नागरिक लगानी कोष व म्याग्दी हाइड्रोपावर लिमिटेड दथुइ सेयर प्रत्याभूतिया सम्झौता जूगु दु। सम्झौताय् कोषया कार्यकारी निर्देशक पर्वतकुमार कार्की व म्याग्दी हाइड्रोपावरया नायः भरतप्रसाद नेपालं आइतबाः जूगु छगू ज्याझ्वलय् ल्हाःचिं तयादिगु खः।

म्याग्दी हाइड्रों प्रतिसेयर सच्छिया दरं ४७ लख ४५ द्वः कित्ता बापत ४७ क्वति ४५ लख बराबरया सेयर पिकायेगु सम्बन्धय् कोषलिसे प्रत्याभूति सम्झौता याःगु खः।

सम्झौताया ई खुल्लाया जुइगु कोषं पिथंगु प्रेस विज्ञप्तिइ धयातःगु दु। (रासस)

राष्ट्रपति रामचन्द्र पौडेलं डेनमार्कया निति नेपाःया आवासीय राजदूतय् सुम्निमा तुलाधरयात नियुक्त याःगु दु।

राष्ट्रपति पौडेलं नेपाः याःगु संविधानया धारा, २८२ या उपधारा (१) बमोजिम मन्त्रिपरिषदया सिफारिसय् तुलाधरयात थौ आइतवाः राजदूतय् नियुक्त याःगु दु धका राष्ट्रपतिया कार्यालयं धाःगु दु।

नेपाल फिजियोथेरापी सङ्घ (नेप्टा) या नायः पदय् समीदकुमार कतिला श्रेष्ठ निर्वाचित जुयादीगु दु । सङ्घया ११ क्वःगु महाधिवेशनपाखें वय्कःया नायःसुुइ १५ म्ह दुजःया केन्द्रीय कमिटी गठन जूगु खः।

कार्यसमितिया न्वकू पदय् श्यामसुन्दर यादव व मिसा न्वकू पदय् डा मञ्जु ज्ञवालीयात ल्यःगु खः। अथे हे यानाः महासचिवय् सुवर्ण थापा क्षेत्री, सचिवय् ज्यानेन्द्र झा, कोषाध्यक्षय् सुजितकुमार यादव व सहकोषाध्यक्षय् ओमप्रकाश शाह निर्वाचित जुयादीगु दु। कार्यसमिति दुजलय् सौगात श्रेष्ठ, उज्ज्वल डोटेल, तेञ्जिङ नोर्बु लामा, धीरज श्रेष्ठ, उमाशङ्कर शाह, मिसा दुजलय् सृजना लुइँटेल, जनजातिइ कौशल दास, मधेसीइ नवीनकुमार जैसवालयात ल्यःगु दु।

राष्ट्रिय परिषद् दुजलय् नवीन सापकोटा, सुजित झा, सकुना दानी, जयराम महर्जन व अविनाश लम्साल ल्यगु दु धका निर्वाचन समितिं धाःगु दु। देय्न्यंकं स्वद्वः फिजियोथेरापिस्ट दूगुलिइ सङ्घय् थ्यं मथ्यं झिंछसः दुजःपि दुथ्यानाः च्वंगु दु।

सहकारीया बचत ध्यबाः अपचलनया द्वपंनय् ज्वनाः जिल्ला प्रहरी ज्याकुथि, कास्कीया हिरासतय् लानाच्वंम्ह राष्ट्रिय स्वतन्त्र पार्टीया सभापति रवि लामिछाने विरुद्ध कास्की जिल्ला अदालतय् थौं अभियोगपत्र पेस जूगु दु।

जिल्ला अदालतया सूचना अधिकारी सुरज अधिकारीं सभापति लामिछानेनापं सहकारी ठगीया द्वपंनय् मेपिं मनुतय्विरुद्ध नं अभियोगपत्र पेस जूगु खँ कनादिगु दु। “आः अभियोगपत्र रुजुया ज्याः जुयाच्वंगु दु, लामिछाने लगायत मेपिविरुद्ध न थौं हे मुद्दा दर्ता जुइ, अदालतपाखें माःगु प्रक्रिया न्ह्याकाच्वंगु दु”, वय्कलं धयादिल।

पोखराया सूयदर्शन बचत व ऋण सहकारी संस्था लिमिटेडया बचत रकम अपचलन यागु द्वपंनय् लामिछानेयात वंगु कात्तिक २ कुन्हू येँय् ज्वंगु खः। कास्कीनापं मेगु जिल्लाय्नापं सहकारी ठगीया द्वपंनय् वय्कःयाके माःगु न्यनेकने ज्या जुयाच्वंगु दु। (रासस)

नेपालय् नं थीथी धार्मिक, आध्यात्मिक, सांस्कृतिक लिसें सामाजिक संघ संस्थां विश्व ध्यान दिवस न्यायेकूगु दु।

हिमालय पर्वत मालाया देय् नेपालं योग, ध्यान न्ह्याःगु शास्त्रीय मान्यता दु। योग, ध्यानया आदिगुरु कथं महाद्यःयात कायेगु याः। डिसेम्बर ६, २०२४ य् संयुक्त राष्ट्रसंघया महासभां २१ डिसेम्बरयात विश्व ध्यान दिवस कथं हनेगु घोषणा याःगु खः। विश्व ध्यान दिवसया लसताय् हलिंन्यंकं ३२ घौतक मदिक्क ध्यान ज्याझ्वः न्ह्याकूगु दु।

नेपाल महर्षि वैदिक फाउन्डेसनं नेपालय् थुगु ज्याझ्वः ग्वसाः ग्वःगु खः। नेपाल महर्षि वैदिक फाउन्डेसन लिसें स्वापू दूगु ध्यान केन्द्र, ग्लोबल मदर डिभिजन व देय्न्यंकं न्ह्याना च्वंगु ९० गू गुरुकुलय् शनिबाः मंकाः ध्यानया ज्याझ्वः तयागु फाउन्डेसनया नायः दीपकप्रकाश बाँस्कोटां धयादिल।

अथे हे, जीवन विज्ञान, पतञ्जलि संस्था, ब्रह्मकुमारी राजयोग सेवा केन्द्र, ओशोया नामं न्ह्याःनाच्वंगु थीथी संघ संस्थां थीथी ज्याझ्वःत याना विश्व ध्यान दिवस न्यायेकूगु खः। (रासस)