Display Style:
Column Style
पेट्रोल, डिजेल, मचिकं व ग्यासया भाः थिके जुल
लहनान्युज | गुंलागा नवमी ११३८ ( सेप्तेम्वर ४ २०१८ )
नेपाल आयल निगमं पेट्रोल, डिजेल, मचिकं व ग्यासया भाः थःकागु दु । आयल निगम सञ्चालक समितिया मुँज्यां पेट्रोलय् प्रतिलिटर छतका नाप डिजल व मचिकंलय् प्रतिलिटर स्वतका थःकागु दु ।
जा थुइगु ग्यासय् प्रतिसिलिण्डर २५ तका थःकागु दु । थु गु भाः थौं चन्ह्यः निसें लागु जुइ धकाः नेपाल आयल निगमया प्रवक्ता वीरेन्द्र गोइत धागु दु ।
थ्व न्हुगु भाः कथं छगु लिटर पेट्रोलया भाः ११२ तका थ्यगु दु । अथेहे छगु लिटर डिजेल व मचिकं खय् ९८ तका थ्यंग् दु ।
पद्मरत्नया साहित्य ख्यः विषयस ज्याझ्वः जुल
गुंलागा नवमी ११३८ ( सेप्तेम्वर ४ २०१८ )
पद्मरत्न नागरिक अभिनन्दन समारोह समितिया इनापय् प्रतिभा समाजया ग्वसालय् थौं भाद्र २० गते बुधवाः येँया प्रदर्शनी मार्ग भृकुटी मण्डपय् च्वंगु नेपाल पर्यटन बोर्डया हलय् ‘साहित्य ख्यलय् पद्मरत्न तुलाधर’ विषयस ज्याझ्वः जुगु दु ।
समारोह समितिया कजी लक्ष्मीदास मानन्धर मूपाँहा जुया झायादीगु उगु ज्याझ्वलय् पाँहा कथं वाङमय शताब्दी पुरुष डा. सत्यमोहन जोशी, नेपालभाषा एकेदमिया चान्सलर चित्तरञ्जन नेपाली, जनकवि दुर्गालाल श्रेष्ठ, नेपालभाष परिषदया नायः प्रा. सुवर्ण शाक्य, प्रा. नर्मदेश्वर मान प्रधान, डा. चुन्दा वज्राचार्य व डा. बज्रराज शाक्य झायादीगु खः ।
उगु साहित्यक ज्याझ्वलय् व जनकवि दुर्गालाल श्रेष्ठया कविता वाचनयाना न्ह्यागु ज्याझ्वलय् नारद बज्राचार्य, भुषणप्रसाद श्रेष्ठ, कृष्णभक्त बोडे, प्रतिसरा साय्मि हेरारत्न शाक्य, लोककवि राजभाइ जकःमि शौरभ शाक्य, मथुरा साय्मि, सुधिर ख्वबि व शरद कसाःपिन्स थःथःगु साहित्य ब्बना न्यकादीगु खः ।
अथेहे मूपाँहा लक्ष्मीदास मानन्धर, प्रा. सुवर्ण शाक्य, प्रा. नर्मदेश्वर मान प्रधान, डा. चुन्दा वज्राचार्य व डा. बज्रराज शाक्यं पद्मरत्नया साहित्य ख्यःया बिषय कनादीगु खः ।
साहित्य कवःया कजि डा. पुष्पराज राजकिर्णिकारया सभाध्यक्षताय् जुगु उगु ज्याझ्वः रजनी मिल्ला न्ह्याकादीगु खः ।
भिडियो स्वयेत क्वय् क्लिक याना दीस
https://www.facebook.com/lahananews/videos/499521563845621/?t=18
https://www.facebook.com/lahananews/videos/499534423844335/?t=24
गोविन्द किपू प्रतिष्ठानं सांस्कृतिक व सम्मान ज्याझ्वः याइगु
लहनान्युज | गुंलागा सप्तमी ११३८ ( सेप्तेम्वर २ २०१८ )
उस्ताद गोविन्द किपू प्रतिष्ठानया ग्वसालय् थौं प्यक्वःगु विविध सांस्कृतिक व सम्मान ज्याझ्वः याये त्यःगु दु ।
गोविन्द किपू प्रतिष्ठानया नायः दिलीप किपू न लहनान्युजयात बियादीगु जानकारी कथं थौं सम्मानीत जुयादीपि संकिपा ‘राजमति’या नकिं मय्जु हिसिला महर्जन, ईमेज च्यानलया ‘समेबजि’
ज्याझ्वःया सुरेन्द्र मानन्धर, किपूया साहित्यकार अशोक शोकी, ‘लहना’ वाःपौया व फोटो पत्रकार नृपेन्द्रलाल श्रेष्ठ, किपूया हे नीलः सांस्कृतिक पुचःया संस्थापक नायः लिसें संगीतकःमि तेजमान बज्राचार्य व ललेन्द्र शाक्ययात हनीगु ज्याझ्वः तयातःगु दु ।
थौं या सांस्कृतिक व हना ज्याझ्वलय् मूपाहाँ कथं सुरसुधाया बरिष्ठ तबला बादक सुरेन्द्र श्रेष्ठ पाहाँ कथं किपू नगरपालिका ३ वडाया वडा दुजः ज्ञानप्रसाद महर्जन झायादीगु जानकारी न नायः दिलीप किपू नं जानकारी बियादीगु खः ।
अथेहे, थौं जुइगु उगु ज्याझ्वलय् किपूया नांजाःपि संगीतकःमि ज्ञानेश्वर निभाः, रत्नशोभा महर्जन व दिपा महर्जन, उदय मानन्धर, पंचामृत ब्याण्ड, इनाप महर्जन, उमंग मानन्धर, अटुल मानन्धर, विश्व काफ्ले, विनोद बंजारा, योगेन्द्र खनाल, रोहित रिजाल पिनिगु सांगितिक ब्वज्या नाप नांजाःम्ह निर्देशक पवन जोशीया ख्यालः न क्यनेगु ज्याझ्व नांजाःम्ह निर्देशक पवन जोशीं तया तःगु दु ।
मिसा खलःया बुदिं हन
लहनान्युज | गुंलागा सप्तमी ११३८ ( सेप्तेम्वर २ २०१८ )
नेपालभाषा मिसा खलःया ग्वसालय् थौं छगू ज्याझ्वः यासें २८क्वःगु बुदिं हःगु दु ।
ज्याझ्वलय् मूपाहाँ वाङमय शताब्दी पुरुष डा. सत्यमोहन जोशी व बिशेष पाहाँ प्रा. सुवर्ण शाक्यं मोतिलक्ष्मी उपासीकाया निगूगु बाखं “मोति बाखं पुचः” व “मोतिमाः” पितब्बज्या यानादीगु खः ।
थ्व हे झ्वलय् खलःया आजीवन दुजःपिं रेवती राजभण्डारी, माणिकलक्ष्मी तुलाधर व मैंया स्थापितयात हंगु खः ।
२५क्वःगु बुदिंया लसताय् “कृष्णदेवी तण्डुकार लुमन्ति सिरपाः” मांभाय् पुचः, यलयात, “लुमिन कमला नेपालभाषा हःपाः सिरपाः” अपर्णा प्रधानयात व “चम्पा टंक बिलास बिजु नेवाः हःपाः सिरपाः” केशरीमैंया प्रधानयात मूपाहाँ शताब्दी पुरुष डा. सत्यमोहन जोशी व बिशेष पाहाँ प्रा. सुवर्ण शाक्यं लःल्हानादीगु खः ।
मिसा खलःया नायः मंगला कारंजितया सभाध्यक्षताय् जूगु उगु ज्याझ्वः उर्मिला डंगोल न्ह्याकादीगु खः ।
बुखँ अमिरमैंया रंजित
किपा नेवाः सुचना केन्द्र
सक्वय् नृसिंह जात्रा
लहनान्युज | गुंलागा सप्तमी ११३८ ( सेप्तेम्वर २ २०१८ )
सक्वय् थुगुसि गुँपुन्हिया लसताय् खुन्हुया दिनस नृसिंह जात्रा याःगु दु । सक्वया माघं दँय्दसं धलं दंकेत नादी खुसिइ यंकेमाःम्ह माधबनारायण द्यःया पुजारी द्यःबाज्या हे “नृसिंह द्यः” जुया बिज्याइगु परम्पराकथं शुशिल राजोपाध्याय द्यःबाज्या ब्वति कया बिज्याःगु खः ।
न्ह्यःन्ह्यः प्रल्हादं नमस्कार यानाः सक्व देय्न्यंकं लिखितं पलाः छिनाः देँ चाःहिकेगु ज्याझ्वलय् देशवारं किभु छायाः नृसिंह, प्रल्हादपिन्त पूजा याइ । नृसिंहया जवंखवं लक्ष्मी व सरस्वती निम्ह नं पासा दइसा नृसिंहया ल्यूने हिरण्याक्ष व हिरण्यकश्यप दैत्य निम्ह नृसिंहया जँय् खिपतं हिनाः दैत्यपिन्त लुया यंकीगु लू स्वयदइगु खः ।
दैत्यपिन्त मस्तय्सं भागीयात धाःसा अरिं चाइगु, ग्याइगु व सिकं बीगु ल्वचं मुुक्त जुइगु धइगु बिश्वास दु ।
सक्वया भाजुमय्जुपिन्सं न्हिच्छि द्यांलानाः तुफिं बँ पुइगु, पुजा याइगु, धौ सगं ह्वलेगु यानाः झ्वःझ्वः छुना द्यःया न्ह्यःन्ह्यः वनीसा ल्यूने नारायण भजन मंडली म्ये हालावनीगु चलन दु ।
