Display Style:
Column Style
थौं विश्व लः दिवस
लहनान्यूज | चिल्लागा नवमी ११३७ (मार्च २२ २०१७)
थौं मार्च २२, हलिंन्यंक थीथी ज्याझ्वः यानाः विश्व लः दिवस हनाच्वंगु दु ।
थ्व हे झ्वलय् नेपालय् नं थीथी ज्याझ्वःत जुयाच्वंगु दु । दिवसया झ्वलय् लः संरक्षणया ख्यलय् क्रियाशिल संघसंस्थां लःया महत्व व संरक्षणलिसेंया विषयस जनचेतनामूलक ज्याझ्वःत यायेत्यंगु दु ।
लः दिवसया हे झ्वलय् राजधानी येँय् लः सप्ताह नं यायेत्यंगु दु ।
स्वच्छ लः त्वनेगु याःसा ८० प्रतिशत ल्वचं तापाये फइगु विज्ञतयसं धायेगु याः ।
लःया श्रोतया खँय् नेपाल ब्राजिल धुंकाःया निगूगु तःमि देय् खः । तर जलवायु परिवर्तनलिसेंया हुनिं थन त्वनेगु लःया समस्या जुयाच्वंगु दु ।
लःया श्रोतयागु पायछिकथं व्यवस्थापन व सदुपयोग जुइमफूगु नं विज्ञतय् धापू दु ।
थौंकन्हय् येँय् त्वनेगु लःया नितिं मेलम्ची खानेपानीया पाइप लायेगु ज्या न्ह्यानाच्वंगु दु । उकी नं सडक मर्मत व ट्राफिक व्यवस्थापन बांलाक जुइमफुबलय् धू ब्वइगुलिं वायू प्रदुषण व ट्राफिक जामया समस्या आपाः हे जुयाच्वंगु दु ।
सन् १९९३य् संयुक्त राष्ट्रसंघया साधारणसभां २२ मार्चयात विश्व लः दिवसया रूपं घोषणा यायेधुंकाः हलिंन्यंक थुगु दिवस हनेगु याःगु खः ।
लिजःपाखें साहित्यविद् लोहनी सम्मानित
लहनान्यूज | चिल्लागा अष्टमी ११३७ (मार्च २१ २०१७)
थौं मार्च २१, हलिंन्यंक थीथी ज्याझ्वः यासें खुक्वःगु विश्व कविता दिवस हनाच्वंगु दु ।
थ्व हे झ्वलय् लिजः नेपालभाषा कबिता दबुलिं नं येँय् छगू ज्याझ्वः यासें बिश्व कबिता दिवस हंगु दु । साहित्यकार मुना लिसें तुच्चा ज्याझ्वः यासें दबूलिं कविता दिवस हंगु खः ।
उगु हे ज्याझ्वलय् वरिष्ठ अंग्रेजी साहित्यविद् श्रीधर लोहनीयात हंगु नं खः ।
ज्याझ्वलय् नेपालया लागि बंगलादेशया राजदुत मास्फी विन्टे शाम्स लिसें संगीत तथा नाट्यकला प्रतिष्ठानया कुलपति सरुभक्त, नेपाल प्रज्ञा प्रतिष्ठानया प्राज्ञ श्रवण मुकारुङ, बरिष्ठ साहित्यकार बिमल निभा, गीताकेशरी, उषा शेरचन, हितकरबिरसिंह कंसाकारया न उपस्थिती दुगु खः ।
संयुक्त राष्ट्र संघीय निकाय युनेस्कोया आव्हानय् वंगु खुदँ न्ह्यःनिसें हलिंन्यंक विश्व कविता दिवस हनेगु याना वयाच्वंगु दु ।
चीन स्छ्वान शैक्षिक एक्स्पो जुल
नृपेन्द्रलाल श्रेष्ठ | चिल्लागा षष्ठी ११३७ (मार्च १८ २०१७) | लहनान्यूज
चीन स्छुवान प्रान्त शिक्षा विभाग व अरनिको समाज मंकाः ग्वसालय् यलया पूच्वय् मदन स्मारक उच्च माध्यामिक विद्यालयया प्राङ्गणय् “चीन स्छुवान शैक्षिक एक्स्पो” ज्याझ्वः जूगु दु ।
समाजया नायः डा. सर्बोत्तम श्रेष्ठया सभाध्यक्षताय् जूगु ज्याझ्वलय् यलया प्रमुख जिल्ला अधिकारी दीपक काफ्लें एक्स्पोया उलेज्या यानादीगु खः । ज्याझ्वलय् समाजया मू छ्यान्जे डा. सुशील प्रजापतिं स्छुवान प्रान्तय् तःधंगु व चीधंगु यानाः १६गू विश्वविद्यालय दुगु जानकारी बियादिल ।
मू छ्यान्जे प्रजापतिं विश्वविद्यालयपाखें इन्जिनियरिङ्ग, मेडिसिन, व्यवस्थापन, कम्प्यूटर साइन्स, शिक्षा शास्त्रलिसें थीथी विषयस अध्ययनया नितिं अवसर बीगु व सच्छि स्वयां अप्वः छात्रबृत्ति बीगु खँ नं धयादिल । अरनिको समाजया न्हापांम्ह न्वकू डा. मनोजमान श्रेष्ठं छात्रबृत्तिया नितिं अनलाइनपाखें नं निवेदन बीफइगु जानकारी बियादिल ।
ज्याझ्वलय् समाजया नायः श्रेष्ठं थुगु शैक्षिक एक्पोपाखें नेपाःया विद्यार्थीपिन्त चिनियाँ विश्वविद्यालयबारे जानकारी बीगु लिसें उगु विश्वविद्यालयस अध्ययनया नितिं ह्वःताः चूलाकेगु खँ धयादिल ।
अथेहे चीन स्छुवान शैक्षिक एक्स्पो पुचःया प्रमुख वाङ सुङ्चियानं चीनया स्छुवान प्रान्त नेपाःया भौगोलिक रुपं लिक्क लाःगुलिं ग्वाहालिया नितिं ज्याझ्वः न्ह्याकेत नं अःपूगु धयादिल । नेपाःया विद्यार्थीपिन्त थुगु प्रान्तया विश्वविद्यालयस अध्ययन यायेत नं सुङ्चियानं लसकुस यानादिल । चीन स्छुवान प्रान्त शिक्षा विभाग आयोजना व अरनिको समाज सह आयोजनाय् जूगु छन्हुया
ब्लड डोनर्सया नायः महेन्द्रबिलाश जोशी मन्त
लहनान्यूज | चिल्लागा षष्ठी ११३७ (मार्च १८ २०१७) |
ब्लड डोनर्स एसोसिशनया नेपाल (ब्लोदान) या नायःलिसें येँ महानगरपालिका १७ वडाया पुलांम्ह जननिर्वाचित वडाध्यक्ष महेन्द्रबिलास जोशी जुयाः मन्त ।
५६दँया जोशी खोटाङ्गया हलेसी महाद्यःया दर्शन यायेगु झ्वलय् हृदयघात जुयाः अन हे मदुगु खः ।
वयकःया सीम्हयात येँय् हयाः शोभा भगवती कर्णदीपय् दाह संस्कार यायेधुंकूगु दु । अन्तिम संस्कार याये न्ह्यः मदुम्ह जोशीया म्हय् नेकपा एमालेया ध्वाँय् फायेकूगु खः ।
उगु इलय् दीपय् थीथी संघसंस्थाया ब्यक्तित्वपिंलिसें नेवाः न्ह्यलुवापिनिगु उपस्थिति दुगु खः ।
मदुम्ह जोशी सिम्रिक परिवार क्लबया पुलांम्ह नायः नं खः । मदुम्ह जोशीया जहानलिसें निम्ह म्ह्यायपिं दु ।
बिस्काः जात्रा सम्बन्धि अन्तरक्रिया क्वचाल
लहनान्यूज | चिल्लागा षष्ठी ११३७ (मार्च १८ २०१७)
नेवाः पत्रकार राष्टिय दबू ख्वपया कचाया ग्वसालय् थौं ख्वपय् ‘बिस्काः जात्रा, भ्रम व यथार्थ’ विषयक अन्तरक्रिया ज्याझ्वः क्वचाःगु दु ।
ज्याझ्वलय् प्रा.डा. पुरुषोत्तम लोचन श्रेष्ठ, संस्कृतिविद् ओम धौभडेल, संस्कृतिविद् विनोदराज शर्मा, बिस्काः जात्रा सम्बन्धि अध्येता गोपाल धौबन्जारं बिस्काः जात्रा सम्बन्धि ऐतिहासिक दसित न्ह्यब्वयेगु लिसें सामाजिक मान्यताय् आधारीत किम्बदन्तिया विश्लेषण यानादीगु खः ।
ज्याझ्वलय् नवासें प्रा.डा. पुरुषोत्तम लोचन श्रेष्ठं बिस्काः जात्रा धयागु बि अथवा सर्प सिनाः न्यायेकूगु जात्रा ख हे मखूगु दावी यानादिल । थ्व विश्वनाथ भैरवया जात्रा जूगुलिं विश्व जात्रा धाःगु व उकिं हे लिपा वनाः बिस्काः जात्रा जूवंगु वयकःया धापू खः ।
नवदुर्गा द्यः प्याखनय् च्यान्हु पुलांगु हि द्यःयात त्वंकीगु परम्परा ‘बिहि त्वनेगु’या दसु न्ह्यब्वसें डा. श्रेष्ठं ‘बि’या अर्थ पुलांगु अथवा बासि धयागु अर्थय् नं कायेज्यूगु धयादिल । व अर्थय् बिस्काः जात्रा धयागु प्राचीन जात्रा नं खःगु डा. श्रेष्ठं धयादिल ।
अथे हे संस्कृतिविद् विनोदराज शर्मां बिस्काः जात्राया पूजा न्ह्याकेबलय् ‘विश्वजात्रा महापर्वणी’ धकाः संकल्प वाक्य कायेमाःगु जूगुलिं नं थ्व विश्व जात्रा हे खःगु धयादिल । गोपाल धौबन्जारं किम्वदन्तियात पूवंक विश्वास यायेफइगु अवस्था मदुसां सर्प स्याःगुया अर्थ शत्रु नास याःगु अर्थय् कायेफइगु वा उगु इलय् शत्रुयात स्यानाः राज्यया रक्षा याःगु जुइफुगु धयादिल ।
संस्कृतिविद् ओम धौभडेलं बिस्काः जात्रा सम्बन्धि समाजय् प्रचलित थीथी किम्वदन्तिया जानकारी ब्युसें उकिया विश्लेषण नं यानादिल । लिसें धौभडेलं नेपालय् थीथी थासय् न्यायेकीगु बिस्काः जात्राया बारे नं जानकारी बियादिल ।
उकिया लिसें संस्कृतिविद् धौभडेलं बिस्काः जात्राया यःसिँलय् च्वनीगु ध्वजा विश्वया दक्कले ताःहाकःगु ध्वजा व नेपाःया झण्डायात हलिंया दक्कले पुलांगु राष्ट्रिय ध्वाँय् कथं गिनिज रेकर्डया नितिं दाबी यायेमाःगु धयादिल ।
ज्याझ्वलय् दबू ख्वप कचाया छ्यान्जे सिमान्त शिल्पकारं लसकुस न्वचु ब्युसें ज्याझ्वःया उद्देश्यबारे नं कनादीगु खः ।
