कालिकोटया ओडानकु केन्द्रविन्दु जुया थौं सुथय् ३.६ म्याग्निच्युडया भुखाय् ब्वःगु राष्ट्रिय भूकम्प मापन लिसें अनुसन्धान केन्द्रं धाःगु दु।

भुखाय् ब्बया छुं कथंया मानवीय व भौतिक क्षति जूगु खँ सि मदुनी। वंगु छुं न्हि निसें बझाङ, मनाङ, बाजुरा, दार्चुला व जाजरकोटय् भुखाय् ब्वया च्वंगु दु।

यल संग्रहालयय् देश व विदेशपाखे ६४ म्ह मस्त चित्रकार तयेगु मंका कथं प्रदर्शनी न्ह्यागु दु। योङ्ग पिकासोया ग्वसालय् कलर फर पिसया ग्वहालिं न्ह्यागू उगु प्रदर्शनीइ बंगलादेश, भारत, श्रीलंकाया झीम्ह व नेपाःपाखे ५४ म्हेसिगु चित्र ब्बज्या जूगु खः।

प्रदर्शनया सहआयोजक कथं पाटन संग्रहालयय् स्वन्हु तक उगु प्रदर्शनी “योङ आर्टिस फ्रम द वल्ड, इन्टरनेशनल आर्ट एक्जिविसन २०२४” नामं न्ह्यागू खः। उगु ब्बज्याय् न्यादँ दुपि निसे झीन्यादँ दुपि चित्रकार तयेगु चित्र दुथ्यागु दु। उगु ज्याझ्वःया उलेज्या विदुर नगरपालिकाया उपप्रमुख प्रभा बोगटी, वरिष्ठ चित्रकार राधेश्याम मुल्मी विदुर नगरपालिकाया वडाअध्यक्षपि लेलिन रञ्जित व दिपक कायस्थ, सातुआ प्रतिभा समाजया अध्यक्ष बज्रराम बज्राचार्य, पाटन संग्रहालयया सूचना अधिकृत सुरेश लाख नेवाः पत्रकार राष्ट्रिय दबूया अध्यक्ष नृपेन्द्रलाल श्रेष्ठपिनिगु ब्बति दुगु खः।

उगु ज्याझ्वलय् अन्तर्राष्ट्रिय चित्रकला प्रदर्शनीनाप मचा चित्रकार तयेगु भावना दुथ्याका पङ्खफुका पन्छी सफू न विमोचन जूगु खः। योङ पिकासाय् अध्ययन यानाच्वंपि झीन्याम्ह १५ मचा चित्रकार तयेगु चित्र दुथ्याका उगु सफू साहित्यकार सोमनाथ दाहालं च्वयादीगु खःसा सम्पादन न यानादीगु खः।

सत्यनारायणबहादुर श्रेष्ठ प्रेस स्वतन्त्रता सेनानी सिरपा नेपाल आदिवासी जनजाति पत्रकार महासंघ (फोनिज)यात संस्थागत कथं लःल्हागु दु।

नेवाः पत्रकार राष्ट्रिय दबू न छगु ज्याझ्वः दथुइ उगु सिरपा लःल्हागु खः। नेपालय् पत्रकार तय्त न्हापां संंगठित यायेगु निति नेपाल पत्रकार संघ निस्वम्ह तत्कालीन नेपाल टुडेया सम्पादक सत्यनारायणबहादुर श्रेष्ठया १०९ क्वःगु जन्मजयन्तीया लसताय् उगु ज्याझ्वः याःगु खः। उगु ज्याझ्वलय् नेपाल आदिवासी जनजाति पत्रकार महासंघ (फोनिज) या अध्यक्ष गजुरधन राईयात पत्रकार दबूया केन्द्रीय अध्यक्ष नृपेन्द्रलाल श्रेष्ठं स्वामा क्वखागु खःसा नेपाल आदिवासी जनजाति पत्रकार महासंघया वरिष्ठ उपाध्यक्ष बुद्ध घर्तीं हनापौ लःल्हानादीगु खः सा श्रेष्ठया म्ह्याय् नाप सिरपाया दाता सुजिता श्रेष्ठ मानन्धरं नगद २५ हजार नगद राशि लःल्हागु खः।

गृष्मबहादुर देवकोटां च्वयातःगु नेपाली छापाखानाया इतिहास नांयागु सफूति विसं २००८ साल जेठ महिनाय् नेपाल पत्रकार संघ स्थापना याना नेपाःया पत्रकार तय्त न्हापा संगठित यायेगु उदेश्यं तत्कालीन नेपाल टुडेया सम्पादक मदुम्ह श्रेष्ठया नां उल्लेख याना तःगु खः। २०१२ साल चैत्र १६ गते नेपाल पुकारया तत्कालीन सम्पादक नाप सन्त नेता मदुम्ह कृष्णप्रसाद भट्टराई उपाध्यायया नेतृत्वय् गठन जूगु नेपाल पत्रकार संघ २००८ सालय् गठन जुगु संघ हे हाकन गठन जुगु धका धयावया च्वंगु खः।२०१२ साल चैत्र १६ गते नेपाल पत्रकार संघ गठन जूगु आधारयात कया अध्यक्ष भट्टराईयात हे संस्थापक अध्यक्ष खः धका धया वयाच्वंगु खः।

उगु आधारय् नेपाल पत्रकार महासंघया संस्थापक अध्यक्षया कथं स्थापित यायेत माग यासे पत्रकार तयेगु संगठित इतिहास हाकन च्वयेमाः धका पत्रकार दबू न छगु दशकनिसे निरन्तर अभियान न्ह्याका वयाच्वंगुलि उगु सिरपा निस्वंगु खः।उगु खँ ल्ह्वनेगुलि महत्वपूर्ण योगदान यानागुलि फोनिजयात संस्थागत कथं उगु सिरपा लःल्हायेगु निर्णय याःगु खः।फोनिजं पोखराय् क्वचाःगु न्याक्वःगु महाधिवेशनं उगु एजेण्डायात संस्थागत कथं पारित याना उगु अभियान देयन्यक न्ह्याकूगु खः।

फोनिजया नेतृत्वय् देयन्यक पत्रकार महासंघया जिल्ला शाखाय् ज्ञापनपौ लःल्हागु व महासंघया अध्यक्ष विपुल पोखरेलया कार्यकालय् उगु एजेण्डायात विधान सभाय् सहलह यायेगु कथं न्ह्याकूगु खः।पत्रकार दबू न २०७६ सालनिसे श्रेष्ठया जन्मजयन्ती हनेगु व वंगु दँनिसे सिरपा लःल्हायेगु ज्या न्ह्याकूगु खः। वंगु दँय् उगु सिरपा पत्रकार लक्की चौधरीयात लःल्हागु खः। उगु ज्याझ्वलय् महासंघया वरिष्ठ उपाध्यक्ष बुद्ध घर्ती न मदुम्ह श्रेष्ठयात इतिहासया उपेक्षा याना पत्रकार महासंघं सत्ययात स्वीकार यायेत मस्वंगु धका धयादीगु खः।

थुकिइ महासंघया नैतिक धरातल न्ह्यावलय् न्ह्यसः दयाच्वनिइ धका धयादीगु खः।उगु ज्याझ्वलय् पत्रकार दबूया सचिव राजु नापितं मदुम्ह श्रेष्ठया योगदानयात थीथी ज्याझ्वः पत्रकार दबू न याना वयाच्वंगु दु धका धयादीगु खः। उगु ज्याझ्वलय् मधेशी पत्रकार समाजया अध्यक्ष मोहन सिंहं पत्रकार महासंघया विधान अधिवेशनपाखे थुगु बहसयात क्वचायेकेमाः धका बःबियादीगु खः। उगु ज्याझ्वलय् नकतिनि हे क्वचाःगु पत्रकार महासंघया निर्वाचित दबूया सदस्यतय्त भिंतुना देछाउगु खः।

वल्र्ड नेवा अर्गनाइजेसन (डब्ल्यूएनओ) नेपाः च्याप्टरं निक्वःगु सत्यनारायणबहादुर श्रेष्ठ स्मृति मिडिया कप फुटसल कासा उपाधि त्याकूगु दु। डब्ल्यूएनओ नेपाल च्याप्टरं फाइनलय् राष्ट्रिय समाचार समिति (रासस) यात सडन डेथय् ४–३ गोलं बूकुगु दु।

निर्धारीत इलय् कासा १–१ या बराबरीए जुइवं च्याम्पियनया निर्णय पेनाल्टी सुटआउटपाखे जूगु खः। सेमिफाइनलय् डब्ल्यूएनओ नेपाः च्याप्टरं यल वडा १६ कलाकार समितियात १–० व राससं टिम एभिएमयात पेनाल्टी सुटआटय् ३–२ गोलं पराजित याःगु खः।

रासस व एभिएम दथुइ निर्धारीत इलय् छगु हे गोल मयासे बराबरी जुगु खः।ल्युया निति यल १६ वडा कलाकार समितिं टिम एभिएमयात ४–२ गोलं बूकुगु खः। निगु समूहपाखे शीर्ष निगु–निगु टिम सेमिफाइनलय् थ्यःगु खः। कासाय् गूगु टिमं ब्बति काःगु खः। नेवाः पत्रकार राष्ट्रिय दबु ए, नेपाल पत्रकार राष्ट्रिय दबु बी, राष्ट्रिय फोटो पत्रकार समूह, नेवाः कलाकार टिम व नेपाल आदिवासी जनजाति पत्रकार महासंघ (फोनिज) समूह चरणं पिहावःगु खः।

उगु कासाय् वल्र्ड नेवाः नेपाः च्याटरया सुमन महर्जन उत्कृष्ट गोलरक्षक, फोनिजया किरण राई सर्वाधिक गोलकर्ता व टिम एभिएमया पुरुषोत्तम वज्राचार्य सर्वश्रेष्ठ कासामि जुगु खः।अथेहे कासाय् नेवाः मिसा पत्रकार टिम व नेवाः मिसा कलाकार दथुइ छगु कासा जूगु खः। उगु कासाय् पत्रकार टिम २–१ न विजयी जूगु खः।

नेवाः पत्रकार राष्ट्रिय दबू न श्रेष्ठया १०९ क्वःगु बुदिंया लसताय् फुटसल कासा याःगु खः। श्रेष्ठया १०९ क्वःगु बुदिं पुस १३ गते छगु ज्याझ्वः दथुइ सत्यनारायणबहादुर श्रेष्ठ प्रेस स्वन्तत्र सेनानी सिरपा लःहाइगु ज्याझ्वः दु।

जाजरकोटया नयकवाडा केन्द्र जूया ४.२ म्याग्निच्युटया भुखाय् ब्बःगु दु। थौ सुथय् ६ः ३३ बजेय् भुखाय् ब्बःगु दु धका भूकम्प मापन केन्द्रं धाःगु दु।

उगु भुखाचं गुलि क्षति जूगु धका विवरण वये ल्यःदनि।