येँ वाः वइगु जुइवं येँँ महानगरपालिकां खुँसि बाः वया विपत  जुइपाखे रोकथामया ज्या न्ह्याकूगु दु।

महानगरं जुया बाः वइगु  खँुसिइ न्हापा न यक्को घटनायात स्वया सम्भावित जोखिम पूर्वानुमान याना ज्या न्ह्याकूगु दु।

विपद व्यवस्थापन विभागया प्रमुख रविनमान श्रेष्ठं धयादीगु दु,‘वंगु दँय् न धोवीखोलापाखे अनामनगर क्षेत्र, बल्खुया खुसिइ बल्खुइ, सामाखुशीपाखे खुँसि बाः वया समस्या जुगु खः। आः न थुगु थासय् समस्या मजुइ धका धाये मफु। थुगु पाली न सक्रिय मनसुन सुरु जुगु दु। अथे जुगुलि खुँसि जःखः सावधानी अपने यायेगुु जरुरी दु।’ श्रेष्ठया कथं आः न अनामनगर, सामाखुशी लगायत खुँसिइ सफाइ व पूर्वाधारया माग दु।

प्रकोपया व्यवस्थापनया लागि छगः लोडर, लः सालेगु सक्सन गाडी व पम्प, त्रिपाल, स्वाने, खिपः लगायतया सामाग्रीया व्यवस्था याना तयगु दु धका धयादीगु दु।

जोशी समाजया केन्द्रीय अध्यक्ष सुवर्ण राम जोशी ८१ दँया बैशय् मन्त।

वय्कः म्हिगः थःगु हे छेँय् ढोलाहितिइ हर्ट आट्याक जुया मदुगु धका ललितपुर उद्योग वाणिज्य संघया पूर्व अध्यक्ष अजरमान जोशीं धयादिगु दु।

ललितपुर उद्योग वाणिज्य संघया संस्थापक सचिव, ललितपुर बुद्धिचाल संघया निवर्तमान अध्यक्ष, नेपाल मुद्रा संकलक संघया पूर्व अध्यक्ष नं वय्कः जुयादिइ धुकुगु खः।

कोभिड १९ विरुद्धया भेरोसेल खोपया न्हापांगु डोज कायेधुंकुपिन्त थ्वहे असार २२ गतेनिसें निगूगु डोज बिइगु जूगु दु ।

जेठ २५ निसें २९ तक्क देय्या ६०दँ निसें ६४दँया नागरिकपिन्त न्हापांगु मात्राया खोप बिउगु खः । स्वास्थ्य सेवा विभागं असार २२ निसें निगूगु खोप बिइगु न्ह्यथंगु खः ।

खोप शाखा प्रमुख डा. झलक शर्मा गौतमं न्हापांगु डोज काःपिं स्वंगु लखः ७०द्वः नागरिकपिन्त असार २२ निसें बिइगु जानकारी बियादिल । अघिल्लो खोप अभियानय् भेरोसेल खोपया न्हापांगु डोज काःपिं व निगूगु मात्रा कायेत छुट जूपिन्सं नं उगु ईलय् निगूगु डोज काय्फइगु जुई । लिपांगु ईलय् ६०६४दँया ज्याथजिथिपिन्सं भेरोसेल खोपया न्हापांगु मात्रा काःगु खः।

६गू लख ६२द्वः व ३६७म्ह ज्याथजिथिपिन्त भेरोसेल खोपया न्हापांगु मात्रा बिइगु हाथ्या दुगुलिइ ३गू लख ७०द्वः व ३९५म्ह ज्याथजिथिपिन्सं जक भेरोसेल खोपया न्हापांगु मात्रा काःगु दु ।

“लागू औषधरहित परिवार स्वस्थ जीवनया आधार” धैगु राष्ट्रिय नारा लिसें थौं नेपालय् नं लागू औषध दुरुपयोग लिसें अवैध ओसारपसार विरुद्धया अन्तर्राष्ट्रिय दिवस हनाच्वंगु दु ।

दँयदसँ जुन २६ तारिखया दिंयात अन्तर्राष्ट्रिय लागू औषध दुरुपयोग तथा अवैध ओसार पसार विरुद्धयो दिवसया कथं हनेगु निणर्य संयुक्त राष्ट्र संघया सन् १९८७ या घोषणापत्रय् न्ह्यथनातःगु दु ।

दिवसया आज्जु हलिंया हे समुदाययात लागू औषधया लिच्वः व कारोबारपाखें मुक्त यायेगु संयुक्त राष्ट्रसंघं न्ह्यथंगु दु । नेपाल लागू औषध प्रयोगकर्ता सर्वेक्षण २०७६ कथं नेपालय् लागू औषध छ्यलिपिं दँय् ५गू प्रतिशत सिबें अप्वः थहाँवनाच्वंगु दु ।

थुकिया दुरुपयोग व अवैध ओसारपसारं सामाजिक अपराध अप्वेकिगु लिसें समाजय् नकारात्मक लिच्वः लाका च्वंगु दु । हलिमय् हे लागू औषध सेवन याइपिं ल्याम्हल्यासेपिनिगु अप्वःया वंगु तःधंगु हे च्यूताया विषय जूगु विश्व स्वास्थ्य संगठनं न्ह्यथंगु दु ।

कोभिड १९ या महामारीपाखें प्रभावित परिवारया नितिं ग्वाहालिया तातुनां आनन्दकुटी विद्यापीठं निःशुल्क ब्वंकेगु क्वछ्यूगु दु ।

आर्थिक सामाजिक रुपं हाथ्या अप्वयाच्वंगु थौंया अवस्थाय् अभिभावकपिन्त अःपुइमा, ब्वमिपिं नं गुणस्तरीय शिक्षां बञ्चित मजुइमा धकाः थुगु ब्यवस्था यानागु विद्यापीठं धाःगु दु । गुणस्तरीय शिक्षाय् प्रतिवद्ध विद्यापीठं थुगु क्वःछिनाकथं कक्षा १ निसें ९ तक १२० म्ह ब्वनामिपिं भर्ना कायेगु ग्वसाः ग्वःगु दु । थुगु ब्यवस्थाकथं भर्ना शूल्क १०० तका पूसा गाःगु व मासिक शुल्क धाःसा निःशुल्क जुइ । कोभिड–१९ या प्रभावया हुनिं विद्यापीठं थौंकन्हे धाःसा अनलाईन माध्यमं ब्वंकेगु ज्या यानाः वयाच्वंगु दु ।

तःकूगु क्षेत्र, खुल्ला म्हितेगु ख्यः व माःकथया सकतां पूर्वाधार दुगु विद्यापीठ गुँ दथुइ दु । स्वच्छ व न्ह्याइपुगु लकस दुगु थुगु विद्यापीठ ब्वनामिपिनि भौतिक, बौद्धिक व आध्यात्मिक विकासय् तिबः जुयाच्वंगु दु । ७० गू दशकनिसें शिक्षाया जः ह्वलाः वयाच्वंगु थुगु विद्यापीठ विश्व सम्पदा स्वयम्भू महाचैत्य लिक्क लाः ।  

अमृतानन्द महास्थवीरं २००८ सालय् बुद्ध शिक्षा बीगु तातुनां पलिस्था यानादीगु आनन्दकुटी विद्यापीठं कोभिड १९ या महामारीया निगूगु लहरय् ५० शैयाया आइशोलेशन सेन्टर नं न्ह्याकूगु खः ।