भाषासेवी समाजसेवी चक्रमान डंगोल मदुगु खुदँ दूगुया वार्षिक तिथी लाका वयकःयात लुमंकेगु ज्या जूगु दु।

वयकः रेडियो उपत्यका एफ एमया संंस्थापक अध्यक्ष खःसा वन्दे नारायण परिवार क्लबया नं छम्ह संस्थापक खः। उगु ज्याझ्वलय् समाजसेवाः व भाषासेवाय् थःगु जीवन पानादीम्ह चक्रमान डंगोलयात लुमन्ती युगवाणी नेटवर्कया कजि पुपराज पराजुलीया सभाध्यक्षताय् जूगु खः।

ज्याझ्वलय् सन्तकुमार महर्जनं लसकुस न्वचु तयेगु झ्वलय् मदुम्ह डंगोलया गुण लुमंकूसे मदुम्ह डंगोलया किपाय् पाहाँपिन्सं श्रदान्जली कथं स्वाँमा व खादागा देछागु खः। मदुम्ह चक्रमान डंगोलयात लुमंकेगु झ्वलय् नेपाल पत्रकार संघया नायः विपुल पोखरेल,युगवाणी नेटवर्कया कार्यकारी सल्लाहकार कृष्ण केसि व कार्यकारी निर्देशक सुरेश आचार्यया नापनापं मदुम्ह डंगोल जहान मयजु लक्ष्मी डंगोल पिन्सं नं चक्रमान डंगोलयात लुमंकुसे श्रद्धान्जली देछानादीगु खःसा लुमन्ति ज्याझ्वः सन्चारकःमि प्रज्वल शाक्यं न्ह्याकादीगु खः।

चःमती ध्यान पार्कया शिलान्यास येँ महानगरया मेयर विद्यासुन्दर शाक्यं थौं छगु ज्याझ्वःया दथुइ ध्यान पार्कया शिलान्यास जुगु दु।

येँ महानगर वडा १५ या चःमती जग्गा विकास आयोजनाय् जनमार्ग उपभोक्ता समितिं यागु छगु ज्याझ्वः दुथुइ शिलान्यास यागु दु। शिलान्यास लिपा थःगु खँ त्ययेगु झ्वलय् मेयर शाक्यं, चःमति आयोजनाया ज्या ०७८ असार मसान्त दुने उपभोक्तायात हस्तान्तरण यायेगु ज्याझ्वः दुगु खःसा योजना कोविडया कारण छु महिना लिपा वंगु दु धका धयादीगु खः।

‘निर्वाचित लिपा जिमिसं निदँया दुने आयोजनाया ज्या क्वचाकेगु धका धयागु खः। लक्ष्य कथं ज्याना जुगु खः। उकिया दथुइ विश्वव्यापी महामारीया रुपं फैलै जुगु कोविडया कारण छु ई ढिला जुगु खः।’ मेयर शाक्यं धयादीगु दु, ‘ल्यः दनिगु आयोजनाय् यक्को ज्या क्वचाये धुकुगु दु। उपभोक्ताया जागरुकता जुगुलि उपलब्धीयात उपभोक्तापिनिगु ल्हातय् बिइत जिपि तयारी यानाच्वंनागु दु।’

पार्क ५५ लाख २२ हजार ४२० रुपैयाँ लागतय् निर्माण जुइत्यंगु खः । ०५८ सालय् सुरु जुगु योजना ०७४ साल लिपा जक गति मकागु खः।

वंगु २४ घण्टाय् स्वनिगलय् ४२८ म्हेसित कोरोना संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं थौं येँ जक २९९म्हेसित कोरोना सक्रमण जुगु दु। अथेहे यलय् ७७ म्ह व ख्वपय् ५२ म्हेसित संक्रमण पुष्टि जुगु खः।

अथेहे मेमेगु जिल्लाय् २४ घण्टाया दुने सुनसरीइ १२५, मोरङय् ११५, कास्कीइ १०१, झापाय् ६९, मकवानपुरय् ५९, चितवनय् ५४, नवलपरासी पूर्वय् ४४, काभ्रेय् ३७, रामेछापय् २८, रुपन्देहीइ २१, नुवाकोटय् २०, धादिङ व सिन्धुपाल्चोक, बाग्लुङय् १७÷१७ म्ह, दोलखाय् १४, स्याङ्जाय् १२ म्हेसित संक्रमण पुष्टि जुगु दु।

वंगु २४ घण्टाया दुने १८७५ म्हेसित कोरोना भाइरस (कोभिड–१९) या संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ६,८५८ म्हेसिगु पीसीआर परीक्षणय् १३१० म्ह व ३,२०८ म्हेसिगु एन्टिेन परीक्षणय् ५६५ म्ह याना १८७५ म्हेसित संक्रमण पुष्टि जुगु दु।

थ्व नाप आःतक नेपालय् कुल कोरोना संक्रमितपि ६ लाख ६५ हजार ८८६ म्ह थ्यंगु दु। उकि मध्ये ६ लाख ३० हजार ४०७ म्ह संक्रमणमुक्त जुगु दु। कोरोना संक्रमणं सीपि ९ हजार ५२५ म्ह थ्यंगु दु।

अथेहे सक्रिय संक्रमितपि २५ हजार ९५२ म्ह दु। उकि मध्ये २३ हजार ४७७ म्ह होम आइसोलेसनय् व २ हजार ४७५ म्ह अस्पतालय् उपचार यानच्वंग दु।

वंगु २४ घण्टाय् कोरोना संक्रमणमुक्त जूपि २ हजार १६४ म्ह दु।