Display Style:
Column Style
फुलबारी गांया २१म्ह भुखाय् पीडितयात छेँ
लहनान्यूज | चौलाथ्व पारु ११३७ (मार्च २९ २०१७)
थाइलाण्डका दातातयसं यलस्थित महालक्ष्मी नगरपालिका, फुलबारी गांया भुखाय् पीडितपिन्त छेँ लःल्हाःगु दु ।
थाइ राजदूत भाकवततानस्कुलया उपस्थितिइ करिब ६लाया ई दुने तयार जूगु २१ छेँ भुखाय् पिडितपिन्त लःल्हाःगु खः ।
नाइन सस्टेनेबिलिटी फाउण्डेसनया सुजिन्ताना छान्याथिउसाकुलया कजिसुइ छेँ दयेकेत ग्वाहालि मुंकूगु खः । छेँ दयेकेत सिल्पाकोर्न विश्वविद्यालयया डिन अमृत चासुवानं चित्र अले मूर्तिकला ब्वज्या लिसें लिलाम यानाः धेबा मुंकादीगु खः ।
इनोटेक नेपाल प्रा.लि.या इश्वर जोशीया कजिसुइ क्वचाःगु थुगु परियोजना अन्तर्गत म्ह्वः लागतय् भुखाय् प्रतिरोधी छेँया डिजाइन धाःसा ज्ञानेन्द्र स्थापितया नेतृत्वय् हेभीटेक सेन्टर एआईटी सोलुसनएशियन इन्स्टिच्यूट अफ टेक्नोलोजीं याःगु खः ।
थाईलाण्डं दुहांवःगु थुगु प्रविधि कथंस्थानीय स्रोत साधनयात हे छ्यलाः ब्लक दयेकाः भुखाय् प्रतिरोधी छेँ दयेकूगु खः । ज्याझ्वलय् जस्ताया पौ चिनातःगु छतजाःया निकू कोथा दुगु छेँया ताःचा व दसिपौ थाइल्याण्डया दातातयगु हे ल्हातं भुखाय् पीडित छेँधनीपिन्त लःल्हाःगु खः ।
छेँ ग्वाहालि लःल्हानाकाःपिं आपाःथे भुखाय् पीडितपिन्सं सरकारं बीगु धाःगु राहत आःतक्क मब्यूगु धकाः कुंखिंगु खः ।
असनय् खः ल्वाकाःलि पाहाँचःर्हे क्वचाल
लहनान्यूज | चिल्लागा आमै ११३७ (मार्च २९ २०१७)
थौं पाहाँचःर्हेया स्वन्हुगु लिसें लिपांगु दिं, असनय् खः ल्वाकूगु दु ।
थौं असनय् असंभुलु अजिमाया न्ह्यःने वतुया लुँमधि अजिमा, तेबहाः लुँमधि अजिमा व कंग अजिमाया खः असनय् ल्वाकेगु ज्यालिसें थुगुसीया पाहाँचःहेै नखः क्वचाःगु खः ।
खः ल्वाकेगु झ्वलय् वतु लुँमधि अजिमा व तेबहाः लुमधि अजिमाया दिकातःगु खःयात कंग अजिमां स्वचाः चाःहिलेगु याइ । व धुंकाः तेबाहाः लुँमधि अजिमाया खः व कंग अजिमाया खःया तिप्वाः हिलाबुला यानाकाइ।
द्यःपालाःपिं खः क्वबिइगु न्वः कथिइ च्वय् च्वनाः तिंप्वाः हिलेगु याइ । थुकथं तिंप्वाः हिलाबुला यानाकाइगुयात हे द्यःखः ल्वाकेगु धाइगु खः ।
थथे द्यःखः ल्वाकीगु इलय् असंया छेँया पलिं चतांमरि व्हलेगु नं चलन दु ।
सोमवाः बहनी धाःसा तिंख्यलय् द्यःखः ल्वाकूगु खः । तिंख्यलय् खः ल्वाकीबलय् धाःसा कंग अजिमा व वतु लुँमधि अजिमाया द्यःखःया मुस्याः हिलाबुला याइगु खः ।
थौं यलय् कांम्ह सल ब्वाकीगु
लहनान्यूज | चिल्लागा आमै ११३७ (मार्च २७ २०१७)
थौं सलयाःया झ्वलय् यलय् कांम्ह सल ब्वाकेगु जात्रा जुइत्यंगु दु ।
दँयदँसं चिल्लागा आमाइया दिनस यलया भोलध्वाखा लागाय् जुइगु थुगु जात्रा यलया ओलखु चिबहाः त्वाःया ज्यापुतयगु भिमसेन गुथिं न्ह्याका वयाच्वंगु दु ।
थुगु जात्राय् भिमसेन गुथिया छम्ह गुथियारं सल गयाः ओलखु, न्यउत, ल्वहँल, भ्वलगणेशं बालकुमारीइ हे लिहांवइ । सललिसें सल गइम्हेसित भिन्द्यःया थासं हःगु स्वांमाः क्वखायेकाः पुजा यायेगु चलन दु ।
थुगु जात्रायात थ्वं काःम्ह सल ब्वाकेगु जात्रा नं धायेगु याः । गाक्क थ्वं त्वंकाः मिखां मखंम्ह सल ब्वाकेगु जूगुलिं थुकियात कांम्ह सल ब्वाकेगु धाःगु नं धायेगु याः ।
लिसें थुगु जात्रा याकः सल ब्वाकेगु जात्रा धकाः नं म्हस्यू । थुगु जुजु शिवसिंह देवया पालंनिसें न्ह्याःगु विश्वास यानातःगु दु ।
येँया तिंख्यलय् धाःसा नेपाली सेनाया घोडाजात्रा जुइ । थीथी कथंया बाखंलिसे स्वानाः व्याख्याः यानातःसा थुगु तिनिख्यलय् सल ब्वाकेगु चलन धाःसा राणाकालय् जक न्ह्याःगु खः ।
पाहांचःर्हेया झ्वलय् थौं त्वाःत्वालय् मस्तयत मरःजा नकाच्वंगु दु । कयतापुजा व इहि मयाःनिपिं मस्तयत मरःजा नकेबलय् ल्वचं मथीगु जनविश्वास दया वयाच्वंगु दु ।
थौं पाहाँचःर्हे, लुकमहाःद्यः पुज्यायेगु दिं
लहनान्यूज | चिल्लागा त्रयोदशी ११३७ (मार्च २६ २०१७)
नेवाःतय् तःधंगु जात्रा कथं काइगु पाहाँचःर्हे थौंनिसें न्ह्याःगु दु ।
पाहाँचःर्हेया झ्वलय् थौं नेवाःतय् थःथःगु छेँ लिक्कया चुक, बहालय् लुकमहाःद्यःयात पुज्यायेगु याइ । मेमेगु इलय् ल्हाकाः तयातइम्ह लुकमहाःद्यःयात थौंया दिनय् उलाः पूजा यायेगु याइ ।
लुकमहाःद्यःयात पुज्यायेगु झ्वलय् समयबजि लिसें लाभा घासा तयाः पुज्याइ । थौंया दिनय् वाउँगु लाभा मदयक मगाः ।
लुकमहाःद्यःयात पुज्याइगु इलय् अजः फयाकयाः सकसिया अजः उलेगु नं चलन दु ।
थौं हे त्वाःत्वालय् दुपिं अजिमा द्यःपिन्त खतय् तयाः ब्वयेगु नं याइ ।
कन्हय् धाःसा कयतापुजा मयाःनिपिं मचातयत मरःजा नकी । कन्हय् हे यलय् कांम्ह सल ब्वाकेगु जात्रा नं जुइ ।
कंस असनय् वतुया लुँमरि अजिमा, तेबहाःया लुँमरि अजिमा व कंग अजिमाया द्यःखः ल्वाकेधुंकाः थुगुसीया जात्रा क्वचाइ ।
पिशाच चतुर्दशि नं धाइगु थुगु नखःयात पिशाच चःर्हे धाधां पासा चःर्हे जुयावंगु व उकिं हे अपभ्रम्स जुजुं पाहाँचःर्हे जुयावंगु धापू दु ।
स्यस्यः समाजया स्वक्वःगु दँमुँज्या क्वचाल
लहनान्यूज | चिल्लागा दशमी ११३७ (मार्च २३ २०१७)
स्यस्यः समाज यलया स्वक्वःगु दँमुँज्या यलय् क्वचाःगु दु ।
ज्याझ्वलय् नेवाः तजिलजिया अध्ययन अनुसन्धान ख्यलय् योगदान बिया वयाच्वनादीम्ह हरिराम जोशीलिसें डा. केदारलाल श्रेष्ठयात नं हंगु खः । सम्मानित व्यक्तित्वपिन्त शताब्दि पुरुष संस्कृतिविद् डा. सत्यमोहन जोशीं हनापौ लःल्हानादिल ।
उगु हे ज्याझ्वलय् यल जिल्लाया प्रजिअ दिपक काफ्ले, स्थानीय विकास अधिकारी हेमराज भुषाल, वरिष्ठ प्रहरी उपरीक्षक ठुले राई, प्रहरी निरिक्षक प्रकाश थापा व प्रहरी निरिक्षक गोविन्द पन्थीयात लसकुस याःगु खः ।
पद्मकृष्ण श्रेष्ठंं नेपालभासं अनुवाद यानाः च्वयादीगु श्रीमद्भागवतगीता सफूया उलेज्या नं ज्याझ्वलय् जूगु खः । संस्कृतिविद् जोशीं सफूया उलेज्या यानादिल ।
ज्याझ्वःया मूपाहां संस्कृतिविद् डा. जोशीं सम्मानित व्यक्तित्वपिन्त भिन्तुना देछासें स्यस्यः समुदायं थःगु नेवाः पहिचान ल्यंकातयेमाःगु खँय् बः बियादिल । नेवाःतयसं हे नेवाः भाय् व तजिलजि त्वःता वनाच्वंगु खँय् जोशीं दुःख प्वंकादिल ।
अथे हे यल जिल्लाया प्रजिअ काफ्लेलिसें समाजया निवर्तमान नायः डा.केदारलाल श्रेष्ठं थःथःगु नुगःखँ तयादिल । व हे कथं शिल्पकार समाजया नायः मोतिलाल शिल्पकार, स्यस्यः समाज दमकया मू छ्यान्जे पहलमान श्रेष्ठं भिन्तुना न्वचु तयादिल ।
ज्याझ्वलय् समाजया मू छ्यान्जे सुवर्णमान अमात्यं लसकुस यानादिल । समाजया नायः उत्तमलाल श्रेष्ठया सभाध्यक्षताय् ज्याझ्वः जूगु खः ।
