नेपाल रडक्रस सोसाइटी मध्यपुर थिमि उपशाखाया नीप्यक्वःगु बुदिं न्यायेकगु दु।

उपशाखाया सभापति पूर्णकेशरी श्रेष्ठया सभाध्यक्षताय् जूगु उगु ज्याझ्वलय् मध्यपुर थिमि नगरपालिकाया मेयर मदनसुन्दर श्रेष्ठं ज्याझ्वःया उलेज्या यानादीगु खः। “रेडक्रस अभियानय् लगेजुपि, आपतय् लानाच्वंपी मनू तयेगु सेवायाये” धैगु मूल मन्त्र ज्वना न्ह्यानाः च्वंगु थुगु मध्यपुर थिमि उपशाखां बिस्का जात्राय् स्वास्थ्य शिविरय् ग्वाहालि यानादीपिं स्वयंसेवकपिन्त दसिपौ मूपाहां मेयर श्रेष्ठ लःल्हानादिगु खः।

अथेहे थीथी इलय् हिदानया ज्याझ्वलय् ग्वाहालि यानादीपिं संघसंस्थायात नं दसिपौ लःल्हानादिगु खः। ज्याझ्वलय् नेपाल रेडक्रस सोसाइटी ख्वप शाखाया सभापति मनोजकुमार थापा, मध्यपुर थिमिनगरपालिका वडा नं. ४ या वडाध्यक्ष कुमार श्रेष्ठ व नेपाल कोरिया मैत्रीनगरपालिका अस्पतालया मेडिकल निर्देशक डा. डि.के. रोशनले भिंतुना न्वचु तयाःदीगु खः ।

ज्याझ्वलय् मेयर श्रेष्ठं आः च्वनाच्वंगु संस्थाया ज्याकु याकनहे थुनान्हूगु याना दयेके त्यनागु जूगुलिं नेपाल रेडक्रस सोसाइटी मध्यपुर थिमि उपशाखाया ज्याकु चायेकेत नगरपालिकापाखें कोथा बहाः पुलाबिगु बचं बियाःदीगु खः। नगरपालिकापाखें जग्गा बिइगु प्रावधान मदुगु जूगुलिं रेडक्रस संस्था जग्गा न्याना छे“ दनेमाल धाःसा नगरपालिकापाखें ग्वाहालि याये धका धयादिगु खः।

थौं येँ महानगरया वडा १६ कार्यालय भवन महानगरया मेयर विद्यासुन्दर शाक्यं शिलान्यास यानादीगु खः।

उगु शिलान्यास ज्याझ्वलय् अमरगढी नगरया मेयर विश्वेश्वरप्रसाद ओझा (विपिन), महानगरया उप मेयर हरिप्रभा खड्गी श्रेष्ठ, १६ वडाध्यक्ष मुकुन्द रिजाल, महानगरया प्रमुख प्रशासकीय अधिकृत राजेश्वर ज्ञवाली व वडा सदस्यपिन्स शिलान्यास पूजा यानादीगु खः। थुगु भवन निर्माणया ई १८ महिना (०७९ फागुन १५) तक खः। भवनया लागत अनुमान १० करोड ३७ लाख ३७ हजार ३१० रुपैयाँ यागु दु।

बोलपत्रया माध्यमं यागु खुल्ला प्रतिस्पर्धापाखे गौरी पार्वती÷के एण्ड के.जी÷रमिता जेभी न ७ करोड ५३ लाख २२ हजार ६४० अर्थात् २९.१६ प्रतिशत कमय् निर्माण कबोल याना जिम्मा कागु खः।

शिलान्यास ज्याझ्वलय् न्ववासे मेयर शाक्यं महानगरया व्यवस्थित सेवा प्रवाहया लागि सुविधा सम्पन्न भौतिक पूर्वाधारया विषय खँ ल्हानादीसे यक्को थे वडा भवन शिलान्यास जुइ धुकुगु दु। शिलान्यास जुगु मध्ये गुलि उलेज्या जुइ धुकुगु दु सा गुलि निर्माण क्वचाइगु ई थ्यने धुकुगु दु। मेयर शाक्यं जिमिसं गुलि वडा भवन निर्माणया लागि कुतः याना च्वनागु न दु। मुद्दा तया ज्या रोके यायेगु प्रवृत्तिं केन्द्रीय कार्यालय निर्माण न ढिला जुगु दु। जिपि निर्वाचित जुइ धुका न्हापागु कार्यपालिकाया बैठकं निर्णय यानागु निर्णय (महानगरया थःगु हे केन्द्रीय कार्यालय व वडा भवन दयकेगु) प्रभावकारी कार्यान्वयन जुयाच्वंगु दु।’ वयकलं कोविड नियन्त्रण, सम्पदा संरक्षण व प्रवर्धन, स्वास्थ्य शिक्षा व रोजगारी नाप आर्थिक व सामाजिक विकासया क्षेत्रय् महानगरं यागु ज्याया बारे चर्चा यानादीगु खः।

उगु ज्याझ्वलय् उपमेयर हरिप्रभा खड्गी श्रेष्ठं, सुविधा सम्पन्न वडापाखे गुणस्तरीय सेवा काये फइ धका धयादीगु खः। स्थानीय शासन चले यायेत जग बल्लाके माः धका धयादीसे झीसं गुलि कार्यालय भवन निर्माण याना महानगरया सेवा व्यवस्थापनया जग मजवुत दयकेगु कुतः यानादीगु दु।

भवनया डिजाइनर सार्वजनिक निर्माण विभागया इञ्जिनियर प्रेमबहादुर श्रेष्ठया कथं बेसमेन्ट नाप भवन १० हजार ७०३ बर्गफुट क्षेत्रफल दु। भवनय् भूमिगत तलाय् झीगः प्यंगः पाङ्ग्रे सवारी पार्किङ् यायेगु क्षमता दु सा खुम्हेसिगु क्षमताया लिफ्ट नाप भवन अपाङ्गमैत्री ज्इ। १ रोपनी ४ आना २ पैसा जग्गाय् निर्माण जुइगु भवन पिनेया भागय् मोटरसाइकल पार्किङ् यायेगु थाय् न दु।

स्वास्थ्य तथा जनसंख्या मन्त्रालयया कथं वंगु २४ घण्टाया दुने स्वनिगलय् थप ७९५ म्हेसित कोरोना सक्रमण जुगु दु।

उकि मध्ये येँ जक ५३५ म्हेसित कोरोना सक्रमण जुगु दु। अथेह, यलय १६४ म्ह व ख्वपय् ९६ म्हेसित संक्रमण पुष्टि जुगु दु।

अथे मेमेगु जिल्ला कास्कीइ २१३, चितवनय् १४३, झापाय् १०३, मोरङय् ९४, मकवानपुरय् ४७, कैलालीइ ४५, सुनसरीइ ४२, रुपन्देहीइ ४०, सुर्खेतय् ३७, दाङय् ३१, नवलपरासी पूर्वय् ३२ म्हेसित कोरोना  संक्रमण जुगु दु।

वंगु २४ घण्टाया दुने देयन्यक थप २,६२४ म्हेसित कोरोना संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ८,६६७ म्हेसित एन्टिजेन परीक्षण यागुलि १,९४७ म्ह व ४,९०६ म्हेसिगु एन्टिजेन परीक्षणय् ६७७ म्ह याना २,६२४ म्हेसित कोरोना संक्रमण पुष्टि जुगु खः।

मन्त्रालयया कथं कोरोना संक्रमणया कारण वंगु २४ घण्टाया दुने थप २० म्ह सीगु दु सा १,३२० म्ह संक्रमणमुक्त जुगु दु। थ्व नाप आःतक नेपालय् कोरोना भाइरस संक्रमितपि ७ लाख ३० हजार ४७९ म्ह थ्यंगु दु।

उकि मध्ये ६ लाख ८० हजार ८१५ म्ह संक्रमणमुक्त जुइ धुकुगु दु सा १० हजार २५९ म्ह सी धुकुगु दु।

 येँ महानगरपालिकाया मेयर विद्यासुन्दर शाक्यं थौं ५१ क्वःगु हिदान यानादीगु दु।

श्री गणेश युवा २१ वडाया ग्वसालय् जुगु थौं हिदान ज्याझ्वलय् मेयर शाक्यं ५१ क्वःगु हिंदान यानादीगु खः । ‘क्लवया स्थापनानिसे मेयर शाक्य हिंदान यानावया च्वंगु खः। मेयर शाक्य थ्व जिगु ५१ क्वःगु हिंदान यानागु खः’ थुगु वडाया स्थानीय वासिन्दा तक जुयादीइम्ह शाक्यं धयादीगु दु, ‘मेपिन्त बचे यायेत हिदान बालागु दान हे हिंदान खः धका धयादीगु खः। अथे जुगुनि जि नियमित रुपं हिंदान याना वयाच्वनागु दु। क्लवं वंगु ०४४ साल निसे हिंदान याना वयाच्वंगु दु।’

कोभिडया इलया इलय् फयाफतले सुरक्षाया दक्को उपाय छ्यला हिंदान यायेत मेयर शाक्यं मेपिन्त न सुझाव बियादीगु दु। ‘सामाजिक दूरी कायम याना सुरक्षित जुया स्वस्थ मनू न हिदान याना मेपिनिगु न ज्यान बचे याये फइ,’ शाक्यं धयादीगु द। उगु हिदान ज्याझ्वलय् छु दिं न्ह्यः जक महानगरपालिका नाप भगिनी सम्वन्ध स्थापित यागु डडेलधुरा अमरगढी नगरपालिकाया मेयर विश्वेश्वरप्रसाद ओझां न मेयर शाक्य नाप हे हिंदान यानादीगु खः।

वयकलं भगिनी सम्वन्ध स्थापित महानगरपालिकाय् वया मेयर शाक्य नाप हे हिदान याये दयक तसकं लयतागु दु धका धयादीगु खः।