ज्यापु दिवस तःजिक क्वचाःगु दु। ज्यापु दिवस २० क्वःगु लसताय् त्यंगलं छगू ¥याली पिकया बसन्तपुलिइ सभा जुगु खः ।

उगु सभाय् मूपाहां कथं प्रधानमन्त्री पुष्पकमल दाहालं ब्वति कयादीगु खः । ज्याझ्वलय् प्रम दाहालं नेपाःया विविध जाति, भाषाभाषी व सस्कृति हे नेपाःया मौलिक व गौरव खः धासें थुकिया जगेर्ना यायेगु झी फुकसियां जिम्मेवारी खः धयादिगु खः। नखः चखः, जात्रा पर्व व सांस्कृतिक सम्पदा व गतिविधि नेपाःया अमूल्य सम्पत्ति खः धासें वय्कलं नेपाः जातीय, भाषिक, धार्मिक सांस्कृतिक विवधतां जाःगु देय् जूगुलिं फुक्कं समुदायं संस्कृतियात जीवनया अभिन्न अंगया रुपय् काःगु खँ नं धयादिल ।

ज्यापु दिवस २० क्वःगु लसताय् ज्याझ्वः त्यंगः त्वालं आपालं बाजागाजा, थःथःपिनि त्वाःया ब्यानर सहित ¥याली शुरु जूगु खः । ज्यापु संस्कृति विकास कोषया ग्वसालय् थ्व दिवस न्यायेका वयाच्वंगु खः ।

कोषया नायः मंगलकृष्ण सिंहया सभाध्यक्षताय् जूगु उगु ज्याझ्वलय् २० क्वःगु ज्यापु दिवसया संयोजक लिसें त्यंगः त्वाः खलःया अध्यक्ष धनबहादुर महर्जनं लसकुस यानादीगु खः । ज्याझ्वलय् थीथी व्यक्तियात हनेगु लिसें सिरपाः बीगु ज्या नं जूगु खः ।

संस्कृति, सम्पदा संरक्षण, स्थानीय विकास व नेवाः समुदायया हकहितय् पत्रकारितापाखे महत्त्वपूर्ण योगदान यागुलि पत्रकार कृष्ण किसीयात ज्यापू युवा प्रतिभा (सञ्चार) पाखे हंगू दु।

योमरी पुन्हिया दिं थौं २० क्वःगु राष्ट्रिय ज्यापु दिवसया लसताय् ज्यापु संस्कृति विकास कोषं उगु हनेज्या याःगु खः। उगु ज्याभ्वलय् मूपाहाँ प्रधानमन्त्री पुष्पकमल दाहाल ‘प्रचण्ड’ न पत्रकार किसीयात हनापौ नाप नगद १० हजार लःल्हाःगु खः।

नेपाःया संविधान व भाषा आयोगया सिफारिस कथं नेपालय् प्रदेशया सरकारी कामकाजि भाषाया कथं लागू यायेफइगु भाषा धकाः सिफारिस याना तये धुंकूगु दु । उगु सिफारिस कथं हे बाग्मती प्रदेशय् नेपालभाषा व तामाङ भाषायात सरकारी कामकाजि भाषा दयेकेगु नितिं माःगु कथंया ऐन तकं जारी जुइ धुंकूगु दु।

नेपाःया न्हय्गू प्रदेश मध्ये भाषाया सवालय् ऐन दयेकूगु न्हापांगु प्रदेश हे बाग्मती प्रदेश जुया बिःगु दु। बाग्मती प्रदेशया थुगु कथंया ज्यायात मेमेगु प्रदेशपाखें नं ध्यान तया थःपिनिगु नं योजना दयेका न्ह्याः वनेगु कुतः यानाच्वंगु दु । बाग्मती प्रदेशया सरकारी कामकाजि भाषाया कथं नेपालभाषा व तामाङ भाषायात लागू यायेगु नितिं प्रदेशं राष्ट्रभाषा ऐन दयेकेगु ज्या जुइ धुंकूगु दुसा उगु ज्याया नितिं महत्वपूर्ण भूमिका म्हितादीम्ह बाग्मती प्रदेशया संस्कृति, पर्यटन नापं सहकारी मन्त्री पुकार महर्जन व उगु ज्याया नितिं जनस्तरं भूमिका म्हितादीम्ह नेवाः देय् दबू स्वनिगः विशेष प्रदेशया नायः, अभियान्ता नापं पत्रकार श्रीकृष्ण महर्जनयात मानन्धर समुदायपाखें हनेगु नापनापं सुभाय् पौ लःल्हाःगु खः।

बाग्मती प्रदेशया संस्कृति, पर्यटन नापं सहकारी मन्त्री पुकार महर्जनं प्रदेशया मन्त्री मण्डलया बैठकय् विधयेक पेश यायेगु नाप नापं संसदय् तकं पेश याना गुगु कथं नेतृत्वदायी भूमिका म्हितूगुलि अथे कदर याना सुभाय पौ लःल्हानागु नापं लिपा लिपा नं नेवाः भाषा, संस्कृति नापं नेवाः समुदायया नितिं योगादन याये फयेमा धकाः उल्लेख यानातःगु दु । उगु इलय् मन्त्री महर्जनं भाषा ऐनयात लागू याकेगु नितिं अझ नं थःम्हं माःगु कथं भूमिका म्हितेमानीगु अवस्था दु धयादिसें आःया ई धैगु उकियात कार्यान्वयनया नितिं नियमावली दयेकेगु नितिं थः सक्रिय जुयाचवनागु दु धकाः धयादिल ।

अथे हे उगु विधेयक संसदय् न्ह्यब्वयेगु नितिं अभियान न्ह्याकेगु नाप नापं जनस्तरय् तकं थुगु कथंया ऐनया नितिं मदिक्क भूमिका म्हितादीगुलिं धकाः अभियन्ता नाप नापं पत्रकार महर्जनयात हनागु जुल धकाः धासें लिपा लिपा नं थुगु हे कथं नेवाः भाषा, संस्कृति नापं नेवाः सभ्यताया नितिं ज्या याये फयेमा धकः तकं सुभाय् बियातःगु दु । बाग्मती प्रदेशया कामकाजि भाषाया रुपय् नेपालभाषा व तामाङ भाषायात नाले धुंकाः आः स्थानीय सरकारं नं थःपिनिगु नितिं भाषाया कानुन निर्माण यायेमाःगु ई वःगु द दु धयादिेसें माःगु कथंया भूमिका म्हितेगु जुइ धकाः नेवाः अभियन्ता महर्जनं उगु ज्याझ्वलय् बिचाः प्वंकादीगु खः ।

पञ्चवीर सिंह सिरपाः प्रेमलक्ष्मी तुलाधर व आनन्दमुनि वज्राचार्ययात लःल्हाःगु दु। दँयद्सं ‘नेपालभाषा टाइम्स’ न्हिपतिइ पिहां वइगु बुद्ध धर्म सम्बन्धी च्वसुत मध्ये उत्कृष्ट जूपिं छम्ह मिसा व छम्ह मिजं च्वमियात थुगु सिरपाः बियावयाच्वंगु खः ।

थुगुसी मिसापाखे तुलाधर व मिजंपाखे वज्राचार्यं थुगु सिरपाः त्याकादीगु खः । उगु ज्याझ्वलय् मूपाहां कथं प्रा. प्रेमशान्ति तुलाधरं थःगु नुगःखँ तसें नेपालय् थेरवादी बुद्ध धर्म व महायानी बुद्ध धर्मया आरम्भ नेपालभाषां हे च्वयाः जूगु खँ न्ह्यथँसें नेपालभाषा व बुद्ध धर्म धइगु छम्ह हे मनूया निपा तुति थें खः धयादिल । बुद्ध धर्मया प्रचार यायेत पिहां वःगु ‘बुद्ध धर्म व नेपालभाषा’, ‘धर्मदूत’ थेंज्याःगु पत्रिकातय्सं नेपालभाषाया आपालं साहित्यकारत जन्म याःगु खँ न्ह्यथँसें वय्कलं बुद्ध धर्मया साहित्यिक इतिहास च्वयेमाःगु बिचाः नं न्ह्यथनादिल ।

अथेहे विशेष पाहां कथं झाःम्ह बागमती प्रदेशया सांसद शैलेन्द्र वज्राचार्यं बौद्ध धर्मावलम्बी व नेवाःतय्सं राजनीतिइ नं चिउताः तयेमाःगु खँ कँसें थौंकन्हय् थम्हं बागमती प्रदेशया संसदय् ध्यान भावनाया खँ तयेगु यानाच्वना धयादिल । सिरपाःया दाता पञ्चवीर सिंह तुलाधरं थम्हं बौद्ध भिक्षु व भिक्षुणीपिनि लागिं १ करोड ११ लाख ११ हजार १११ तकाया अक्षय कोष पलिस्था यानागु खँ न्ह्यथँसें आः कोषया दां बढे यानाः ५ करोड थ्यंकेमाःगु बिचाः तयादिल । लिसें वय्कलं बुद्ध धर्म व नेपालभाषाया सेवाय् थः सदां समर्पित जुयाच्वनेगु बचं नं बियादिल ।

ज्याझ्वलय् निर्णायक मण्डलया दुजःपिं डा. गौतमवीर वज्राचार्य, उपप्रा. मदनरत्न मानन्धर व साहित्यकार लोचनतारा तुलाधरं थुगुसी दुहां वःगु च्वसुतय् बारे समिक्षा यानादिगु खः । अथे हे ‘नेपालभाषा टाइम्स’ या सम्पादक सुरेश किरण व ईलोहं लय्पौया सम्पादक नरेशवीर शाक्यपिंसं नं नुगःखँ तयादिल ।

येँ महानगरपालिकाय् सूचीकृत जूपि ६६ म्ह मेलमिलापकर्ता तय्त उपप्रमुख सुनिता डंगोलं शपथ याकूगु दु। राष्ट्रिय सभा गृहय् ‘मेलमिलापकर्ताया शपथ व अभिमुखीकरण’ ज्याझ्वः जूगु खः। न्ववायेगु झ्वलय् उपप्रमुख नापं न्यायिक समितिया संयोजक डंगोलं धयादीगु दु, ‘गुलि ल्याखय् मेलमिलापया सत्र सञ्चालन जुल, वः झीगु लागि लिच्वः मखु।

सत्रपाखे गुलि विवाद मेलमिलाप जुइ धुकुगु दु। व लिच्वः खः।’ फुटबल कासाय् प्रतिस्पर्धाया उदाहरण बियादीसे धयादीगु दु, ‘कासा त्याकेगु लागि मैदानय् म्हितिइगु कासा मखु, पोष्टय् गोल याःगु ल्याखाय् खः।’ स्थानीय सरकारय् न्यायिक निरुपणय् गहन जिम्मेवारी दु धका धयादीगु खः।

उगु झ्वलय् न्यायिक समितिया सदस्य नापं वडा नं. २९ या अध्यक्ष कुश ढकालं, विवाद अदालतय् थ्यःगु विषय विमुख जुइ धुकुगुलि पीडितं न्याय कायेत थाकूगु दु धका धयादीगु खः।