Display Style:
Column Style
नेपाल लिपि गुथिया बुदिं हन
लहनान्युज | दिल्लागा औशी ११३८ ( अगष्ट ११ २०१८ )
नेपाल लिपि गुथिं बुदिं हना नापं दँ मुँज्या ज्याझ्वः थःगु हे छेँ साःननि यागु दु ।
गुथिपाखें लिपि स्यनेज्याय् नेपाल लिपि कक्षाय् सुयोग्य रत्न ताम्राकार न्हाप, आनन्द कुमार महर्जन ल्यू, सुनिता डंगोल लियांल्यू लाःगु खः ।
अथेहे रञ्जना लिपिया कक्षाय् आनन्द कुमार महर्जन न्हाप, सुनिता डंगोल व सुयोग्य रत्न ताम्राकार ल्यू, लुमिन ताम्राकार व सृष्टि श्रेष्ठ लियांल्यू लाःगु खः ।
निक्वःगु रञ्जना लिपि कक्षाय् बिद्या सागर तुलाधर न्हाप, सदिक्षा शाक्य ल्यू, प्रमिला ताम्राकार व अनुसूया मानन्धर लियांल्यू लाःगु खः ।
ज्याझ्लय् लिपि कक्षाय् ताःलापिन्त पाहाँ नेपालभाषा टाइमस्या सम्पादक सुरेश किरण मानन्धरं दसिपौ लःल्हानादीगु खः।
गुथिया नायः निरञ्जन ताम्राकारया नायःसुइ छ्याञ्जे पबित्र कसालं उगु ज्याझ्वः न्ह्याकादीगु खः । प्रतिवेदन छ्याञ्जें न्ह्यब्वयादीगु खःसा ल्याःचाया प्रतिवेदन दांभरिं उत्तम साय्मिं न्ह्यब्वयादीगु खः ।
किपा राजेन्द्र रंजित
बुखँ नेवाः सुचना केन्द्र
सुधिर ’ख्वबि’ या चिनाखँ ब्वनेज्याझ्वः
लहनान्युज | दिल्लागा औशी ११३८ ( अगष्ट ११ २०१८ )
नेपालमण्डल साहित्य प्रतिष्ठान यलया ग्वसालय् सुधिर ‘ख्वबि’ या याकः चिनाखँ ब्वनेज्या यलया लगंख्यलय् जूगु दु ।
सुनिल बज्राचार्य न्ह्याकादीगु ज्याझ्वलय् नेपालभाषाया १७ पु व खसभाषाया ३ पु चिनाखँ सुधिर ख्वबिं ब्वनाः न्यंकादीगु खः ।
मां, देश मालेगु झ्वलय्, थौंकन्ह्य जिगु छाती बुलेटप्रुफ सवारीं क्यलाहयाच्वंगु दु, बोधि–बृक्ष, खुकुरी व तथागत, छन्हु सनिलय्, सेल्फी, डुङ्गा तय्गु आमहत्या, टु लेट–स्वनिगः–छगू न्ह्यसः, भिंतुना, मतिना, सम्पादन, लुमन्तिया छपाः किपा, मृत्यु पर्यन्तया–मतिना, जः, छगू न्ह्यसः–झीगु सहरय् कि डम्पिङ्ग साइडय्, रुपानतरणः इट्स चेन्ज अर माइग्रेनिटि ... नेवाःभाय्या चिनाखँ नापं बिज्ञापन, आगोको सहर ..., श्रीपेचहरु खसभाय्यागु चिनाखँ ब्वना न्यकादीगु खः ।
उगु ज्याझ्वलय् आपालं साहित्यकार पिनिग ब्बति कयादीगु खः ।
किपा राजेन्द्र रंजित
बुखँ नेवाः सुचना केन्द्र
थौ अगष्ट ९ विश्व आदिवासी दिवस
लहनान्युज | दिल्लागा त्रयोदशी ११३८ ( अगष्ट ९ २०१८ )
थौ अगष्ट ९ कुन्हु विश्व आदिवासी दिवस हःगु दु । आदिवासी दिवसः हलिं न्यंक नं थीथी ज्याझ्वः यानाः न्यायेकाच्वंगु दु ।
नेपाल आदिवासी जनजाति महासंघया ग्वसालय् थौं येँया भृकुटीमण्डपं बृहत्त ¥याली जुगु दु । उग ¥याली थीथी आदिवासी जनजातिपिनिगु संघ संस्थां न ब्बति काःगु दुु ।
संयुक्त राष्ट्रसंघं सन् १९९३ या ९ अगष्टयात विश्व आदिवासी दिवस न्यायेकेगु निर्णय याःगु खः ।
थनी स्वीस्वदँ न्ह्यःनिसें विश्वन्यंकं च्वंपिं आदिवासीपिन्सं विश्व आदिवासी दिवस तःजिक न्यायेकेगु यानाः वयाच्वंगु दु ।
भाइस प्रिन्सिपल शान्ति मानन्धर मन्त
नृपेन्द्रलाल श्रेष्ठ | दिल्लागा त्रयोदशी ११३८ ( अगष्ट ९ २०१८ )
नेपाःया न्हापागु नेपालभाषाया माध्यमं ब्वंकाः वयाच्वंगु जगतसुन्दर ब्वनेकुथिया भाइस प्रिन्सिपल शान्ति मानन्धर श्रावाण २३ गते बुधवाः आकाझाकां मन्त ।
मदुम्ह मानन्धरया लुमतिइ थौ श्रावण २४ गते बिहिवाः कुन्हु स्कूल बिदा बिगु दुु ।
इन्डिजिनस टेलिभिजनया निक्वःगु बुदिं हन
नृपेन्द्रलाल श्रेष्ठ | दिल्लागा द्धादशी ११३८ ( अगष्ट ८ २०१८ )
सामान्यतया थीथी खलः पुचः वा संचार गृहया न्ह्यागु हे संस्थाया बुदिं हनेगु झ्वलय् नं समारोह जुइ अले थीथी ब्यक्तित्वपिन्त पाहां कथं आसन ग्रहण याकी अले भाषण बिइकी नापं सांस्कृतिक ज्याझ्वः याना नापं दसिपौ इना क्वचायेकी धकाः सकलसिनं थुइका वयाच्वंगु खः ।
तर नेपाःया हे न्हापांगु सामुदायीक टेलिभिजन इन्डिजिनस टेलिभिजनया थुगुसी हंगु बुंदिं धाःया ब्यागलं कथं खने दत । न त दबुलिइ मूपाहां वा पाहांपिं खने दत । न त यक्व मनूतय्गु भाषण हे न्यनेदत । ब्यागलं कथं बुदिं हनेगु झ्वलय् दबलि बहस स्वंगू विषयसं जुल अले मूपाहां छम्हेस्यां जक न्वंवानादिल ।
थीथी आदिवासी जनजातिय्गु म्हसीका पिब्वइगु कथंया नेवाः, तामाङ, लिम्बु, थारु नापं थीथी आदिवासी जनजातितय्गु सांस्कृतिक ब्वज्या जुल । ज्याझ्वलय् मूपाहां वाङमय शताब्दी पुरुष सत्यमोहन जोशी छम्हेस्यां जक दबुलिइ न्वंवानादिल । अले सुनां नं भाषण बियादीगु मदु ।
उगु ज्याझ्वलय् पत्रकार कुमार यात्रुं विकास व मिडिया विषयसं दबलि बहस न्ह्याकादीगु खःसा डोमा शेर्पां मिडिया व मिसा विषयसं अले पत्रकार श्रीकृष्ण महर्जनं मिडिया व आदिवासी जनजातिया सवाल विषयसं दबलि बहस न्ह्याकादीगु खः । टेलिभिजनय् ज्याझ्वः न्ह्याके थें हे याना अथे दबलि बहस ज्याझ्वः न्ह्याकूगु खः । थ्व नितान्त न्हूगु कथंया ज्याझ्वः जूगु दु ।
उगु कथंया ज्याझ्वः प्रत्येक्ष प्रशारण इन्डिजिनियस टेलिभिजनपाखें याःगु खः ।
ज्याझ्वलय् सांसदत, आदिवासी जनजातिया न्ह्यलुवाः, पत्रकार, जातीय संगठनया प्रतिनिधि, आदिवासी जनजातिया अभियान्तातय्गु सहभागीता दुगु खः । इन्डिजिनियस टेलिभिजनपाखें न्हापांखुसि थुगु कथं सार्वजनिक रुपं बुदिं हनेगु ज्या याःगु खः । इन्डिजिनियस टेलिभिजनय् नेवाः, तामाङ, शेर्पा, राई, लिम्बु, मगः, थारु नापं थीथी कथंया झिंस्वंगू मातृभाषाया ज्याझ्वः प्रशारण जुयाच्वंगु दु ।
नेपाःया टेलिभिजनया ख्यलय् थुलि मच्छि भाषां ज्याझ्वः न्ह्याका वयाच्वंगु धइगु हे इन्डिजिनियस टेलिभिजन जुयाच्वंगु दु । उकिं थुगु टेलिभिजन धायेवं हे नेपाःया समावेशी टेलिभिजनया रुपय् मनूतय्सं म्हसीका वयाच्वंगु दु ।
