प्रधानमन्त्री केपी शर्मा ओलीें सरकारय् दुथ्यापि प्रमुख दलया शीर्ष नेता, विज्ञ व सरोकार दथुइ च्वपिनाप सहलह याये धुका सुशासन व विकास यायेगु निति थीथी अध्यादेश हइगु धका धयादीगु खः।

नेपाः सरकारया सिफारिसय् राष्ट्रपतिपाखे जारी याःगु अध्यादेशया सम्बन्धय् प्रधानमन्त्री लिसे मन्त्रिपरिषदया कार्यालय, सिंहदरबारय् छगु पत्रकार सम्मेलन याना प्रधानमन्त्री ओलीं जारी याये हे माःगु तसक साबधानी व मेहनतं अध्यादेश सिफारिस जुगु खः।

“जिपि सरकार टिके यायगु ज्या जक मखु, सरकार थः हे टिके जुइ। थुकियात ताः लाकेगु व लिच्वः बिइगु मू जिम्मेवारी खः।”, प्रधानमन्त्री ओलीं धयादीगु दु, “थुगु अध्यादेशं सरकारया सुशासन व विकासया प्रतिबद्धता ज्वलन्त कथं खनेदुगु दु। थ्व पू वंगु सहमतिइ अध्यादेश वःगु खः। अध्यादेश राष्ट्रपतिपाखे रोके याःगु हल्ला यात। भूमिसम्बन्धी अध्यादेश अध्ययनया झ्वलय् जक खः, दिकूगु मदु। अध्यादेशया विरोध जुल धका नेपाली काँग्रेसया सभापति शेरबहादुर देउवाबारे नक्कली विज्ञप्ति पिहावल। थ्व दक्को भ्रमयात चिइकूगु दु । सरकार क्वधलं धका तधःगु खुसिइ सिथय् च्वना अप्पां कयेकिइगु जक कुतः खः।”

नेपाल आयल निगम लिमिटेडं पेट्रोल, डिजेल व मचिकंया भाः थकाउगु दु।

निगमया कथं पेट्रोल लिटरं नितका व डिजेल व मचिकं लिटरं स्वतका थकाउगु दु। इन्डियन आयल कर्पोरेसनं थौ पेट्रोलियम पदार्थय् न्हुगु भाः कथं पेट्रोलय् २ रुपैयाँ २४ पैसा व डिजेलय् ३ रुपैयाँ ५५ पैसा थकाउगु दु धका निगमं धाःगु दु।

निगम सञ्चालक समितिया निर्णया कथं पेट्रोल, डिजेल व मचिकंया भाः थौ चान्ह्यः १२ बजे निसे लागु जुइ धका धाःगु दु।

राष्ट्रपति रामचन्द्र पौडेल स्वम्हेसित गैरआवासीय राजदूत पदय् नियुक्त याःगु दु।

नेपाःया संविधान याःगु धारा २८२ या उपधार १ बमोजिम राष्ट्रपति पौडेलं भरतराज पौडेलयात गणतन्त्र क्यूवा, धनबहादुर ओलयात भियतनाम व निर्मल राज काफ्लेयात भेनेजुएलाय् गैरआवासीय राजदूत नियुक्त यागु दु धका राष्ट्रपति कार्यालयं धाःगु दु।

क्यानाडाया निति भरतराज पोखरेल, थाइल्याण्डया निति धनराज ओली व ब्राजिलया निति निर्मलराज काफ्लेयात आवासीय राजदूत याःगु खः।

राष्ट्रपति रामचन्द्र पौडेलं भूमिसम्बन्धी अध्यादेश जारी याःगु दु। मन्त्रिपरिषदया सिफारिसय् राष्ट्रपति पौडेलं बुधवाः भूमि सम्बन्धी छु नेपाल ऐनयात संशोधन याना अध्यादेश, २०८१ जारी याःगु दु।

मन्त्रिपरिषदं न्यागु अध्यादेश जारी यायेगु निति सिफारिस याःगु खः। उगु न्यागु मध्ये थ्व स्वया न्ह्यः प्यंगू अध्यादेश जारी याये धुकुगु दु।

ल्यः दुगु भूमिसम्बन्धी अध्यादेश राष्ट्रपति पौडेलं थौ बुधवाः जारी याःगु दु। प्रधानमन्त्री कार्यालय स्रोतया कथं भूमि सम्बन्धी अध्यादेशय् भूमि सम्बन्धी ऐन २०२१, वन ऐन २०७६ व मालपोत ऐन २०७६ संशोधनया प्रस्ताव याःगु खः।

नेपाल आदिवासी जनजाति महासङ्घया नायः गेल्जे लामा शेर्पां आदिवासी जनजातिं थःगु म्हसीका बचे यायेत मां भाय् संरक्षणय् बः बिइमाःगु धयादीगु दु।

नेपाल मगर सङ्घं मगर समुदायया प्रमुख सांस्कृतिक नखः माघे सकरातीया झ्वलय् ग्वसाः ग्वःगु समारोहय् नायः शेर्पां जातीय म्हसीका, कला, संस्कृति, रहनसहन बचे यायेत मां भाय् न्हापांगु प्राथमिकताय् लाः धइगु धारणा तयादिल। लिपांगु इलय् समय आदिवासी जनजाति तय्गु मां भाय् तनांवना च्वंगुलिं चिन्ता कयादिसें वय्कलं थथे धयादिल, “झीगु प्रमुख विशेषता मां भाय् खः।

मां भाय् यात धाःसा झीपिं दइ। थन थौं ज्याझ्वः सञ्चालक तय्सं मां भाय् छ्यःगु जूसा उत्प्रेरणा दइगु खः। झीसं भाषाया संरक्षणय् विशेष बः बिइमाःगु आवश्यक जू।” संस्कार, संस्कृति, वेशभूषालिसें मां भाय्या संरक्षणय् सकलें छवाः छधी जुइमाःगुलिइ वय्कलं बः बियादिल।

नेपालय् जूगु दक्व ह्यूपालय् आदिवासी जनजाति तय्गु योगदान महत्त्वपूर्ण जूगु खँ न्ह्यथनादिसें नायः शेर्पां ह्वःता धाःसा मेगु समुदाय तय्गु ल्याखय् म्ह्वः जक आदिवासी जनजाति तय्त दुगुलिं वइगु इलय् खनेदयेक ब्वति दयेमाः धकाः धयादिल। “झीगु समुदायं तप्यंक प्रकृतिलिसे सरोकार तइ।

प्राकृतिक स्रोतसाधन मदयेकं आदिवासी जनजातितय्गु जीविकोपार्जन जुइफइमखु”, वय्कलं धयादिल, “झीगु हकअधिकार सुनिश्चित याकेत झीपिं हे सचेत जुइमाः।”