Display Style:
Column Style
नेपाल संवतया आन्दोलन सम्बन्धि प्रशिक्षण
लहनान्यूज सम्वाददाता | कछलागा सप्तमी ११३७ (नोभम्बर २१ २०१६)
नेपाल संवतयात कयाः जूगु आन्दोलनयात कयाः प्रशिक्षण ज्याझ्वः याइगु जूगु दु ।
नेपाल संवत राष्ट्रिय न्हूदँ समारोह समिति ११३७ या सोमवाः च्वंगु मुँज्यां प्रशिक्षण ज्याझ्वः यायेगु क्वःछ्यूगु खः । समारोह समितिया नायः सांसद भीमसेनदास प्रधानया सभापतित्वय् जूगु मुँज्याय् प्रशिक्षण ज्याझ्वःया नितिं संयोजक व्यवस्थापन समितिया दुजः नवीन मानन्धरयात भाला ब्यूगु दु ।
भाजु मानन्धरं बियादीगु जानकारी कथं थीथी राजनीतिक पार्टीइ आवद्ध ल्याय्म्ह नेवाः कार्यकर्तापिन्त नेपाल संवतया महत्व व थुगु ख्यलयया आन्दोलनयात कयाः प्रशिक्षण बीत्यंगु खः । प्रशिक्षणया नितिं न्हूदँ समारोह समितिया पुलांम्ह नायः इतिहासविद् डा. त्रिरत्न मानन्धर व नेवाः न्ह्यलुवाः मल्ल के. सुन्दरयात प्रशिक्षकया रुपय् ब्वनेगु क्वःज्यूगु मानन्धरं कनादिल ।
ज्याझ्वः वइगु ने.सं. ११३७ थिंलाथ्व एकादशी (डिसेम्बर १० २०१६) जुइगु जानकारी नं वयकलं बियादीगु दु ।
नोभम्बर २१, थौं विश्व टेलिभिजन दिवस
लहनान्यूज सम्वाददाता | कछलागा सप्तमी ११३७ (नोभम्बर २१ २०१६)
थौं नोभम्बर २१, हलिंन्यंक थीथी ज्याझ्वः यासें विश्व टेलिभिजन दिवस हनाच्वंगु दु ।
१७ डिसेम्बर १९९६य् च्वंगु संयुक्त राष्ट्रसंघया महासभां दँयदसं २१ नोभेम्बरया दिंयात विश्व टेलिभिजन दिवस कथं हनेगु क्वःछ्यूगु खः ।
सन् १९३०या दशकय् प्रसारण टेलिभिजन प्रविधिया शुरुवात जूगु खः । संचार ख्यलय् दक्कले सशक्त माध्यमकथं थौंकन्हय् टेलिभिजनयात हे कायेगु याः ।
टेलिभिजनया इतिहासय् सन् १९३६ नोभेम्बर २ निसें बीबीसीं नियमित प्रशारण याःगु खः । सन् १९५४ निसें रंगिन टेलिभिजनया विकास जूगु खः ।
सन् १९७० या दशकय् हलिंया ६० देशय् टेलिभिजन सेवा विस्तार जुल । नेपालय् सन् १९७० पाखे टेलिभिजन सेटत दुहांवःगु खः ।
नेपालया दक्कले न्हापांगु टेलिभिजन च्यानल नेपाल टेलिभिजनया स्थापना धाःसा २०४१ साल माघ १७ गते जूगु खः ।
नेपालय् थौंकन्हय् २ दर्जनं मल्याक्क टिभि च्यानल न्ह्यानाच्वंगु दु । व मध्ये मुक्कं नेवाः च्यानल कथं नेपालमण्डल टेलिभिजन नं न्ह्यानाच्वंगु दुसा थौंकन्हय् नेपाल इन्डिजिनियस टेलिभिजन नामं आदिवासी जनजाति च्यानलया नं परीक्षण प्रसारण न्ह्यायेधुंकूगु दु ।
ज्यापु दिवस तःजिक हनेत सहलह
लहनान्यूज सम्वाददाता | कछलागा पंचमि ११३७ (नोभम्बर १९ २०१६)
१३क्वःगु ज्यापु दिवस तःजिक हनेगु नितिं थौं येँय् ज्यापु संस्कृति विकास कोषया ग्वसाः व कमलादी गणेश जमःमि गुथिया कजिसुइ छगू सहलह ज्याझ्वः जुल ।
जमःमि गुथिया नायः लिसें थुगुसीया ज्यापु दिवसया कजि राम महर्जनया अध्यक्षताय् जूगु ज्याझ्वःया उलेज्या पूर्वमन्त्री लिसें नेवाः न्ह्यलुवा तीर्थराम डंगोलं त्वाःदेवाय् मत च्याकाः यानादिल ।
लसकुस यासें १३क्वःगु ज्यापु दिवसया ल्यू कजि रविन महर्जनं थुगुसीया ज्यापु दिवसया नितिं तयारीया विषयस कनादिल । ल्यू कजि महर्जनं ज्यापु दिवसया तयारी लिसें प्रचार प्रसारया झ्वलय् सुकुन्दा र्याली, साइकल र्याली थुज्वःगु ज्याझ्वःत नं जुइगु जानकारी बियादिल ।
जमः मिसा पुचःया नकिं बिमला महर्जन, ज्यापु संस्कृति विकास कोष, मखंया निमित्त नायः मंगलकृष्ण सिं, नारायण परीवार क्लबया का.नायः प्रचण्डमान बज्राचार्य, ज्यापु महागुथि, येँ महानगर समितिया नायः बाबुराजा महर्जन, श्री ज्यापु महागुथिया नायः सन्तु महर्जन, १२क्वःगु ज्यापु दिवसया संयोजक तीर्थमान महर्जन लिसें पूर्वमन्त्री तीर्थराम डंगोलं १३क्वःगु ज्यापु दिवसया सफलताया भिंतुना ब्युसें ज्याझ्वःयात झःझः धायेकेत थीथी सल्लाह सुझाव नं बियादीगु खः ।
मोतिलानी सिरपाः लःल्हात
लहनान्यूज सम्वाददाता | कछलागा पंचमि ११३७ (नोभम्बर १९ २०१६)
ने.सं. ११३५ व ११३६ स एस.एल.सीं निसें स्नातकोत्तर तगिंतक्क नेपालभाषा बिषय कयाः दक्कले अप्वः ल्याः हयाः छक्वलं ताःलाःपिं विद्यार्थीपिन्त थौं येँय् मोतिलानि सिरपाः लःल्हाःगु दु ।
मोतिलानि सिरपाः गुथिया ग्वसालय् थौं येँय् जूगु ज्याझ्वलय् नेवाः बस्ती नेवाः स्कूल अभियानया अभियन्ता दिपक तुलाधरं विद्यार्थीपिन्त सिरपाः लःल्हानादिल । अथे हे मदुम्ह मोतिलानि ताम्राकारया म्ह्याय् लिसें मोतिलानि सिरपाःया संरक्षक ज्ञानुशोभा तुलाधरं तका सिरपाः लःल्हानादिल ।
एस.एल.सी. परीक्षाय् नेपालभाषा कयाः दक्कले अप्वः ल्याः हःम्ह कथं ने.सं. ११३५या नितिं कन्या मन्दिर मा.वि.या सरिना महर्जनयात व ने.सं. ११३६ या नितिं आदर्श मा.वि. थिमिया अनिता प्रजापतियात हन । अथे हे १०.२ तगिमय् ने.सं. ११३६ या नितिं मंगलोदय उच्च मा.वि.या निशा प्रधानयात सिरपाः लःल्हाःगु ख ।
व हे कथं स्नातक तगिंया नितिं ने.सं. ११३६ या नितिं पाटन संयुक्त क्याम्पसया बसन्त राज शाक्ययात सिरपाः ब्यूग खः । स्नातकोत्तर तगिमय् ने.सं. ११३५ या नितिं दिपा महर्जनयात व ने.सं. ११३६ या नितिं भरत महर्जनयात सिरपाः लःल्हाःगु खः ।
दिपक तुलाधरं त्वाःदेवाय् मत च्याकाः उलेज्या यानाद्यूगु ज्याझ्वलय् सिरपाः गुथिया दुजः दिव्या ताम्राकारं लसकुस यानाद्यूगु खः ।
थःगु मांभासं शिक्षा काःसा याकनं व बांलाक थुइके सयेके फइगु खँय् सिरपाः त्याकामि विद्यार्थीपिन्सं बः ब्यूगु खः ।
नुगः खँ तयेगु झ्वलय् नेवाः बस्ती नेवाः स्कूल अभियानया अभियन्ता लिसें मोडर्न नेवाः इंगलिस स्कूलया नायः दिपक तुलाधरं मातृभाषा शिक्षाया अधिकारया खँ संविधानय् हे सुनिश्चित याकेमाःगु खँय् बः बियादिल । राज्यं हे स्थानीय ब्वनेकुथिइ स्थानीय मातृभाषा शिक्षा लागू याकेमाःगु तुलाधरया धापू खः ।
त्रिशुलिया लक्ष्मण नेवाःयात येँय् हन
लहनान्यूज सम्वाददाता | कछलागा पंचमि ११३७ (नोभम्बर १९ २०१६)
त्रिशुलिया भाषासेवी लिसें समाजसेवी लक्ष्मण नेवाःयात थौं येँय् त्रिकास बचत तथा ऋण सहकारी संस्थां हंगु दु ।
ज्याझ्वलय् भाजु श्रेष्ठयात हनापौ लिसें दोसल्लां न्ययेकाः हंगु खः । जनकवि दुर्गालाल श्रेष्ठं सम्मानित भाजु श्रेष्ठयात हनापौ लःल्हानादिल ।
त्रिशुलिइ नेपालभाषा व नेवाः तजिलजिया संरक्षण, सम्वद्र्धन व प्रवद्र्धनय् बियादीगु योगदानया नितिं भाजु नेवाःयात हंगु खः । श्रेष्ठयात त्रिशुलिया लिसें येँया थीथी संघसंस्थां नं खादां न्ययेकेगुया लिसें हनापौ लःल्हानाः हंगु खः ।
ज्याझ्वलय् शाक्य सुरेनं सम्मानित श्रेष्ठया म्हसिका न्ह्यब्वयादिल । अथे हे जनकवि दुर्गालाल श्रेष्ठ, नेवाः न्ह्यलुवा मल्ल के. सुन्दर, वरिष्ठ संगीतकःमि रामकृष्ण दुवाल, संस्कतिविद् चुन्दा बज्राचार्य लिसें नं श्रेष्ठया भाषिक, सामाजिक व सांस्कृतिक लिसें शैक्षिक ख्यलय् योगदानया बिषयस चर्चा यानादीगु खः ।
