Display Style:
Column Style
हरिसिद्धिइ नेपाःया दक्कले पुलांगु प्याखं क्यन
लहनान्यूज | चिल्लाथ्व पुन्हि ११३७ (मार्च १२ २०१७)
देयन्यंक फागु पुन्हि हनाच्वंगु इलय् थौं जलय् धाःसा नेपाःया दक्कले पुलांगु द्यःप्याखं धयातःगु जलप्याखं अर्थात हरिसिद्धि प्याखं क्यंगु दु ।
विक्रम सम्वत न्ह्याये स्वयां न्ह्यः हे न्ह्याःगु धयातःगु थुगु प्याखं दथुइ दिना वनेधुंकाः अमर मल्लं हाकनं न्ह्याके ब्यूगु इतिहासय् उल्लेख दु । न्हापा सम्वाद सहितया नाटकया रुपय् न्ह्यब्वया वयाच्वंगु थुगु प्याखं लिपा वयाः भावनृत्यया रुपय् ह्यूगु विज्ञतय् धापू दु ।
हरिसिद्ध नाच, जँलू द्यःया प्याखं धकाः नं म्हस्यूगु थुगु प्याखं यल स्वनिम्ह त्वाःया राजोपाध्याय कुलया नांजाःम्ह तान्त्रिक गुरु गयो जुजुं फूच्वं हरिसिद्धि द्यःयात स्थापित याकाः प्रचलनय् हःगु प्याखं कथं कयातःगु दु ।
रामायणया आरण्य काण्ड व किस्किन्धा काण्डय् आधारित प्याखं १८ब्वय् ब्वथलाः न्ह्यब्वयेगु याइ ।
सुग्रीवपाखें बालीया वध, नारदं सुग्रीव व ताराया हाकनं इहिपाः याकाब्यूगु, मालीं स्वांमाः हयाः हनुमानयात ब्यूगु लूलिसें क्वचाइगु प्याखनय् वाद्यवादनपाखे दमोखिं, प्वांगा, भुस्याहा, छुस्याहा व ताः थायेगु याइ ।
थुगु प्याखं सन्तान मदुपिनिगु नितिं नं विशेष महत्व दुगु प्याखं खः । प्याखंया न्हापांगु चरणया स्वक्वःगु खुसीया दिपाःया इलय् सुनां न्हापांगु खुसी द्यःयात भागियायेत ताःलाइ वया सन्तान दइ धइगु जनविश्वास दया वयाच्वंगु दु ।
राष्ट्रिय सम्मानलिसें गौतमया अन्त्येष्टि जुल
लहनान्यूज | चिल्लाथ्व पुन्हि ११३७ (मार्च १२ २०१७)
भारतीय सीमा सुरक्षा बल एसएसबीं कयेकूगु गोलिं लानाः मदुम्ह कञ्चनपुर पुनर्वासया गोविन्द गौतमया अन्त्येष्टि थौं राष्ट्रिय सम्मानलिसें याःगु दु ।
गौतमया अन्त्येष्टि कञ्चनपुरया दोदा खुसि सिथय् याःगु खः । अन्त्येष्टीइ गौतमयात ११ तोपया सलामी ब्यूगु खः ।
गौतमयात वयकःया अबुजु ७२दँया खेमलाल गौतमं मि तयादिल ।
थ्वया न्ह्यः गौतमया शवयात्रा याःगु खः । सेती अञ्चल अस्पताल धनगढीं न्ह्याःगु शवयात्राय् द्वलंद्वःम्ह सनाःवंगु खः ।
सीमा लिक्क दयेकूगु कल्भर्ट विवादय् भारतीय प्रहरीं कयेकूगु गोलिं लानाः वंगु बिहीबार गौतम मदुगु खः ।
थौं न्हिनय् हे मापसे जाँच
लहनान्यूज | चिल्लाथ्व पुन्हि ११३७ (मार्च १२ २०१७)
अबीरया नखः होलिया झ्वलय् सुरक्षायात ध्यानय् तयाः प्रहरीं विशेष सतर्कता नालाकाःगु दु ।
सुरक्षायात ध्यानय् तयाः स्वनिगः दुने तःधंगु ल्याखय् प्रहरी परिचालन याःगु दु । होलीया लागिं धकाः तँसा ३द्वः प्रहरी परिचालन यानागु महानगरीय प्रहरी आयुक्तया ज्याकुथिं न्ह्यथंगु दु ।
सुरक्षा जाँचय् बर्दि फिनातःपिं प्रहरी व ट्राफिक प्रहरी खटे जुयाच्वंगु दु । अथे हे सादा वसतय् तकं तःधंगु ल्याखय् प्रहरी परिचालन याःगु दु ।
होलीया दिनय् थौं न्हिनय् हे मापसे चेकिङ नं जुयाच्वंगु दु । होलीइ जबरजस्ती लोलां कयेकेगु, लखं छ्वाकेगु अले रंगं इलाबीपिन्त सार्वजनिक अपराधय् मुद्दा न्ह्याकेगु प्रहरीं न्ह्यथंगु दु ।
सार्वजनिक मुद्दाय् दछि कैद व १०द्वः तकातक्क जरिवाना पुइकी । तर, थुगुसी प्रहरीं २५द्वः तका जरिवाना क्वःछ्यूगु दु ।
देयन्यंक होलि नखः हनाच्वन
लहनान्यूज | चिल्लाथ्व पुन्हि ११३७ (मार्च १२ २०१७)
स्वनिगः लिसें देय्न्यंक हे धैथें थौं फागु नखः थवंथवय् रंगं इलाः न्ह्यइपुक फागु नखः हनाच्वंगु दु ।
वसन्त ऋतुया आगमनया सुरुवातय् वइगस फागु नखः पुचः पुचः मुनाः थवंथवय् रंग इलेगु लिसें म्ये हालाः प्याखं हुलाः हनेगु याइ । थौंया दिनय् थीथी थासय् सांगितिक ज्याझ्वःया ग्वसाः ग्वयाः नं फागु हनाच्वंगु दु ।
सत्य युगय् नारायण द्यःया भक्त थः काय् प्रल्हादयात स्यायेत धकाः हिरण्यकश्यपुं मिं मथीगु व मसीगु वरदान चूलाःम्ह केहेँ होलिकाया मुलय् प्रल्हादयात फ्यतुकाः मिइ तयाब्यूबलय् प्रल्हादयात छुं मथ्यूगु तर होलीका च्यानाः नौ जूगु किम्वदन्ति थुगु नखःलिसे स्वानाच्वंगु दु ।
असत्यय् सत्यं विजय प्राप्त याःगु थ्व हे घटना धुंकाः होली हनेगु याःगु जनविश्वास दु ।
तराईलय् धाःसा पुन्हिया कन्हय् कुन्हु फागु हनेगु याइ । थीथी समुदायया बसोबास दुगु तराईलय् निन्हु स्वन्हु हनेगु चलन दु ।
एन प्याब्सन यलया स्वक्वःगु अधिवेसन क्वचाल
लहनान्यूज | चिल्लाथ्व चतुर्दशि ११३७ (मार्च ११ २०१७)
निजी बिद्यालयं गुणस्तरीय शिक्षा सर्वसुलभ यानाच्वंगु ज्याया कदर राज्यं यायेमागु खँय् बः ब्युसें एन प्याब्सन यल जिल्लाया स्वक्वःगु जिल्ला अबिधेसन यलय् क्वचाःगु दु ।
ज्याझ्वःया मूपाहां लिसें नेशनल प्याब्सनया केन्द्रीय नायः कर्णबहादुर शाहीं निजी बिद्यालयं शिक्षा ख्यलय ब्यूगु योगदानयात राज्यं नकारात्मक कथं कायेमज्यूगु धयादिल । अथेहे यल जिल्लाया प्रमुख जिल्ला अधिकारी दिलनाथ पुरीं ऐन, नियम दुने च्वनाः निजी बिद्यालयं बिद्यार्थीतयत शुल्क कायेमाःगु बिचाः तयादिल ।
ज्याझ्वलय् नेशनल प्याब्सनया यल जिल्ला नायः राजेश महर्जनं देशया शिक्षाया बिस्तार व सर्वसुलभ यायेत सरकारं निजी बिद्यालयया संगठनया बिश्वास नं कायेमाःगु खँय् बः बियादिल ।
न्हूगु नेतृत्वय राजेश महर्जन
एन प्याब्सन यलया थौं क्वचाःगु अधिवेशनं राजेश महर्जनया हे नेतृत्वय् न्हगु ज्यासना ल्यःगु दु ।
निदँया लागिं ल्यःगु न्हूगु कार्यसमितिइ बरिष्ठ न्वकू हरि सैढाई, मेपिं न्वकुलिइ गोबिन्द पोखरेल, बिकेश महर्जनयात ल्यःगु दु । अथे हे छ्यान्जेय् तारा सापकोटा, दांभरिं संगम महर्जन, ल्यू छ्यान्जे जितबहादुर क्षेत्री, ल्यू दांभरिं पदय् रमेश कोइराला चयन जूगु दु ।
दुजलय उमिता बज्राचार्य, रेणुका बज्राचार्य, गोपाल अधिकारी, बिकास महर्जन, सीपी पराजुली व सिंहराज थापायात ल्यःगु दु ।
