२४ घण्टाया दुने थप १९२० म्हेसित कोरोना भाइरस संक्रमित पुष्टि जुगु दु।

स्वास्थ्य तथा जनसंख्या मन्त्रालयया कथं ६००० म्हेसिगु पीसीआर परीक्षणय् १३५३ म्ह व ३८३६ म्हेसिगु एन्टिजेन परीक्षणय् ५६७ म्ह याना १९२० म्हेसित संक्रमण पुष्टि जुगु दु।

थ्व नाप आःतक नेपालय् कोरोना सक्रमित जुपि ६ लाख ६५ हजार ७७७ म्ह थ्यंगु दु सा ५ लाख ८४ हजार ३३४ म्ह संक्रमणमुक्त जुगु दु। वंगुु २४ घण्टाय् ३००७ म्ह कोरोना भाइरस संक्रमणमुक्त जुगु दु। अथेहे संक्रमणं ३४ म्ह सीगु दु।

अथेहे आःतक ९००९ म्ह सी धुकुगु दु।

वंगु बुधवाः व बिहीवाः घटे जुगु शेयर बजार थौं आइतवाः २७ अङ्क स्वया अप्वो थहावंगु दु। नेप्से थौं २७ दशमलव ३८ अङ्क थहावन २८७० दशमलव ३८ अङ्क थ्यंगु दु।

थौं धासा हाइड्रोपावर समूहको शेयर ७६ दशमलव १ अङ्क, व्यापारय् ४७ दशमलव २ अङ्क, बैंकिङ समूहय् ३८ दशमलव २६ अङ्क थहावंगु दु।

विकास बैंक समूह शेयर धासा अझ न ६० अङ्कं घटे जुगु दु। २२७ कम्पनीं २ करोड ९ लाख ७४ हजार ३७७ कित्ता शेयरय् ७ अर्ब १६ करोड ७४ लाख रुपैयाँ कारोबार जुगु दु।

थौं नेपाल हाइड्रो पावर कम्पनीइ दकलय् अप्वो ४० करोड रुपैयाँ बराबरया शेयर कारोबार जुगु दु। अथेहे सेन्चुरी कमर्सियल बैंक व माथिल्लो तामाकोशी हाइड्रोपावर कम्पनीया शेयर भाः झन्डै १० प्रतिशत थहावंगु दु।

गोर्खाज फाइनान्स कम्पनीया शेयर भाः झन्डै ४.५ प्रतिशत क्वहावंगु दु।

स्वनिगलय् मेगु छवाः निषेधाज्ञा यायेगु तयारी यायेत्यंगु दु। कोरोना भाइरस सङ्क्रमण छु भचा म्हो जूसा जोखिम अझ न दुगुलि थप छवाः तयेगु तयारी दु धका काठमाण्डौया प्रमुख जिल्ला अधिकारी कालीप्रसाद पराजुलीं जानकारी बिगु दु।

निषेधाज्ञाया बारेय् निर्णय यायेत थौं न्हिनय् स्वंगु हे जिल्लाया प्रमुख जिल्ला अधिकारीपिनगु बैठक च्वनेत्यंगु दु। निषेधाज्ञा थप छ्वासूकेगुलि छलफल जुइ धका काठमाण्डौया प्रमुख जिल्ला अधिकारी पराजुलीं धागु दु।

आः निजी गाडी व ट्याक्सी जोर–बिजोर प्रणाली लागू याना तरकारी व फलफूल पसः सुथय् ११ बजे तक चायकाबिगु खः।

वंगु २४ घण्टाय् स्वनिगलय् थप २४९ म्हेसित संक्रमण पुष्टि जुगु दु।उकि मध्ये न येँ जक १८१ म्हेसित कोरोना सक्रमित जुगु दु।

अथेहे, यलय् ४३ म्ह व ख्वपय् २५ म्हेसित पुष्टि जुगु दु।

अथेहे कास्कीइ १२७म्ह, नुवाकोटय् ११०म्ह, मोरङय् ९९म्ह, झापाय् ६८म्ह, तनहुँइ ५४म्ह, सुर्खेतय् ५०म्ह, चितवनय् ४३म्ह, मकवानपुरय ३६म्ह, सुनसरीइ ३५म्ह, कैलालीइ २८म्ह, नवलपरासी पूर्व व सर्लाहीइ २४÷२४म्ह, काभ्रय् २२म्ह, लमजुङय् १६म्ह, रुपन्देहीइ १४म्हेसित कोरोना संक्रमण पुष्टि जुगु दु।

वंगु २४ घण्टाया दुने थप २०१६ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ४७०४ म्हेहिगु पीसीआर परीक्षणय् ११७४ म्ह व ४८०६ म्हेसिगु एन्टिजेन परीक्षणय् ८४२ म्हेसित संक्रमण पुष्टि जुगु दु थ्व नाप आःतक नेपालय् कोरोना संक्रमितपि ६ लाख ३२ हजार ३२६ म्ह थ्यंगु दु। कोरोना संक्रमणया कारण वंगु २४ घण्टाय् ३० म्ह सीगु दु सा ४९१४ म्ह संक्रमणमुक्त जुगु दु।

थ्व नाप आःतक नेपालय् कोरोना संक्रमणमुक्त जूपि ५ लाख ८१ हजार ३२७ म्ह थ्यंगु दु। अथेहे आःतक कोरोना संक्रमणं ८ हजार ९७५ म्ह सी धुकुगु दु।

अथेहे सक्रिय संक्रमितपि ४२ हजार २४ म्ह थ्यंगु दु। उकि मध्ये ३९ हजार १९९ म्ह होम आइसोलेसनय् व २ हजार ८२५ म्ह संस्थागत आइसोलेसनय् दु। अथेहे ७३४ म्ह आईसीयू व २२२ म्ह भेन्टिलेटर तया वासः याका च्वंगु दु।