प्रधानमन्त्री केपी शर्मा ओलीं संस्कृतिदुने राजनीतिया मरि छुइगु प्रवृत्ति गलत जूगु खँ धयादीगु दु।

प्रधानमन्त्री निवास, बालुवाटारय् थौ सोमवाः नेपाल संवत न्हूदँ राष्ट्रिय समारोह समिति ११४५ समारोह समितिं लःल्हाःगु ध्यानाकर्षण पौ लःल्हानाकासें प्रधानमन्त्री ओलीं नेपाःया मौलिक संस्कृति व परम्परादुने राजनीति दुथ्याकाः स्यंकेगु कुतः बांमलाइगु खँ कनादिल ।

“राजनीति व अर्थतन्त्र स्यन धाःसा छुं दँ दुने ल्ह्वने फइ तर संस्कृतिइ ह्याकिं वन धाःसा उकियात ल्ह्वनेत दंदँ माली । थुखेपाखे सकलें सचेत जुइमाः।”, येँयाः थुज्वःगु पर्वय् जूगु गुलिखे भड्कावपूर्ण गतिविधिपाखे लक्षित यासें प्रधानमन्त्री ओलीं नेवाः संस्कृतिदुने आदिवासी, शास्त्रीय व अत्याधुनिक वाद्यवादन व विशेष धूनत दुगु व थुकिया संरक्षणय् जुयाच्वंगु कुतःया प्रशंसा यानादिल।

ध्यानाकर्षण पौ लःल्हायेगु झ्वलय् समितिया नायः लिसें पूर्वमन्त्री राजेन्द्र श्रेष्ठं नेपाल संवत्यात सरकारी ज्याखँय् छ्यलाबुलाय् हयेत २०८० कात्तिक २७ गतेया मन्त्रिपरिषदपाखें जूगु निर्णययात फुक्क तगिं व निकायय् कार्यान्वयन याय्त निर्देशित याय्त माग यानादिल। प्रधानमन्त्री निवास बालुवाटारय् प्रधानमन्त्री ओलीयात समारोह समितिया नायः श्रेष्ठं न्हूदँया लसताय् येँया बसन्तपुरय् कछलाथ्व पारु (कार्तिक १७ गते) शनिवाः जुइगु भिंतुना सभा ज्याझ्वलय् मूपाहाँ कथं झायेत इनाप यासें ब्वना पौ लःल्हायेगु ज्या जूगु खः।अथेहे, प्रधानमन्त्री ओलीयात नेपाल संवतयात कयाः न्हयगू बुँदे ध्यानाकर्षण पौ नं लःल्हाःगु दु।

लःल्हाःगु ध्यानाकर्षण पतिइ नेपाःया नोटय् नेपाल संवत तयेमाःगु, नेपाल संवत सरकारी दस्तावेजय् छ्यलेत याःगु निर्णय कार्यान्वयन यायेगु नितिं सरकारं परिपत्र जारी यायेमाःगु, राष्ट्रिय विभूति शंखधर साख्वाःया नामं राष्ट्रिय सिरपाः घोषणा यायेमाःगु लिसेंया खँ न्ह्यथनातःगु दु।

प्रधानमन्त्री नापलायेगु उगु ज्याझ्वलय् न्हूदँ समारोह समितिया संरक्षक हितकरवीर सिं कंसाकारं नेपाल सरकारं नेपालभाषां नेपाल टेलिभिजनय् समाचार प्रसारण व राससय् नेपालभाषां बुलेटिन प्रकाशन याःगुलिं नेपाल सरकारयात सुभाय् देछानादीगु खः।

थौ श्रेष्ठया नेतृत्वय् न्हूदँ समारोह समितिया संरक्षक नेवाः न्ह्यलुवाः मल्ल के सुन्दर, नेवाः देय् दबूया नायः पवित्र बज्राचार्य, पूर्वमन्त्री लिसें सांसद कृष्णगोपाल श्रेष्ठ, पूर्वराज्यमन्त्री दिलीप महर्जन, नेपाल संवत न्हूदँ राष्ट्रिय संरक्षण समितिया नायः प्रा.डा. नरेशमान बज्राचार्यलिसें थीथी व्यक्तिपिं उपस्थित जुयादीगु खः।अथेहे, राष्ट्रिय विभूति शंखधर प्रतिष्ठानया दुजःपिन्सं नं प्रधानमन्त्री  ओलीयात थौं सोमवाः हे नापलानादीगु दु।

सञ्चार व सूचना प्रविधि मन्त्री पृथ्वी सुब्बा गरुङं राज्ययात शक्तिशाली दयेकेगुलि भाषा व संस्कृतिं तःधंगु भूमिका म्हितिगु जुगुलिं थुकिया संरक्षण यायेमाः धका धयादीगु खः।

राष्ट्रिय समाचार समिति (रासस) पाखें थनिंनिसें न्ह्याःकूगु नेपाल भाषा व मैथिली भाषाया समाचार सेवा शुभारम्भ यासें मन्त्री गुरुङं सरकारं भाषा संरक्षण अभियान सरकार मातहतया सञ्चार माध्यमपाखें न्ह्याःकूगु प्रष्ट यानादिल। फुक्कं क्षेत्रया जनताया नितिं साझा व समान अधिकार बाँडफाँड यायेगु ज्यां राष्ट्रियता प्रवद्र्धन यायेफइ धासें वय्कलं धयादिल – “भ्वँतय् जक मखु जनताया ख्वाःपाः, भाषा व संस्कृतिइ राष्ट्रियता व समावेशी प्रजातन्त्र खने दयेमाः।”

सभ्य, समृद्ध व अखण्ड समाज निर्माण यायेगु अभियानय् थ्वज्यागु ज्या न्हापागु पलाः कथं कायेमाःगु बिचाः प्वंकुसे नेपाः सरकारया नं प्रवक्ता गुरुङं सरकारया सच्छि दिंया ज्याझ्वलय् लानाच्वंगु चांःन्हिं मदिक्क समाचार सेवा बियेगु, संग्रहालय पलिस्था यायेगु व निगू मां भासं समाचार सेवा न्ह्याकेगु जिम्मेवारीयात राससं ताःलाकूगु धासें च्वछाया दिल।

मन्त्रालयया सचिव राधिका अर्यालं नेवाः व मैथिली भासं समाचार पितबिइगु राससया ज्यां उगु समुदायं आत्मसम्मान व गौरब बढे जूगु अनुभूति याइगु भलसा प्वंकाः दिल। राससया नायः धर्मेन्द्र झा नं भाषा व मिडियायात छगू मेगुया नितिं पूरक खः धासें राष्ट्रया बृहत्तर हित स्वया ज्या याइपिं गब्ले बुइमखु धयादिल।

राससया महाप्रवन्धक सिद्धराज राईं नागरिकया सूचनाया हक स्थापित यायेगु ज्याय् राससं ताँपूया भूमिका म्हिताच्वंगु दु धयादिल । भाषा आयोगया दुजः सुरेश किरण मानन्धरं सरकारी सञ्चारमाध्यमपाखें बहुभाषाय् समाचार सम्पे्रषण जुइगु थी थी भाषाभाषी व जातीय समुदायया लागि गौरवया खँ खः धयादिल। मैथिली भाषाविज्ञ प्रा डा योगेन्द्र प्रसाद यादवं छुँ नं भाषायात म्वाकेगु खःसा उकिया छ्यलाबुला याये हे माः धका धयादिल।

बागमती प्रदेश लोकसेवा आयोगया अध्यक्षय् महेश्वर श्रेष्ठयात नियुक्त याःगु दु।

बागमती प्रदेश प्रमुख दीपकप्रसाद देवकोटां श्रेष्ठयात लोकसेवा आयोग ऐन २०७६ या दफा ३ उपदफा (१) कथं गठन जूगु सिफारिश समितिया सिफारिशय् दफा ४ या उपदफा (४) कथं नायः पदय् नियुक्त याःगु खः।

त्रिवेणी गाउँपालिका–१ नवलपरासीइ च्वंनादिइम्ह श्रेष्ठ लुम्बिनी प्रदेशया स्वास्थ्य तालिम केन्द्र बुटवलया निर्देशक जुया ज्यायाना च्वनादीम्ह खः।

राष्ट्रिय समाचार समिति (रासस) पाखें म्हिगः निसे नेपाल व मैथिली भाषाया समाचार सेवा शुभारम्भ जूगु दु । भद्रकाली प्लाजाय् च्वंगु राससया मू ज्याकुथिइ छगू ज्याझ्वःया दथुइ सञ्चार व सूचना प्रविधिमन्त्री पृथ्वी सुब्बा गुरुङं निगुलिं माँभाय् समाचार सेवाया उलेज्या यानादीगु खः।

राससयात समावेशी चरित्र कथं दयेका यंकेगु ताःतुना वंगु कौलाथ्व १३ निसें निगुलिं मां भाय्या समाचार सेवा परीक्षण कथं न्ह्याकावया च्वंगु खः। राससया कार्यकारी नायः धर्मेन्द्र झा नं संविधानया भावना कथं राससयात समावेशी दयेकेगु आज्जुयात नाला थप निगू मां भाय्या समाचार सेवा न्ह्याकूगु खः धका धयादिल।

“राज्यया लगानी दूगु राससपाखें सार्वजनिक च्यूताःया सूचं व जानकारीत आम नागरिकया निंति उमिगु हे भासं थुइका कायेगु अधिकार सुनिश्चित जुइमाः धइगु जिमिगु मनसुवा खः,” नायः झा नं धयादिल । राससं नेपाःया संविधान–२०७२ या मर्मकथं संघीयता व समावेशी अवधारणायात कय्च्यासें २०८० पुस २३ गतेनिसें अवधी भाय्या समाचार सेवा न्ह्याकूगु खः।

उगु सेवा नेपालगञ्ज उपमहानगरपालिकलिसेंया सहकार्यय् न्ह्यागु खः । उकथं हे सञ्चार व सूचना प्रविधि मन्त्रालयया ग्वाहालिइ राससं थप निगू माँ भाय्या सेवा नं न्ह्याकूगु खः । राससया सेवाग्राहीतय् मागया सम्बोधन, समाचार सेवाया विस्तार व विविधीकरणया लिसें अन्तर्राष्ट्रिय सञ्चार माध्यमया ज्वःलिंज्वः थःत थःनेगु कुतःलय् रासस वंगु भदौ १७ गतेनिसें चां न्हिं मदिक्क समाचार सेवा पित बिइधुंकूगु दु ।

राससं थःगु स्थापनाकाल थुखे बुखँ उत्पादन यायेत छ्यःगु ज्याभः व उपकरण संग्रह याना वंगु साउन ३२ गते रासस मिडिया संग्रहालय पलिस्था यायेधुंकुगु दु ।राससया महाप्रबन्धक सिद्धराज राई नं धयादिल – “देय्या नेपाली धुंका अप्वः जनतां ल्हाइगु मैथिली व नेपाल भाषा जूगुलिं संघीय राजधानीयात आधार मानेयाना निगुलिं मां भाय्या समाचार सेवा ह्याकागु खः ।” राससया वरिष्ठ कार्यकारी व्यवस्थापकया कथं निगुलि मां भाय्या समाचार सेवाया प्रारम्भ विविधताया दथुइ एकता मालेगुु व राससयात पूर्ण समावेशी दयेका यंकेगु छगू कुतः खः ।

सहकारी ठगी मुद्दाय् ज्वनातःम्ह पूर्वगृमन्त्री लिसे राष्ट्रिय स्वतन्त्र पार्टी सभापति रवि लामिछानेयात जिल्ला अदालत, कास्कीइ उपस्थिति याकूगु दु।

सूर्यदर्शन बचत तथा ऋण सहकारी संस्था लिमिटेड पोखराया सहकारी ठगी लिसे सङ्गठित अपराधसम्बन्धी मुद्दा सम्बन्धय् अनुसन्धान यायेगु निति लामिछानेयात अदालत उपस्थिति याकूगु खः।

रविया पक्षय् वरिष्ठ अधिवक्तापि सुशील पन्त, नारायण घिमिरे नाप यज्ञमणि न्यौपाने, हेमराज पोखरेल उपाध्याय, कमल पोखरेल, डा. नारायणदत्त कँडेल व लेखनाथ सापकोटां बहस याइगु जूगु दु।