कोरोनाया न्हूगु भेरियन्ट ओमिक्रोनया हुनिं क्रिसमसया इलय् हलिंन्यंक लखौं मनूतय्सं यात्रा अवरोध फयेमालाच्वंगु दु ।

कोभिड प्रतिबन्ध, अप्वयाच्वंगु ओमिक्रोन संस्करणं सुरक्षा व्यवस्था क्वात्तुकूबलय् तःगु हे अन्तर्राष्ट्रिय उडान रद्द जूगु दु । फ्लाइट अवेयर वेबसाइटया कथं हलिंन्यंक द्वलंद्वः उडान रद्द याःगु दु ।

इटाली, स्पेन व ग्रीसं हाकनं छेँय् नं पिहां वयेबलय् मास्क अनिवार्य याःगु दु । उत्तरी स्पेनया क्याटालोनियां चच्छिया कर्फ्यू तःगु दु । नेदरल्यान्ड्सय् कडा प्रतिबन्धात्मक व्यवस्था जारी याःगु दु ।

ओमिक्रोन मेगु भेरियन्ट स्वयां हल्का धइगु प्रारम्भिक लिच्वःया दथुइ वैज्ञानिकत संक्रमिततय् बढ्दो ल्याखं चिन्तित जुगु दु । बिहीबाः बेलायत, फ्रान्स व इटालीइ संक्रमणया न्हूगु रेकर्ड कायम जूगु दु ।

अमेरिकाय् न्हिंया ओमिक्रोन केस लिपांगु डेल्टा लहरया चरम सीमा स्वयां नं अप्वःगु दु । देय्न्यंकया अस्पतालय् विरामीं जाःगु दु ।

अमेरिकाया शीर्ष संक्रामक रोग विशेषज्ञ, डा एन्थोनी फाउचीं क्रिसमस यात्रां पूर्ण खोप काःसां कोरोनाया संक्रमण फैलावटयात पनेमफइगु चेतावनी ब्यूगु दु ।

क्रिसमसया पूर्वसन्ध्याय् अमेरिकन एयरलाइन्सं चालक दलया दुजःतय्त यायेमाःगु कोरोना परीक्षणं कर्मचारी अभावया स्थितिं पीडित जुइमाःगु धाःगु दु ।

अष्ट्रेलियाय् नं शुक्रबाः नखःचखःया यात्राय् द्वलंद्वःया ल्याखय् लिच्वः लाःगु दुसा सिड्नी व मेलबर्नं मेगु सहरया सच्छि स्वयां अप्वः आन्तरिक उडान रद्द जूगु दु ।

बङ्गलादेशय् हाकन मिँन्वया स्वीम्हसिगु ज्यान वंगु दु।

अनया झालकोटी जिल्लाय् मिँन्वंगु दु । स्थानीय अधिकारीया कथं इन्जिन हिउगु थासं मिँन्वंगु धका धाउगु दु।

मिँच्याना घाइते जूपिन्त उपचारया लागि अस्पताल यकूगु दु सा फसे जुयाच्वपिनिगु उद्धार यायेगु ज्याना जुयाच्वंगु दु।

चीनया गान्झोउ क्षेत्रय् खेँय् दुने सुरक्षित दुगु डाइनासोरया भ्रुण लुगु दु। परिपक्व जुया खेँय् न पिहावयेगु अवस्थाय् दुगु भ्रुण जिवाश्म लुगु दु धका बीबीसीं धाउगु दु।

उगु भ्रुण ६ करोड ६० लाख वर्ष पूलागु धका अनुसन्धातापिन्स अनुमान याउगु दु। उगु भ्रुण वा मदुगु थेरापोड डाइनासोर वा ओभिर्याप्टोरोसस जुइफुगु  भलसा काउगु दु।

अनुसन्धाता डा फियोन वासम माले थुगु भ्रुणयात इतिहासय् हे आःतक लुगु भ्रुण मध्ये दकलय् अप्पो सुरक्षित अवस्थाय् दु धका धाउगु दु। उगु भ्रुणया जिवाश्मया अवस्थिति खेँ पिहा वइगु अवस्थाय् थ्यंगु चखू हथे चाःहिउगु खने दु। उगु जिवाश्मया लम्बाइ छेँय् निसे न्हिपंतक २७ सेन्टिमिटर दु धका धाउगु दु।

दुबईया अर्बपति शासक शेख मोहम्मद बिन राशिद अल मकतुम व वय्कया तिरि प्रिन्सेस हया बिन्त अल हुसेनदथुइ सम्बन्ध विच्छेद जुइत्यंगु दु ।

सम्बन्ध बिच्छेदया नितिं मकतुमं तिरियात ५०गु कोती पाउण्ड अथेधइगु थ्यंमथ्यं ८०गू अर्ब तका पुलेमालीगु जूगु दु । थुकिया नितिं बेलायती कानुनी इतिहासय् सम्बन्ध विच्छेदय् दकले उप्वः ध्यबा पूगु कथं न्हूगु रेकर्ड दयेकूगु दु ।

बेलायती उच्च अदालतं प्रिन्सेस हया बिन्त अल हुसेनयात २५गू कोती १५गू लख पाउण्ड बीमाःगु फैसला न्यंकूगु खः । हया जोर्डनया जुजु हुसेनया म्ह्याय् खः । वय्क आः ४७दँ दत । शेख मोहम्मद बिन राशिद अल मकतुम संयुक्त अरब इमिरेट यूएईया प्रधानमन्त्री खः ।

वय्कलं ६म्ह मिसातनाप ईहिपा यायेधुंकूगु दु । बेलायती अदालतं प्रिन्सेस हायायात बीगु ध्यबां निम्ह सन्तानया सुसाःकुसा, सुरक्षा बजेट, बिदा, छम्ह नर्सया तलब, कामदारया ज्याला व वय्क च्वनीगु थाय्या खर्च, छेँजःया नितिं गाडी अले छेँय् लहिनातःपिं जनावरया नितिं खर्च यायेत उलिमछिं ध्यबा पुइकूगु खः ।

युरोपेली देय् कोसोभां थःगु देशय् दूगु कारागारया ३सः कक्ष डेनमार्कयात बालं बिइत्यंगु दु ।

डेनमार्कय् कैदी बन्दीतये ल्याः तसकं अप्वयावनेधुंका कोसोभाें डेनमार्कयात दँय्ुदसं १५गू मिलियन युरोय् कारागार बालं बिइत्यंगु खः ।

बालं बिइगु  कारागारया कक्षय् गैर इयु देय्या बन्दीतयेत तयेत्यंगु दु । कोसोभोय् ७ सः निसें ८सः कारागार कक्ष खाली दूगु हुनिं  डेनमार्क  व कोसोभो दथुइ कारागार लिज सम्झौता जूगु खः ।

थुगु सम्झौता आःयात  ५दँया नितिं जूसा नं ई कथं परिमार्जन जुइ फइगु संभावना दूगु न्ह्यथंगु दु । अयेसां थुगु  सम्झौतायात संसदया ३ब्वय् निब्वया बहुमतं पारित यायेमाः ।

कोसोभोया राजधानी प्रिस्टिनां ५०गू किलोमिटर तापाक्क खाली दूगु कारागारया डेनमार्कया अधिकारीतयेसं निरीक्षण याइगु जूगु दु ।

थुखे डेनमार्कं कैदीतयेत  छेँजःया स्वापूपाखें तापाक्क यंकेगु निर्णय याःगु धका कोसोभो व डेनमार्कय् आलोचना जुइगु न्ह्यागु दु ।