Display Style:
Column Style
खड्गी समाज, कास्की जिल्ला अधिवेशन क्वचाल
लहनान्युज | थिंलाथ्व नवमी ११३८ (नोभेम्बर २७ २०१७)
नेपाल राष्ट्रिय खड्गी समाजया कास्की जिल्ला अधिवेशन छगू ज्याझ्वःया दथुइ क्वचाल
। सोमप्रसाद शाहीया सभाध्यक्षताय् जूगु उगु ज्याझ्वलय् मान बहादुर खड्गी मूपाहांकथं झायादीगु खः ।
ज्याझ्वलय् न्हुच्छेरत्न शाही, मोहन शाही, नन्दकिशोर शाही, अशोक पालिखे पाहांकथं झायादीगु खः ।
ज्याझ्वः लिपा हर्षमान शाहीया नेतृत्वय् नीन्याम्ह दुजः दुगु छगू जिल्ला समिति नं नीस्वंगु दु ।
मिसा नेतृत्व बिकास व उद्धोषण तालिम क्वचाल
लहनान्युज | कछलागा नवमी ११३८ (नोभेम्बर १२ २०१७)
ठिमि नगरपालिका वालकुमारी वडा नं. ४ या बालकुमारी महिला समाजंया ग्वसालय् मिसा नेतृत्व बिकास व उद्धोषण तालिम क्वचाःगु दु । झिन्हू तक न्ह्याःगु उगु तालिमय् नींम्ह (२० म्ह ) प्रशिक्षार्थी पिंस ब्वति कयादिगु खः ।
तालिमय् प्रशिक्षिक कथं कम्यूनिटि सर्भिस डाइरेक्टर अफ् रोटरी क्लबया मय्जु इन्डिजेनिएश टेलिभिजनया नेवाः ज्याझ्वःया न्हाकामि श्रीजया शाक्यं तालिम बियादिगु ख । उगु ज्याझ्वः नेपाल संम्बत ११३८ कछलाथ्व अष्टमी निसें न्ह्याःगु खः ।
उगु ज्याझ्वलय् मूपाहा कथं ठिमि नगरपालिका वालकुमारी वडा नं. ४ या वडाया वडानायों भाजु कुमार श्रेष्ठं झायादिगु खः ।
न्याम्ह मिसा पत्रकार सगरमाथाय् वनीगु तयारी
लहनान्युज | कछलागा दशमी ११३८ (नोभेम्बर १२ २०१७)
समानताया लागि बुलन्द सः या नारा ज्वना सगरमाथा आरोहण यायेगु तातुना नेपाःया मिसा पत्रकार पुचःयात राष्ट्रपति बिद्यादेवी भण्डारीं भिंतुना बियादीगु दु ।
नेपालया थी थी न्याःगु सञ्चाः ख्यलय् ज्यायाना च्वंपि न्याम्ह मिसा पत्रकारपिं राष्ट्रिय समाचार समिति रोशा बस्नेत, न्यूज २४ टेलिभिजनया प्रियालक्ष्मी कार्की, नेपाल टेलिभिजनया रोजिता बुद्धाचार्य, मेधा टेलिभिजनया कल्पना महजर्जन व स्वतन्त्र पत्रकार देउराली चाम्लिङयात राष्ट्रपति बिद्यादेवी भण्डारीं भिंतुना बियादीगु खः ।
भक्तपुर सुनचाँदी व्यवसायी संघया प्यक्वःगु दँमुज्या क्वचाल
राजेन्द्र रञ्जित | कछलागा नवमी ११३८ (नोभेम्बर १२ २०१७)
भक्तपुर सुनचाँदी व्यवसायी संघया प्यक्वःगु दँ मुँज्या ख्वपया जगातिइ शनिवाः क्वचाःगु दु ।
नेपाल सुनचाँदी व्यवसायी महासँघया नायः मोहन कुमार विकःया मूपाहाँसुइ, भक्तपुर सुनचाँदी व्यवसायी संघया नायः पद्मसुन्दर शाक्यया
नायःसुइ ज्याझ्वः क्वचाःगु खः ।
लुँ व्यवसायीपिनिगु नितिं ब्यागलं सरकारी ऐन नीति मदुगु हुनिं व्यवसायीत मारय् लानाच्वंगु मूपाहाँ विकःनं न्ह्यथनादिल । अथेहे राजश्व कार्यालयपाखेँ जुयाच्वंगु अव्यवस्थित अनुगमनया हुनिं व्यवसायीतय्त थीथी पंगःब्वलनाच्वंगु नापं सुनचाँदी ऐन निर्देशिका जारी यायेमाःगु खँय् व्यवसायीपिन्सं बहः बियादिल ।
पद्म सुन्दर शाक्यं लसकुस न्वचू तयादीगु ज्याझ्वलय् माणिक रत्न शाक्यं थःथःगु नुगः खँ प्वंकादीगु खः ।
संघया मूछ्याञ्जे प्रदीप रत्न शाक्यं न्ह्याकादीगु ज्याझ्वलय् नेपाल सुनचाँदी व्यवसायी महासंघया केन्द्रीय पदाधिकारीपिं, सल्लाहकारपिं, येँ, यल, ख्वपःया नायःपिं, थीथी जिल्लाया प्रतिनिधिपिं, नेपाल उद्योग वाणिज्य महासंघया प्रतिनिधि, ‘रत्न पत्थर’ विज्ञ, स्थानीय प्रतिनिधिपिनिगु ब्वति दुगु ज्याझ्वलय् ‘रत्न पत्थर वर्गिकरण व पहिचान’ या झिन्यान्हु यंकं जूगु तालिमय् ब्वति कयादीपिन्त मूपाहाँ विकःपाखें दसिपौ लःल्हानादीगु खः ।
नेपालय् हे बेलुन व्यावसायिक न्ह्याइगु
लहनान्युज | कछलाथ्व चतुर्दशी ११३७ (नोभम्बर ३ २०१७)
बेलुन नेपालप्रा.लिं नेपालय् हे व्यावसायिकरुपं बेलुनब्वय्कीगु जूगु दु । छक्वलय् खुम्हतक मनू तयाः बाघौ तक आकाशय् ब्वय्कीगु प्रा.लिं. छगु पत्रकार सम्मेलनय् जानकारी बीगु दु ।
पर्यटकीयनगरी पोखरा यष्डतया धम्पुसं बेलुनय् च्वनाः मार्दी खुसिया सिथय् अवतरण याकीगु उडानया निंतिं म्हतिं च्याद्वः व न्यासः तका कयाःब्वय्कीगु जूगु दु ।
प्रा.लि.या शेयर दुजः लिसें पत्रकार सम्मेलनया कजि प्रविन महर्जनं कनादी कथं बेलुन नेपाल प्रा.लिं. छगू करोड तकाया लगानी यानाः अमेरिकाया एडम्स बेलुन कम्पनीयाके बेलुनन्याःगु खःसा चीन तालिम प्राप्त पाइलटया व्यवस्था यानातःगु दु । ग्राउण्ड ह्याण्डलिङ यायेत भारतं ग्राउण्ड ह्याण्डलिङ टेक्निसियन हःगु दु ।
भविष्यय् स्थानीय मनू तयेत तालिम बियाः नेपालय् हे हट एयर बेलुनया व्यावसायिक उडानया लागि जनशक्ति तयार यायेगु तातुंगु नं दु ।
थुकिं नेपाल सरकारयात राजस्व पाखें आर्थिक तिबःजुइगु व प्रत्यक्ष १५ म्हसित लजगाः दइगु नं वय्कलं कनादीगु दु ।
बेलुन नेपाल प्रा.लि.या नायः विक्रम बाडेया अध्यक्षताय् न्ह्याःगु उगु ज्याझ्वलय् व्यावसायिक ब्राण्ड रेडबुल नाप एमओयू नं हस्ताक्षर यानाः कालबिल नं याःगु खः । थुके एनआरएनए यूकेया दुजः दीपक श्रेष्ठया कम्पनी हिमालयन ग्लोबल इन्भेष्टमेन्ट कम्पनीया नं लगानी दुगु खँ अध्यक्ष विक्रम बाडें कनादिगु खः ।
कम्पनी न्ह्याकेगु निंतिं नायः विक्रम बाडेलिसें हिमालयन ग्लोबल इन्भेष्टमेन्ट प्रा.लि.या श्रेष्ठलिसें सबिन महर्जन, प्रविन महर्जन, अञ्जु खड्का व बेनुपमा कार्कीया मंकाःलगानी दुगु पत्रकार सम्मेलनय् जानकारी ब्यूगु दु ।
