प्रधानमन्त्री केपी शर्मा ओलीं रोजगारी व निर्यात वृद्धिइ योगदान बिइगु हस्तकला ख्यलय् सरकारया न्ह्याबलें प्राथमिकता दइ धकाः धयादीगु दु।

नेपाल हस्तकला महासङ्घया ४४ क्वःगु वार्षिक साधारणसभाया उलेज्या समारोहयात संबोधन यानादिसें प्रधानमन्त्री ओलीं मुलुकय् रोजगारी, उत्पादन, उद्यमशीलता, आत्मविश्वास व निर्यात अप्वकेगु ख्यः जुगुलिं थुकिया निंतिं सरकारं यायेमाःगु ज्याया निंतिं थःपिंसं फक्व कुतः यायेगु भलसा बियादिल।

प्रधानमन्त्री ओलीं कला व तजिलजिइ नेपाः तःमि जुगुलिं हस्तकला ख्यः गबलें तनीमखु धयादिसें बजाःया सामान स्वयां थःम्हेसिनं हे मेहनत यानाः दयेकूगु खाना व सामान अप्वः छ्यलेत इनाप यानादिल। “झीगु देय् कलाया निंतिं नांजाः । थनया कला अमूल्य जू । थुकिइ झीगु दृष्टिकोण व कला दुथ्यानाच्वनी”, प्रधानमन्त्री ओलीं धयादिल, “हस्तकलां मिसातय्त रोजगारी व सीप विकासया नापनापं सामाजिक उत्थानय् नं ग्वाहालि यानाच्वंगु दु।

थुगु ख्यलं उत्पादित सामान निर्यात यायेगु कुतः याये, जिं थुकिया थी थी विधाया विकास यायेत छु यायेमाः धइगु बारे महासङ्घयात सःताः सहलह याये। उकिया लिधंसाय् झीसं मेगु ज्या यायेगु जुइ।” महासङ्घया नायः प्रचण्ड शाक्यं सरकारं सार्वजनिक निकायतय्के स्वदेशी सामान छ्यलेगु अनिवार्य यायेगु सम्बन्धी निर्देशिका पिथंगुलिं लसकुस यानादिसें उकियात प्रभावकारीकथं छ्यला बुलाय् हयेमाःगुलिइ बः बियादिल।

वय्कलं निर्यात वृद्धि व सहजीकरणया निंतिं थी थी बुँदाय् प्रधानमन्त्री ओलीया ध्यानाकर्षण यानादिल। हस्तकला ख्यलं प्रत्यक्ष व अप्रत्यक्ष कथं ११ लख रोजगारी सृजना याःगु दु धाःसा थुकिं थ्यं मथ्यं ११ अर्ब बराबरया सामान निकासी जुयाच्वंगु धयातःगु दु। ज्याझ्वलय् च्वन्ह्याःम्ह निर्यातकर्ता व योगदानकर्तायात सम्मान नं याःगु खः।

प्रेस चौतारी नेपालं ३२ म्ह पत्रकार तय्त केन्द्रीय दुजलय् मनोनीत यायेगु नापं झिक्वःगु महाधिवेशन वइगु फागुन २५ निसें २७ गतेतक विराटनगरय् ग्वसाः ग्वयेगु निर्णय याःगु दु।

मनोनीत जुयादीपिं केन्द्रीय दुजःपि ईश्वरी काफ्ले, रामकृष्ण ज्ञवाली, प्रकाश सिलवाल, शन्तराम विडारी, डिल्ली आचार्य, खगेन्द्र अधिकारी, दिलबहादुर छन्त्याल, तिलक रिमाल, वसन्ती बास्तोला, भवानी कार्की, सतिदेवी उप्रेती, श्यामकृष्ण दाहाल, गणेश ज्ञवाली, उर्वसी बस्नेत, सङ्गीता आचार्य, कमला पन्थी, कालिका शिवाकोटी, श्रीधर पौडेल, लक्ष्मण तिवारी, सम्झना वन, काशी रिजाल, शङ्कर पाण्डे, भोजराज विश्वकर्मा, मालती केसी, सुनिता महतो, चिवच्छ चौधरी, सम्झना गौतम, धर्मेन्द्र दाहाल, अप्सरा गौतम, पार्वता चौधरी, नरेश शाही व सलिम मियाँ खः।महाधिवेशन सुथां लाक्क क्वचायेकेत नायः गणेश बस्नेतया नेतृत्वय् मूल व्यवस्थापन समिति गठन जुगु दु।

चौतारीया आः नकतिनि धयाथें जुगु मुँज्यां सङ्गठनया जिल्ला अधिवेशन वइगु माघ २५ गते दुने व प्रदेश अधिवेशन फागुन ७ गते दुने सिधयेकेगु निर्णय जुगु चौतारीं धाःगु दु।

मुँज्यां सङ्गठनया स्थापना दिवस कुन्हु लःल्हाना वयाच्वंगु हृदयचन्द्रसिंह प्रधान व अग्निशिखा स्मृति पत्रकारिता सिरपाःलिसें फुक्क पुरस्कार सिफारिस यायेत वरिष्ठ पत्रकार गोविन्द पोखरेलया कजिसुइ न्याम्ह दुजःया सिफारिस समिति गठन याःगु दु।

मिसा पत्रकार तय्त बिइगु कथं थुगु दँय् नीस्वंगु प्रेस चौतारी राष्ट्रिय मिसा पत्रकारिता सिरपाः सिफारिस यायेत मुँज्यां सङ्गठनया न्वकू देवीका घर्तीमगरया कजिसुइ स्वम्ह दुजःया समिति नं गठन याःगु दु।

थपेयात सरकारं सशस्त्र प्रहरी नायब महानिरीक्षक कमल गिरी, गणेशबहादुर ठाडामगर, कुलबहादुर नेम्वाङ व शम्भु सुवेदीया पदावधि दच्छि थपे यायेगु निर्णय याःगु दु।थ्व हे पुस २३ गते जुगु मन्त्रिपरिषद् मुँज्याया निर्णय थौं सार्वजनिक यानादिसें सुचना व सञ्चार प्रविधिमन्त्री नापं सरकारका प्रवक्ता पृथ्वीसुब्बा गुरुङं उगु खँ कनादीगु खः।

मुँज्यां सहसचिव विष्णुप्रसाद शर्मायात विशिष्ट संरचना सञ्चालन नापं व्यवस्थापन विकास समितिया कार्यकारी निर्देशक कथं ज्या यायेगु यानाः काजय् छ्वयेगु निर्णय याःगु दु। मुँज्यां वइगु माघ २८ निसें ३० गतेतक फिलिपिन्सया मनिलाय् सञ्चालन जुइगु ‘वर्कसप अन इनह्यान्सिङ एसएआई–सिएसओ इन्गेजमेन्ट इन द एएसओएसएआई रिजन’ ज्याझ्वलय् ब्वति कायेत उपमहालेखापरीक्षक वामदेव शर्मा अधिकारीयात स्वीकृति बिइ धुंकूगु धयादिल।

मन्त्री गुरुङं मन्त्रिपरिषदं वइगु फागुन १२ निसें १५ गतेतक इटालीया रोमय् जुइत्यंगु जलवायु ह्यूपाःलिसे सम्बन्धित ज्याझ्वलय् ब्वति कायेत वन नापं वातावरण राज्यमन्त्रीयात स्वीकृति बिइ धुंकूगु खँ नं कनादीगु दु।

झापाय् नेपाल–भारत अन्तर्राष्ट्रिय सीमास्तम्भ मर्मतया ज्या न्ह्याकूगु दु।

नेपाल–भारत ‘बाउन्ड्री वर्किङ ग्रुप’या निर्णयकथं नेपाःपाखें यायेमाःगु बिजोर ल्याःया सीमा स्तम्भ  मर्मत यानाहःगु सशस्त्र प्रहरी बल नेपाल ल्याः २ गण, झापाया गणपति सशस्त्र प्रहरी उपरीक्षक कविन्द्र राईं धयादीगु दु।

मेचीनगर नगरपालिका–१५ सिसुवाडाँगीइ च्वंगु चीधंगु सीमास्तम्भ ल्याः ९५÷१२ पाखें मर्मत सम्भारया ज्या न्ह्याकूगु वय्कलं धयादिल। झापाय् भारतलिसे नेपाःया सीमा स्वाःगु १४४.२ किलोमिटर लागाय् च्वंगु सच्छि व न्हय्गू सीमा स्तम्भ मर्मत सम्भार जुइ।

सशस्त्र प्रहरीलिसें जिल्ला प्रशासन ज्याकुथि, नापी विभाग, स्थानीय जनप्रतिनिधि, भारतीय सीमा सुरक्षा बल (एसएसबी), स्थानीयबासीतय्सं ब्वति कयाः सीमा स्तम्भया मर्मत न्ह्याकूगु खः।सीमा लागाय् च्वंगु सीमा स्तम्भ मध्ये सन् २०१४ लिपा निर्माण जुगु बिजोर ल्याःया सीमास्तम्भ सशस्त्र प्रहरी बल नेपालं व जोर ल्याःया स्तम्भ भारतीय सीमा सुरक्षा बलं मर्मतसम्भार यायेगु निर्णय कथं वंगु दँय् निसें निखेरंया सीमास्तम्भत मर्मत ज्या जुयावया च्वंगु खः।

वइगु माघ १ गते निसे राष्ट्रिय परिचयपत्रया आधारय् न बैङ्क व वित्तीय संस्थाय् खाता चाय्के फइगु जुगु दु।

थ्व स्वया न्ह्यः बैङ्क खाता चाय्केगु निति नागरिकता अनिवार्य माःगु खःसा आः राष्ट्रिय परिचयपत्र वा उकिया आधारय् न खाता चायेके फइगु जुगु दु। नेपाल राष्ट्र बैङ्कं राष्ट्रिय परिचयपत्र व उकिया नम्बर याःगु आधारय् खाता चायेकेत बैङ्क नाप वित्तीय संस्था, पूर्वाधार विकास बैंक व लघुवित्त वित्तीय संस्थायात परिपत्र जारी याये धुकुगु दुु।

राष्ट्र बैङ्कया सहायक सूचना अधिकारी डा.भागवत आचार्यया कथं बैङ्क खाता चायेकेत राष्ट्रिय परिचयपत्र अनिवार्य मखु, आधिकारिकता बिउगु खः।