नेकपा एमालेया वरिष्ठ नेता माधवकुमार नेपाल समूह न राजनीतिक दलसम्बन्धी अध्यादेश हयेवं न्हुगु दल दर्ता यायेगु तयारी यागु दु।

सरकारं संसदीय दल वा केन्द्रीय समितिं २० प्रतिशत थ्यकलकि दल विभाजन याये फइगु अध्यादेश मंगलबाः हे राष्ट्रपति समक्ष सिफारिश यागु दु।

अय्न राष्ट्रपतिं प्रमाणीकरण याये ल्यनिइ। राष्ट्रपतिं अध्यादेश जारी यातकि न्हुगु दल दर्ता यायेगु तयारी जुयाच्वंगु दु धका नेपाल समूहया छम्ह केन्द्रीय सदस्यं जानकारी बिगु दु। ‘५७ म्ह केन्द्रीय सदस्यपिन्स हस्ताक्षर संकलन जुयाच्वंगु दु। थौं न छम्ह वइ’ वयागु कथं धागु दु,‘अध्यादेश वयेवं दल दर्ता जुइ।’ नेतापिनिगु कथं न्हुगु दलया नां नेकपा एमाले समाजवादी तयेगु तयारी दु।

मेगु नां न विकल्पय् तया छलफल जुयाच्वंगु दु धका छम्ह केन्द्रीय सदस्य धागु दु, नेकपा एमाले समाजवादी हे फाइनल खः।’ न्हुगु दलया अध्यक्षय् माधवकुमार नेपाल हे जुइ मेपि पदाधिकारीबारे छलफल जुगु मदुनि।

नेपाल विद्युत प्राधिकरणया कार्यकारी निर्देशक कुलमान घिसिङयात यागु नियुक्ति खारेज याये माःगु माग यासे निवर्तमान कार्यकारी निर्देशक हितेन्द्रदेव शाक्यं दायर यागु रिट न्यायाधीश कुमार रेग्मीया इजलासय् लागु दु।

प्रधानन्यायाधीश चोलेन्द्र शमसेर जबरां बुधबाः पेशी तोके यायेगु झ्वलय् उगु रिट रेग्मीया इजलासय् तोके यागु खः। रेग्मीया इजलासय् उगु रिट १० नम्बरय् दु। रिटय् शाक्यं थःत गैरकानूनी रुपं प्राधिकरणया कार्यकारी निर्देशक पदपाखे हटे यागु दावी यासे उकियात बदर याना थःत यथावत तयमाःगु माग यागु खः।

शाक्यं प्रधानमन्त्री तथा मन्त्रिपरिषद कार्यालय, ऊर्जा मन्त्रालय, उर्जामन्त्री, नेपाल विद्युत प्राधिकरणया सञ्चालक समिति व कार्यकारी निर्देशक कुलमान घिसिङयात विपक्षी दयका ३२ साउनय् सर्वोच्च अदालतय् रिट दायर यागु खः। सरकारं बिगु जल तथा ऊर्जा आयोगया पूर्णकालीन सदस्यय् नियुक्त शाक्यं उगु नियुक्ति अस्वीकार यासे नेपाल विद्युत प्राधिकरणया कार्यकारी निर्देशक कायम जुइमाःगु दावी यागु खः।

कार्यकारी निर्देशक जूसा आःतक उपकार्यकारी निर्देशक पदपाखे राजीनामा बिगु मदुनि।

नेपाली कांग्रेसया नेता गगन थापां संसद छलेयाना अध्यादेश हःगु गलत खः धका धागु दु। आः सरकारं हःगु अध्यादेश समर्थन याइपिन्स केपी शर्मा ओली नेतृत्वया सरकारं हःगु अध्यादेशया विरोध यासा सार्वजनिक माफी फ्वनेमाः धका धागु दु।

थःगु सामाजिक सन्जालय् थापां च्वंगु दु, ‘संसद अधिवेशन हठासं क्वचायका संसद छलेयाना हःगु अध्यादेश गलत ! म्हिगः गलत, थौं गलत, न्ह्यावलय् गलत, न्ह्याम्हेसिया यासा गलत ।’ अथेहे मेगु च्वंगु दु, ‘म्हिगः ओलीं हःगु यलय् गलत धाःपिन्स, उकिया विरुद्धय् सू यात थौं समर्थन यायेगु हक मदु÷दइ मखु। समर्थन यायेगु खःसा उगु इलय् विरोध यानागुलि सार्वजनिक माफी फ्वनेमाः।’

अथेतु थापां धागु दु ओलीं हःगु इलय अध्यादेशया समर्थन यापिन्स आः अध्यादेशया विरोध यायेगु न हक मदु धका धागु दु।