यलय् बुंगद्यःया जात्राया नितिं दयेकाच्वंगु रथय् थौं घःचाः स्वनेज्या याःगु दु ।

यलया इबहिली दयेकूगु घःचाः बुंगद्यः दयेकाच्वंगु थाय् पूच्वय् जात्रा यानाः सालाहयाः थ्यंकूगु खः ।

यँवाः रामेश्वर महर्जनयाकथं वइगु बैशाख १४ गते बुंगद्यः रथय् बिज्याकीसा वैशाख १७ गते रथ यात्रा न्ह्याइ । 

थुगु दिनय् बुंगद्यः गाःबहालय् सालाः यंकी । द्यः गाःबहालय् थ्यनकि याःन्याइ । द्यः सालीगु दिं छ्वय्लाभुकथं जात्रा हनीसा कन्हेकुन्हु भुज्याकथं मू जात्रा हनेगु याइ ।

बुंगद्यः गाःबहालं नुगलय् (सुन्धाराय्) सालायंकीसा नुगलंं लगनखेलय् व लगनखेलय् थ्यंकाः नैंक्याः कुर्केगु, मिसापिन्सं बुंगद्यः सालीगु, याकः मिसाया भुज्याः नं हनीगु चलन दु ।

लगनखेलय् थ्यंकाःली साइत वयेका जक जावलाखलय् सालाः यंकी । जावलाखेलय् जाह्वलाजात्रा हनाः देसय् दकले ताःहाकःगु बुंगद्यःया जात्रा क्वचायेकेगु चलन दुसा थुगु जात्रा स्वयेत राष्ट्र प्रमुख नं जावलाखेलय् थ्यंकादी ।

बुंगद्यःया रथया घःचाः ईबहिलिं पूच्वय् यंकूगु भिडियो स्वयेत थन क्लिक यानादिसँ

२५६१ क्वःगु बुद्ध जयन्ती मूल समारोह समिति रत्नाकर महाविहार हःखबहालं यलय् थुगुसीया बुद्ध जयन्ती स्वर्ण जयन्तीकथं हनेत्यंगु दु ।

हःखबहालं न्हापांगु खुसी पाः काःगु दँ बुद्ध सम्वत् २५११ निसें थुगुसी बु.सं. २५६१ याः पाःकाःगु ५० दँ दुगुया ल्याखं थुगुसी स्वर्ण जयन्तीकथं हनेत्यंगु खः ।

ज्याझ्वःकथं वैशाखया ९ गते शनिवार सुथसिया ९ताः इलय् तिलगंगा आँखा अस्पतालया प्राविधिक ग्वाहालिइ निःशुल्क मिखा जाँच यायेगु, निःशुल्क मोतियाविन्दु अपरेशन यायेगुलिसें वासः नं निःशुल्क बीगु ग्वसाः दु ।

थुगु हे ज्याया झ्वलय् मिखा दानया घोषणा यायेफइगु नं ग्वसाः खलकं धाःगु दु । मिखादान मनू मदयेधुंकाः जक याइगु दान खः ।

थुकथं हे वैशाखया १७ गते १२ः३० ताः इलय् हःखबहालय् मुनाः ३ ताः इलय् अन्तराष्ट्रिय बौद्ध भावना केन्द्र शंखमूलय् प्रवज्याभिषेकया ज्याझ्वलय् ब्वति कायेगु, वैशाख २३ गते सुथय् ७ः३० बजे धर्मदेशना लिपा ९ बजेनिसें १ ताः तक रक्तदान ज्याझ्वः जुइ ।

वैशाख २४ गते श्रावकयानपाखें सुथय् परित्राण पाठ, महायान पूजा व बज्राचार्य गुरुजुपिनिगुपाखें पूजापाठ ज्याझ्वः जुइसा बैशाख २५ गते सुथय् ८ ताः इलय् धर्मदेशना व न्हिच्छियंक थीथी २० गू पुचःपाखें ज्ञानमाला भजन हाली ।

वैशाख २६ गते सुथय् ८ ता: ईनिसें १० ता: ईतक न्हूपिं श्रामणेरगणपिंपाखें थीथी त्वालय् भिक्षाटन ज्याझ्वः जुइसा न्हिनय् ३ः ताः इलय् वृहत बौद्धसभा जुइ ।

वैशाख २७ गते सुथसिया ४ ता: ईनिसें नसंचा उजेज्यालिसें बुद्धपूजा, बुद्ध दर्शण, शील प्रार्थना, धर्म देशना जुइसा ११ ताः इलय् भिक्षुगण व अनागारिकापिन्त भोजनदान व न्हिनय् १ ताः इलय् नगर परिक्रमा व समापन ज्याझ्वः जुइ ।

ज्याझ्वःया लिपांगु ज्याकथं बुद्धमूर्ति तःवनेगु व अन्तर्राष्ट्रिय बौद्ध भावना केन्द्र, शंखमूलय् अल्पकालीन प्रवज्या शिविर समापन ज्याझ्वः जुइगु नं ग्वसाः खलकं धाःगु दु ।

यलया छगू बिस्कंगु परम्परा ४५ क्वःगु यल जिल्लाब्यापि बुद्ध व बुद्धधर्म सम्बन्धी न्ह्यसः लिसः कासा धाःसा थुगुसी पद्मावती महाविहार नःबहालय् जुइगु पत्रकार विक्रम शाक्यं कनादीगु दु ।