Display Style:
Column Style
सडक विस्तारया विरोधय् अनसन न्ह्यानाच्वन
लहनान्यूज | चौलाथ्व दशमी ११३७ (अप्रिल ६ २०१७)
स्वनिगःया थीथी थासय् जुयाच्वंगु सडक विस्तारया विरोधय् जुयाच्वंगु अनसन थौं नं न्ह्याना हे च्वंगु दनि ।
उपत्यकाव्यापी सडक विस्तार संघर्ष समितिया आव्हानय् म्हिगःनिसें न्ह्याःगु रिले अनसनया थौं निन्हुगु दिनय् झिम्ह अनसन च्वनाच्वंगु दु ।
संघर्ष समितिया नायः सुमन सायमिं लहनान्यूजलिसे खँ ल्हासें राज्यं गैरन्यायिक रुपं यानाच्वंगु सडक विस्तारया ज्या मदिकूतल्ले थःपिं संघर्ष याना हे च्वनेगु धयादिल । नायः सायमिं अझ नं सरकारं थःपिनिगु मागया सुनुवाइ मयाःसा लिपा आमरण अनसन हे च्वनेगु धयादिल ।
म्हिगःनिसें अनसनया ज्याझ्वः न्ह्यायेधुंकाः च्यूताः व ऐक्यवद्धता क्यँसें थीथी संघसंस्थाया प्रतिनिधिपिं थःपिन्त नापलाःवःगु सायमिं जानकारी बियादिल । तर आःतक्क गुगु नं दलया नेतापिं धाःसा मवःनिगु वयकलं धयादिल ।
राज्यया गैरन्यायिक ज्याखँप्रति जनताया दथुइ विद्रोह दना वयाच्वंगु अवस्थाय् राज्यं इलय् हे बिचाः यायेमाःगु सायमिं धयादिल । थःपिनिगु मागया इलय् हे सुनुवाइ मयाःसा अझ सशक्त आन्दोलन न्ह्याकेगु वयकःया धापू खः ।
सतक विस्तारया विरोधय् अनसन न्ह्यात
लहनान्यूज | चौलाथ्व नवमी ११३७ (अप्रिल ५ २०१७)
स्वनिगलय् थीथी थासय् जुयाच्वंगु सडक विस्तारया विरोधय्उपत्यकाव्यापी सडक विस्तार पीडित संघर्ष समितिया आह्वानय् येँया रत्नपार्क लागाय् थौंनिसें रिले अनसन न्ह्याःगु दु ।
संघर्ष समितिया नायः सुमन सायमिया नेतृत्वय् रिले अनसन न्ह्याःगु खः । थौं संघर्ष समितिया न्वकू शान्तप्रकाश श्रेष्ठलिसें झिंछम्ह अनसन च्वंगु खः ।
रिले अनसन च्वने न्ह्यः आदिवासी जनजाति मानवअधिकार वकिल समुह लाहुर्निपया छ्याञ्जे शंकर लिम्बु मूपाहांया थासं अनसन च्वनीपिन्त खादां न्ययेकादीगु खः । अनसन न्ह्यःया औपचारीक ज्याझ्वलय् नवासें समितिया न्वकू श्रेष्ठं राज्यं थःपिनिगु माग पूमवंकूसा आमरण अनसन तकं च्वनेगु धयादिल ।
उगु इलय् मूपाहां लिम्बुलिसें पाहांपिं नेवाः पत्रकार राष्ट्रिय दबूया केन्द्रीय नायः श्रीकृष्ण महर्जन, अधिवक्ता टल थामी, न्वकू शान्तप्रकाश श्रेष्ठलिसें नं राज्यं गैरन्यायिक ढंगं जनताया छेँ थुनेमज्यूगु खँय् बः ब्यूगु खः ।
न्हियान्हिथं सुथसिया ८ताः इलंनिसें रिले अनसन जुइगु समितिं न्ह्यथंगु दु ।
जनबहाःद्यःया रथजात्रा, असनय् याः न्यात
लहनान्यूज | चौलाथ्व अष्टमि ११३७ (अप्रिल ५ २०१७)
जनबहाःद्यःया रथजात्राया थौं न्हापांगु दिं, थौं असनय् याः न्यायेकूगु दु ।
थौं जनबहाःद्यःया रथयात येँया जमः तिनधारा पाठशालां साला हयाः असनय् याः न्यायेकूगु खः । जमःया तीनधारां पाठशालां न्ह्याःगु रथजात्रा त्रिचन्द्र कलेज, रत्नपार्क, भोताहिति जुयाः असनय् थ्यंकाः याः न्यायेकूगु खः ।
जमलं ६ताः ईपाखे सालाहःगु रथ ६ः४५ताः ईपाखे असनय् थ्यंगु खः ।
व स्वयां न्ह्यवः जनबहाःद्यःयात जनबहालं चिग्वःगु खतय् कुबियाहयाः जमलय् रथय् थहां बिज्याकूगु खः । बाजंगाजं लिसें जात्रा यानाः खतय् तयाः कुबियाहयाः जनबहाःद्यःयात जमलय् थ्यंकूगु खः ।
थुकिया दथुइ, राष्ट्रपति विद्यादेवी भण्डारी असनय् झायाः जनबहाःद्यःया दर्शन यानादीगु दु । कडा सुरक्षा व्यवस्था दथुइ असनय् झाःम्ह राष्ट्रपति भण्डारीं द्यः दर्शन यानाः प्रसाद नं कयादीगु खः ।
च्वमि शाक्ययात ‘पञ्चवीर सिरपाः’ लःल्हात
लहनान्यूज | चौलाथ्व पंचमि ११३७ (अप्रिल १ २०१७)
बुद्ध सम्बत २५५९ या पञ्चवीर सिरपाः नरेशवीर शाक्ययात छगू ज्याझ्वःया दथुइ लःल्हात ।
येँया आनन्दकुटी विद्यापीठय् जूगु ज्याझ्वलय् मूपाहां नापं अखिल नेपाल भिक्षु महासंघया दांभरिं भिक्षु बोधिज्ञान महास्थविरं च्वमि शाक्ययात उगु सिरपाः लःल्हाना बिज्याःगुु खः । दाता पञ्चवीर सिंह तुलाधरं सिरपाःया दां २५५९तका व थप ११,१११ तका लःल्हानादीगु खः ।
ज्याझ्वलय् मूपाहां भिक्षु बोधिज्ञान महास्थविरया लिसें निर्णायक मण्डलया दुजःपिं डा. ईन्द्रसिद्धि बज्राचार्य, पूर्ण ताम्राकार, नेपालभाषा टाइम्सया सम्पादक सुरेश किरण मानन्धर, मिसा च्वमि सुनीता मानन्धर व मदन तुलाधरपिन्सं थःथःगु नुगःखँ तयादीगु खः ।
थ्वहे झ्वलय् दाता पञ्चवीर सिंह तुलाधरं आकिवंनिसें ईलोहं मचा लयपती पिहांवइगु मस्तयगु बुद्ध धर्म सम्बन्धि उत्कृष्ट च्वसुयात नं सिरपाः बीगु घोषणा यानादीगु खः ।
थुगु सिरपाः दँय्दसं नेपालभाषाया न्हिपौ ‘नेपालभाषा टाइम्स’य् पिदनीगु उत्कृष्ट बौद्ध च्वसुयात बिया वयाच्वंगु खः ।
सिन्धुपाल्चोकय् नेपाल सम्वत सम्बन्धि साक्षात्कार
लहनान्यूज | चौलाथ्व पञ्चमि ११३७ (अप्रिल १ २०१७)
नेवाः देय् दबू जिल्ला कार्य समिति सिन्धुपाल्चोकया ग्वसालय् सिन्धुपाल्चोकया चौताराय् नेपाल सम्वत सम्बन्धि साक्षात्कार ज्याझ्वः क्वचाःगु दु ।
ज्याझ्वलय् संस्कृतिविद् डा. चुन्दा बज्राचार्य व कलाकार अले अनुसन्धाता एकाराम सिं लिसेंया वक्तापिन्सं नेपाल सम्बत नेवाःतयगु जक मखसें सकल नेपाःमिपिनिगु खः धइगु खँय् बः बियादीगु दु ।
संस्कृतिविद् डा. बज्राचार्यं बज्राचार्यं नेपाल सम्वतया सुरुवात गबले, गुकथं जुल धइगु कनादीगु खः । अनुसन्धाता सिंहं देशय् जुजु हिलकि सम्वत् हिलीगु परम्पराया दसु कथं नेपाल सम्वतया शुरुवातयात कायेफइगु धयादिल ।
नुगःखँ तयेगु झ्वलय् ज्याझ्वःया मू पाहां नेपाल आदिवासी जनजाति महासंघ, सिन्धुपाल्चोकया नायः नोर्बु शेर्पा, रत्नगंगा उच्च माविया प्रधानाध्यापक ध्रुवलाल श्रेष्ठं सकल नेपाःमिपिन्सं देयया नामं स्वनातःगु सम्वत नेपाल सम्वतयात छ्यलेमाःगु धयादिल ।
नेवाः देय् दबू, सिन्धुपाल्चोकया नायः हरिकुमार श्रेष्ठया सभाध्यक्षताय् जूगु ज्याझ्वलय् नेवाः देय् दबू सिन्धुपाल्चोक जिल्लाया दुजः भाजु राम बहादुर श्रेष्ठं लसकुस यानादीगु खः ।
ज्याझ्वलय् नेवाः मिसा दबूया केन्द्रिय दुजः रिना श्रेष्ठ, नेवाः मिसाः खलःया नायः दिव्यश्वरी उदासलिसेंया नं उपस्थिती दुगु खः । जिल्ला समन्वय परिषदया ग्वाहालिइ नेपाल आदिवासी
जनजाति महासंघ जिल्ला समन्वय परिषद् सिन्धुपाल्चोकया सहकार्यय् ज्याझ्वः क्वचाःगु खः ।
