समर्थन म्ह्वः जुयावंलिसे ट्रम्प आक्रोशित
लहनान्यूज सम्वाददाता | कौलाथ्व एकादशि ११३६ (अक्टोबर १२ २०१६)
थःगु हे विवादास्पद अभिव्यक्तिया हुनिं छम्ह लिपा मेम्ह यानाः पार्टीया वरिष्ठ नेतातयगु साथ मदयेधुंकाः अमेरिकन राष्ट्रपतिया रिपब्लिकन उम्मेदवार डोनाल्ड ट्रम्प तंचायादीगु दु ।
मिसालिसें समाजया थी थी पक्षय् लाक्वपाक्व अभिव्यक्ति ब्यूगुलिं रिपब्लिकन नेतातयसं ट्रम्पया साथ त्वःतेगु घोषणा यायेधुंकाः तंचायादीम्ह ट्रम्पं नेतातयत विश्वासघातीया नां बियादीगु दु । मिसायात अश्लील टिप्पणी यायेधुंकाः विरोध याःपिं नेतातयत ट्रम्पं ट्वीटरपाखें विश्वासघातीय नां बियादीगु खः ।
थःगु पार्टीया विश्वासघाती नेता डेमोक्रेट प्रतिष्पर्धी हिलेरी क्लिन्टन स्वयां नं आपाः घातक खःगु ट्रम्पं धयादीगु खः ।
ट्रम्पया चरित्रया हुनिं समर्थन याये मफूगु धकाः अभिव्यक्ति ब्यूम्ह रिपब्लिकन नेता लिसेंं अमेरिकी प्रतिनिधि सभाया सभामुख पाउल रायनयात ट्रम्पं छम्ह कमजोर व प्रभावहीन नेता धकाः कुंखिनादीगु दु ।
