अर्थतन्त्रया लिपागु इलयागु अवस्थाया यथार्थ चित्र खनेदइ कथं सरकारं श्वेतपत्र हयेत्यंगु दु।

अर्थमन्त्री जनार्दन शर्मां मंगलबाः व्यवस्थापिका संसदय् देशया आर्थिक अवस्थाया बारेय् जानकारी यायेत्यंगु धका संसद सचिवालय स्रोतं धागु दु।

स्रोत कथं मन्त्री नियुक्त जुइवं हे पत्रकार सम्मेलनय् श्वेतपत्र हयेगु घोषणा यागु खः। देशया वर्तमान आर्थिक व वित्तीय अवस्था गज्यागु दु धइगु जानकारी बिइत श्वेतपत्र जारी यायेत्यंगु खः।

थुकिया लागि अर्थ मन्त्रालयं करिब स्ववानिसे तयारी यानाच्वंगु खः। देशया आर्थिक सूचकांकपिन्त गथे खः अथे खने दइगु कथं ‘वर्तमान आर्थिक अवस्थाया यथार्थपत्र’ जारी यायेत्यःगु धका अर्थ मन्त्रालय स्रोतं धागु दु।

प्रमुख प्रतिपक्षी दल नेकपा (एमाले) या अध्यक्ष केपी शर्मा ओलीं थौं संसदय् सम्बोधन याइगु जुगु दु।

प्रतिनिधिसभा पुनःस्र्थापना लिपा अध्यक्ष ओली संसदय् न्ववागु मदुनि। साउन ३ गते प्रधानमन्त्री शेरबहादुर देउवां विश्वासया मत कागु इलय् एमालेपाखे प्रदीप ज्ञवालीं न्ववागु खः।

तर अथौं ओलीं सम्बोधन याइगु कार्यसूचीइ दु। प्रतिनिधिसभा बैठक न्हिनसिया १ बजे च्वनेत्यंगु खः।

येँ महानगरपालिकाया मेयर विद्यासुन्दर शाक्यं ‘नेपाल मास्क अभियानं’ धरहराया महत्व थकाःगु धयादीगु दु। वडा नम्बर–५ या नरलय् नरबुद्धपार्कया शिलान्यास यायेगु ज्याझ्वलय् थःगु नँुगः तयेगु झ्वलय मेयर शाक्यं धरहरां सरकारं मास्क अभियान न्ह्याकूगु खँ न्ह्यथँसें थःथे धयादीगु खः।

मास्क अभियानया कारणं धरहराया महत्व मुक्कं देयन्यक व विदेशीतयसं नं सीकेखंगु मेयर शाक्यया धापू खः। ‘धरहरा जिमिगु कार्यकालय् दयेकेगु धकाः धयागु खः, गुुगु आः दयेके सिधल, पार्किङलिसेंया ज्या ल्यं दनि’ मेयर शाक्यं धयादिल । सरकारं ‘महामारी नियन्त्रण व रोकथामय् जिगु प्रतिबद्धता, मास्क तयेगु हे थौंया आवश्यकता’ धइगु मूल नारालिसें शनिबाः सनिलय् धरहराय् ‘जि जिम्मवार नागरिक’ ह्यासट्याग च्वयाः अभियानया प्रचार न्ह्याकूगु खः ।

पार्क शिलान्यास ज्याझ्वलय् खँ तयेगु झ्वलय् मेयर शाक्यं महानगरपालिकां सार्वजनिक जग्गाय् पार्क दयेकेगु ज्यायात अभियानया रुपय् न्ह्याकातयागु धयादिल । वयकलं कमलपोखरी पुननिर्माणया ज्या नं लिपांगु झ्वलय् थ्यंगु जानकारी बियादिल । कमलपोखरी पुनर्निर्माण जुइधुंकाः रानीपुखू स्वयां बांलाइगु दावी नं वयकलं यानादिल।

छुं दिं न्ह्यः बालाजु औद्योगिक क्षेत्रय् नेविको बिस्कुट कारखानाय् च्याःगु मि स्यायेत हेलिकोप्टरं रानीपुखूया लः छ्यःगु लुमंकुसें शाक्यं शहरया दथुइ थज्याःगु पुखूया महत्व थप थकाःगु धयादिल ।

नेकपा एमालेया महाधिवेशनं अध्यक्ष व केन्द्रीय सदस्यपि जक ल्यइगु कथं विधान संशोधन प्रस्ताव यायेगु प्रस्ताव न्ह्यने हःगु दु।

उकिइ १३ म्ह पदाधिकारी दइगु जुसा स्थायी कमिटी खारेज याना सचिवालय, पोलिटब्यूरो व केन्द्रीय कमिटी दइ। थौं सोमबाः तुलसीलाल स्मृति प्रतिष्ठान, च्यासलय् च्वंगु अध्यक्ष केपी शर्मा ओली पक्षीय नेतापि जक दुथ्यागु केन्द्रीय कमिटी बैठकं विधान संशोधन प्रस्ताव क्वयागु कमिटी तक छलफलय् यकेगु व वइगु विधान महाधिवेशनय् यकेगु निर्णय तक यागु दु।

प्रवक्ता प्रदीप ज्ञवालीया कथं प्रस्तावित विधानय् अध्यक्ष, निम्ह उपाध्यक्ष, छम्ह महासचिव, निम्ह उपमहासचिव व ७ म्ह सचिव जुइगु उल्लेख यागु दु। उकि मध्ये अध्यक्ष महाधिवेशनपाखे निर्वाचित जुुइसा मेपि केन्द्रीय कमिटीं ल्यइगु व्यवस्था यागु दु। आः अध्यक्ष, न्याम्ह उपाध्यक्ष, छम्ह महासचिव, निम्ह उपमहासचिव, न्याम्ह सचिव दइगु व्यवस्था दुगु खःसा दक्को महाधिवेशनपाखे निर्वाचित जुइगु व्यवस्था दु।

अथेहे स्थायी कमिटी खारेज यायेगु, पोलिटब्यूरो व २२५ म्ह सदस्यीय केन्द्रीय कमिटी दयकेगु प्रस्तावित विधानय् उल्लेख दु । प्रदेश, जिल्ला व स्थायी तहया कमिटीइ अध्यक्ष, उपाध्यक्ष सचिव व निम्ह सहसचिव दइ। दक्को कमिटीइ अध्यक्ष व कमिटी अधिवेशनपाखे ल्यइ।

नेकपा एमालें विधान महाधिवेशनया लागि थीथी प्यंगु समिति गठन यायेगु प्रस्ताव यागु दु।

सोमबाः च्वंगु केन्द्रीय कमिटीया बैठकं भदौ २७ व २८ गते जुइगु विधान अधिवेशनया लागि प्यंगु समिति प्रस्ताव यागु दु। उकिइ राजनीतिक प्रतिवेदन मस्यौदा समितिया संयोजकय् अध्यक्ष केपी शर्मा ओली व सदस्यपि वामदेव गौतम, रामबहादुर थापा (बादल), प्रदीप ज्ञवाली, छविलाल विश्वकर्मा, सत्यनारायण मण्डल, विष्णु रिमाल व  विन्दा पाण्डेपि दुथ्यागु दु।

अथेहे संगठनात्मक प्रतिवेदन मस्यौदा समिति संयोजकय् महासचिव ईश्वर पोखरेल व सदस्यपि विष्णु पौडेल, टोपबहादुर रायमाझी, शंकर पोखरेल, किरण गुरुङ व पद्मा अर्यालपि च्वंगु दु।

विधान संशोधन मस्यौदा समिति संयोजकय् विष्णु पौडेल व सदस्यपि सुवास नेम्वाङ, पृथ्वीसुब्बा गुरुङ, लेखराज भट्ट, रघुवीर महासेठ, राधा ज्ञवाली, भानुभक्त ढकाल व प्रभु साह च्वंगु दु।

व्यवस्थापन समिति संयोजकय् रामबहादुर थापा (बादल) व सदस्यपि मणि थापा, शेरबहादुर तामाङ, सुजिता शाक्य, विनोद श्रेष्ठ, खिमलाल भट्टराई, महेश बस्नेत व पासाङ शेर्पापि च्वंगु दु।