वंगु २४ घण्टाया दुने देयन्यक २,२१२ म्हेसित कोरोना भाइरस संक्रमण पुष्टि जुगु दु।

८ हजार ८८ म्हेसिगु पीसीआर परीक्षण यागुलि १ हजार ७९३ म्हेसित व ४ हजार १८ म्हसिगु एन्टिजेन परीक्षण यागुलि ४ सय १९ म्ह याना २ हजार २१२ म्हेसित कोरोना भाइरस संक्रमण खनेदुगु धका स्वास्थ्य तथा जनसंख्या मन्त्रालयं धागु दु।

अथेहे वंगु २४ घण्टाय् कोरोना संक्रमणं ३३ म्ह सीउगु दु सा १ हजार ८६७ म्ह कोरोनामुक्त जुगु दु।

वंगु वाःया न्हापागु दिं शेयर बजार परिसूचक मापक नेप्से घटे जुया उत्पादन व माइक्रो फाइनान्सबाहेक मेमेगु समूहया शेयर घटेजुगुलि नेप्से २४ दशमलव ८८ अङ्कं घटे जुया ३ हजार १५४ दशमलव शून्य ३ विन्दुइ कुहावंगु खः।

थौं धासा नेप्से घटे जुया कारोबार रकमय् न्हुगु कीर्तिमान दयकूगु दु। थौं २ सय २२ कम्पनीया ३ करोड ५५ लाख ५० हजार कित्ता शेयर २१ अर्ब ६४ करोड रुपैयाँया किनबेच जूगु दु। थ्व धइगु नेपाली शेयर बजारया इतिहासय् छन्हु हे दकलय् अप्वो कारोबार जुगु खः।

थ्व स्वया न्ह्यः छन्हु हे कारोबार २० अर्ब रुपैयाँ स्वया अप्वो थ्यंगु मदुनि। थ्व स्वया न्ह्यः दकलय् अप्वो नेपाल बैंकया १ अर्ब ५ करोड रुपैयाँया कारोबार जुगु खः।

रिडी हाइड्राया शेयर दकलय् अप्वो साढे ८ प्रतिशतं घटे जुगु खः। अथेहे रसुवागढी हाइड्रो, श्री इन्भेस्टमेन्ट फाइनान्स, रसुवागढी हाइड्रो लगायतया शेयर ६ प्रतिशतं अप्वो घटे जुगु खः।

समग्र बजाः कुहावंसा खानीखोला हाइड्रो, जीवन विकास लघुवित्त व युनियन लाइफ कम्पनीया शेयर १० प्रतिशतं थहावंगु दु।

नेकपा माओवादी केन्द्रया केन्द्रीय सदस्य नाप सांसद सुदन किराँतीं पार्टीया संरचना संघीय स्वरूपय् मवंगु धका असन्तुष्टी यागु दु।

जारी केन्द्रीय कमिटी बैठक समूहगत धारणा तयेगु झ्वलय् भोजपुर इन्चार्ज तक जुयादीम्ह किराती प्रदेश व स्थानीय तहयात स्वायत्त अले जिल्लायात समन्वय भूमिकाया व्यवस्था यायेमाःगु धका सुझाव बिगु दु। च्यागु पाना राजनीतिक प्रतिवेदनय् टिप्पणी यासे किरातीं धागु दु, ‘देय् संघीय स्वरूप वने धुकुगु दु। तर, देय् न्ह्याकिइगु पार्टी केन्द्रिकृत मानसिकताय् न्ह्याकेगु खःसा पार्टी बलाइ मखु।’ स्थानीय तहयात गौण दयकेत अझ न जिल्ला हे निर्णायक जुइगु, प्रदेश स्वया केन्द्रय् हे सर्वाधिकार जुइगु संगठनात्मक स्वरूपयात हिलेमागुलि बःबिगु दु।

बलागु संगठन जक आन्दोलन न्ह्याके फइ धका धयादीसे वयकल धयादीगु दु, ‘संगठन बलाकेगु खःसा प्रणाली बलाकेमाः। जनताया पक्षय् संगठनयात परिचालन याये। आन्दोलन जनजीविकानाप स्वायेनु।’ संविधानय् उल्लेखित शिक्षा, स्वास्थ्य थे जागु मौलिक अधिकार जनतां प्रत्याभूत याये मखगु धासे पार्टीं थुकिइ बिचाः यायेमाः धका किरातीं धागु दु।

जनयुद्धया जनमुक्ति सेना, सांस्कृतिक मोर्चाय् दनाच्वंगु अवस्था आः दयनीय पाखे वनाच्वंगुलि पार्टीयात ध्यानाकर्षण यागु खः।‘थौं जनमुक्ति सेनाया बहादुर कम्पनी कमाण्डरपि सामान्य प्राइभेट कम्पनीया सेक्युरिटी गार्ड यानाच्वंगु दु। सामना सांस्कृतिक परिवारया कलाकारपि दोहोरी हालेत बाध्य जुयाच्वंगु दु। घाइते जूपि उपचारया लागि चन्दा फ्वना च्वंगु दु’, किरातीं धागु दु’ ‘थुकिया पिने बालागु मनोविज्ञान निर्माण जुगु मदु। थुकियात पार्टी न सम्बोधन यायेमाः।’

नेकपा माओवादी केन्द्रं स्थायी समितिया बैठकं केन्द्रीय समिति बैठक आइतबाः सम्पन्न यायेगु कथं निर्णय यागु दु।

आइतबाः सुथय निसे पार्टी कार्यालय पेरिसडाँडाय् स्थायी समिति बैठकं केन्द्रीय समितिया बैठक सम्पन्न याना न्ह्यावनेगु धका निर्णय यागु खः। बैठकय् नेतापिनिगु कार्यविभाजन लगायतया विषय छलफल जुगु दु धका पार्टी प्रवक्ता नारायणकाजी श्रेष्ठं धागु दु।

केन्द्रीय समिति बैठकय् समूहगत छलफलय् वंगु रिपोर्ट कन्ह्य च्वनिइगु स्थायी समितिया बैठकं व्याख्या व निष्कर्ष पिकाइ धका धागु दु। आइतबाः केन्द्रीय समितिया बैठक पार्टी अध्यक्ष पुष्पकमल दाहाल प्रचण्डं पेश यागु राजनीतिक व सांगठनिक प्रतिवेदनय् समूहगत रुपं छलफल जुइ।

समूहगत छलफल लिपा वंगु सुझावया आधारय् प्रतिवेदन पास जुइ।