुसया पलाःखं युरोपय् तकं नेटोया उपस्थितियात क्वात्तुकेमाःगु अवस्था वःगु राष्ट्रपति बाइडेनया धापू दु ।

बुर्किना फासाया सेना न राष्ट्रपति रोच मार्क क्रिस्चियन काबोरेयात अपदस्थ यासे सरकार व राष्ट्रियसभा विघटन याउगु दु।

सेना न सोमबाः घोषणा याउगु कथं देशया सीमा न बन्द याउगु दु।

अथेहे, सत्तारूढ दलं थ्व स्वया न्ह्य छगु विज्ञप्तिपाखे राष्ट्रपति रोच हत्या यायेगु कुतःपाखे बचे जुगु धका धाउगु खः।

भारतय् लगातार कोरोना सङ्क्रमण जूपि घटे जुगु दु। म्हिगः भारतय् र्२ लाख ५२ हजार ८ सय ७४ म्ह कोरोना सङ्क्रमण पुष्टि जुगु खःसा आइतवाःया तुलनाय् ५० हजार स्वया अप्पो कमी जुगु दु धका भारतया स्वास्थ्य मन्त्रालयं धाउगु दु।

अथेहे २४ घण्टाया दुने भारतय् कोरोना सङ्क्रमणं ६ सय १४ म्हेसिगु ज्यान वंगु दु।

बिहीवाः भारतय् ३ लाख ४७ हजार म्हेसित कोरोना पुष्टि जुगु खः। न्यान्हुया दुने हे कोरोना सङ्क्रमितपि २७ दशमलव २० प्रतिशतं कम जुगु दु धका भारतीय सञ्चारमाध्यमं धाउगु दु।

अफ्रिकी देय् बुर्किना फासोय् सेनां शासन सत्ता थःगु ल्हातय् काःगु दावी याःगु दु ।

बुर्किना फासोया राष्ट्रपति रोज काबोरेयात अपदस्थ याना सत्ता कब्जा यानागु सेना दावी याःगु दु ।

सेनाया छम्ह उच्च अधिकारीं टेलिभिजनपाखें सन्देश बिउसें सुरक्षाया अवस्था तच्वकं बाँमलागुलिं सत्ता कब्जाय् कायेमाःगु धाःगु दु ।

बुर्किनो फासोय् लिपांगु ईलय् इस्लामवादी विद्रोहीपिन्सं संरक्षण याःगु द्वपं बिउसें देशय् अशान्ति ब्वलंकूगु सेनाया दावी दु ।

यद्यपि राष्ट्रपति रोजयात ज्वंगु वा सुरक्षित थासय् च्वनाच्वंगु दु धैगु बुखँ पिहाँवःगु मदुनि ।

राष्ट्रपतिं देय्या सुरक्षा संकटलिसें ल्वायेत असफल जूगु व देय्यात छधि यायेगु भूमिका मम्हितुगुलिं देय्या हितया नितिं सेनां मेगु पलाः न्ह्याकेगु दावी नं याःगु दु ।