राष्ट्रिय जनमोर्चाया गण्डकी प्रदेशसभा सदस्य कृष्ण थापां न्हुगु सरकार गठनया लागि कांग्रेस–माओवादी–जसपा गठबन्धनयात साथ मबिगु जुगु दु ।

वैशाख २६ गते पृथ्वी सुब्बा गुरुङं राजीनामा बिइ धुका प्रदेश प्रमुख सीता पौडेलं बहुमतया सरकार गठनया लागि दलपिन्त स्वन्हुया ई बिगु खः ।

कृष्णचन्द्र नेपाली पोखरेलया नेतृत्वय् न्हुगु सरकार गठनया कुतलय् नेपाली कांग्रेस, माओवादी केन्द्र व जनता समाजवादी पार्टीया नेतापि ३१म्ह प्रदेशसभा सदस्यपिनिगु ल्हाचिं ज्वना प्रदेश प्रमुखयात बुझे यागु खः ।

कांग्रेसया १५म्ह, माओवादीया १२ म्ह व जसपाया निम्ह सांसदपि दु । बहुमतया लागि राष्ट्रिय जनमोर्चाया स्वम्ह प्रदेशसभा सदस्यपिनिगु ल्हाचिं माः ।

राष्ट्रिय जनमोर्चाया केन्द्रीय समिति न्हुगु सरकार गठनया पक्षय्  सचेतक पियारी थापां ह्वीप जारी यागु खः । तर प्रदेशसभा संसदीय दलया नेता तक जुयादीम्ह थापां हस्ताक्षर यायेत अस्वीकार यागु दु। 

नेपालभाषा एकेडेमिया ग्वसालय् मदुपिं न्याम्ह प्राज्ञया दुर्गति परिशोधन या कामना यासे जुमपाखे विचाः हायेकुगु दु ।

सोमबार जुम एपपाखें  संस्थाया पुलांम्ह भाइस चान्सलर बाखं च्वमि लक्ष्मण राजवंशी, संस्थापक पुलांम्ह सदस्य सचिव नेपालभाषाया वरिष्ठ समालोचक शब्द कोशकार इन्द्र माली, वरिष्ठ प्राज्ञ वरिष्ठ साहित्यकार रमापति राज शर्मा, प्राज्ञ वरिष्ठ सरोद वादक मोहनसुन्दर श्रेष्ठ, प्राज्ञ गोल्डेन भ्वाइस अफ नेपाल प्रेमध्वज प्रधानपिनिगु बिचाः हायेका मुँज्या जूगु खः ।

उगु विचाः मुँज्या ज्याझ्वलय् कोरोना संक्रमणया जोखिम अप्वया च्वंगु थ्व ई या कारणं थ्व ईलय् संसार त्वता वंपिन्त प्रत्यक्ष श्रद्धान्जलि प्वंके मखंसां वयक पिनिगु सुगतिया कामना यासे जुमपाखें विचाः हायकेगु ज्याझ्वः जुउगु खःसा उगु ज्याझ्वलय् एकेडेमीया दाँभरीं वरिष्ठ साहित्यकार डा पुष्पराज राजकर्णिकार भाजुं मदयावंपिनिगु सुगतिया कामना यासे थःगु खँ तयादीगु खः ।

ज्याझ्वलय् साहित्यकार एवं सन्चारकःमि मीना बज्राचार्यं सरोद वादनय् ज्वमदुगु योगदान दुम्ह मोहन सुन्दर श्रेष्ठया कला या जः नेपाःया संगीतख्यलय् सदां दया च्वनि धया दिलसा एकेडेमीया प्राज्ञ दुजः पत्रकार विजयरत्न असंबरें नेपाःया गोल्डेन भ्वाइस धयातःम्ह म्येहालामि संगीतकःमि प्रेमध्वज प्रधानयात नेपाःया संगीतख्यलय् सुनां हुइमफइगु त्वता वंम्ह संगीतज्ञ खःधका धासे मदुम्ह म्येहालामि प्रधानया गुन स्मरण याना दिल ।

अथेतु, नेवाः हाइकु ख्यःया नायः सुरेश प्रधानं मदुम्ह इन्द्र मालि   नेपाःया हाइकु ख्यलय् ज्वमदुगु ज्या याना वंम्ह साहित्यह्यःमि खःधका धासे वयक मत्यवं मदुबले साहित्यख्यलय् तधंगु घाः लात धका धया दिल । उगु जुमपाखें जुउगु विचाः हायेका ज्याझ्वलय् बाखं दबू या छम्ह संस्थापक साहित्यकार राजा शाक्यं मदुम्ह बाखं च्वमि व शिक्षासेवी राजवंशी दकले अप्वःल्या बाखं च्वयादीम्ह बाखं च्वमि खः धका धासे नेवाः बाखं ख्यःया बिकासय् निरन्तर लगेजुया दीम्ह साहित्यसेवी खः धका धयादिलसा बाखं दबुया स्थापना थेंज्यागु बाँलागु ज्या यानादीम्ह साहित्यह्यःमि खः धका कनादिल ।

उगु ज्याझ्वलय् साहित्य इतिहासकार व एकेडेमीया प्राज्ञ दुजः प्रा. प्रेमशान्ति तुलाधरं मदुम्ह साहित्यसेवी राजवंशीया जीवनी धाइगु छगु प्रेरणा या स्रोत खः धका धासे वयकया जीवनीया थीथी पक्षयात कुला दिलसा नेपाल साहित्य मन्दिरया नायः वरिष्ठ साहित्यकार तिलकप्रकाश कायस्थं मदुम्ह साहित्यविद् रमापति राज शर्मां नेपालभाषाया ख्यलय् तसकं दुग्यंगु कृति पिकाना भाषा ख्यःयात तःमि यानादीगु खँ न्ह्यथंसे नेपाल साहित्य मन्दिरया स्थापनाय् वयकया तधंगु ल्हादुगु खँ न्ह्यथना दिल । नेपालभाषा एकेडेमीया  भाइस चान्सलर भाजु यज्ञ रत्न धाख्वाःया नायःसुइ जुउगु उगु विचाः मुँज्या एकेडेमीया प्राज्ञ दुजः त्रिरत्न शाक्यं न्ह्याकादीगु खःसा उगु ज्याझ्वःया संयोजन शान्तराज शाक्यं यानादीगु खः ।

लुम्बिनी प्रादेशिक अस्पतालया इमर्जेन्सीइ उपचार याना च्वपि थप १२ म्ह कोरोना संक्रमितपि सी धुकुगु दु ।

सीपि न्ह्यम्ह रुपन्देहीइ च्वपि, स्वम्ह कपिलवस्तुयापि वा नवलपरासी पश्चिम व प्युठानय् च्वपि छम्ह छम्ह खः। १२ म्ह मध्ये ११ म्ह मिजम्ह व छम्ह मिसाम्ह खः ।

उकि मध्ये न्याम्ह वंगु चान्ह्य १२ बजे सुथय्, प्यम्ह सोमवाः ४ः३० बजे व लिपा १२ बजे तक खः, निम्ह २६ गते व छम्ह २४ गते न्हिनय् मदुगु खः धका अस्पतालया सूचना अधिकारीं जानकारी बिगु दु ।

२४ गते व २६ गते सीपि संक्रमितपिनिगु शब व्यवस्थापन मजुगुलि मंगलवाः जक जानकारी बिगु दु ।चौलागा औसी ११४१,बैसाख २८ बुधवाः