सच्छि दँलिपा दोलखाय् यलया हरिसिद्धि झीनिदँया जात्रा दोलाखाय् सञ्चालन जुगु दु।

वंगु सोमवाःनिसे दोलखाय् यलया हरिसिद्धि भवानी द्यःप्याखँ सञ्चालन जुगु खः।

यलया हरिसिद्धि त्रिशक्ति भवानी झीनिदँया जात्रा येँ, यल, पन्ति, दोलखा लगायत थीथी थासय् यकेमागु परम्परा दु।

कन्ह्यः तक दोलखाय् जात्रा सञ्चालन जुइ। वया लिपा येँया पशुपतिइ हइगु जुगु दु। पशुपतिइ २७ गते तक जात्रा सञ्चालन याना वया लिपा पन्तिइ वइगु २८ गते तक जात्रा जुइ।

२८ गते सांस्कृतिक परिक्रमा याना २९ व ३० गते हरिसिद्धि डबली, पन्तिइ द्यः प्याखँ हुइकिइ जुगु दु। अथेहे, वैशाख १ गते हरिसिद्धि द्यः छेँय् पूजा याये धुका क्वचाइकिइगु जुगु दु।

नेपालय् हरिसिद्धि त्रिशक्ति भवानीया ख्वाःपाः प्याखं दकलय् पुलागु तान्त्रिक प्याखं पुलागु धका वंशावलीइ उल्लेख दु।

नेपाल आयल निगमं इन्धनया भाः हाकन थकाउगु दु।

म्हिगः चान्ह्यः १२ बजे निसे लागु जुइगु कथं निगमं पेट्रोल, डिजल व मचिकंया भाः लिटरय् न्यातका थकाउगु दु ।

थ्व नाप आः पेट्रोल लिटरं १६० रुपैयाँ थ्यंगु दु सा डिजल व मचिकं लिटरं १४३ थ्यंगु दु। अथेहे न्हापा १५ सय ७५ रुपैयाँ जुगु जाः थुइगु ग्यास आः सिलिण्डरय् १६ सय रुपैयाँ थ्यंगु दु।

निगमया सह–प्रवक्ता पुस्कर कार्कीया कथं आः पेट्रोलया भाः लिटरं १८२ रुपैयाँ ९८ पैसा तुगु दुसा मचिकं १३६ रुपैयाँ ३१ पैसा व डिजेल १७१ रुपैयाँ लागतया दु।

स्वचालित कथं भाः जुलकि पेट्रोल लिटरं १८२ रुपैयाँ ९८ पैसा थ्यनिइगु जुइफु। अथेहे ग्यासया भाः स्वचालित जुलकि २५ सय ३२ रुपैयाँ तक थ्यनेफु धका धायगु दु।

वंगु २४ घण्टाया दुने देयन्यक थप २४ म्हेसित कोरोना भाइरसया सङ्क्रमण पुष्टि जुगु दु।

पीसीआर व एन्टिजेन याना ५ हजार ५ सय ८७ म्हेसिगु नमुना परीक्षण याउगुलि २४ म्हेसित सङ्क्रमण पुष्टि जुगु दु धका स्वास्थ्य तथा जनसङ्ख्या मन्त्रालयं धाउगु दु।

अथेहे २४ घण्टाय् ५१ म्ह कोरोनामुक्त जुगु दु।

प्रेस काउन्सिल नेपालं पत्रकार ऋषि धमलायात २४ घण्टे स्पष्टीकरण न्यंगु दु।

प्रधानमन्त्री शेरबहादुर देउवाया भारत भ्रमणया झ्वलय् नेपाल एअरलाइन्सया जहाज दुने अमर्यादित व असभ्य क्रियाकलाप याउगु धासे काउन्सिलं प्राइम टाइम्स टेलिभिजनया पत्रकार ऋषि धमलायात स्पष्टीकरण न्यंगु दु।

प्रधानमन्त्री देउवा भारत भ्रमण क्वचायका स्वदेश लिहावयेगु झ्वलय् विमान दुने हे अनुमति मकासे व विमानया कर्मचारीपिनिगु दृष्य खिचे नाप प्रधानमन्त्रीयात नाप लाये मिले मजु धाय्क धाय्क धमलां जबरजस्ती दृश्य खिचे याना सम्प्रेषण याउगु धासे काउन्सिल अथे धाउगु दु।

पत्रकार रत्न श्रेष्ठया फोटो ब्बज्या थौंनिसे न्ह्यात थिमिया फोटो पत्रकार रत्न श्रेष्ठं कयातःगु थिमि जुइगु जात्राया फोटो ब्बज्याया उलेज्या येँ महानगरपालिकाया मेयर बिद्यासुन्दर शाक्यं छगु ज्याझ्वः दथुइ उलेज्या यानादीगु दु।

उगु ज्याझ्वलय् थिमि जुइगु थीथी जात्राया बिषय छगु पत्रकार सम्मेलन न जुगु खः। मध्यपुर थिमी नगरपालिकां थःगु ऐतिहासिक नखः ‘थिमि जात्रा’यात न विश्व सम्पदा धलय् सूचिकृत समावेश यायेगु अभियान सुरु जुगु दु।

मध्यपुर थिमी नगरपालिकाया मेयर मदनसुन्दर श्रेष्ठं मध्यपुर थिमी हनिइगु थुगु जात्रा अमूर्त कला जुगु धासे थुकियात विश्व सम्पदा सूचिइ समावेश यायेगु कथं अभियान सुरु यानागु धका जानकारी बिउगु खः। थौं मंगलबाः येँया भृकुटीमण्डपस्थित नेपाल पर्यटन बोर्डय् छगु पत्रकार सम्मेलन यासे वयकलं विश्व सम्पदा सूचिइ सूचिकृत यायेगु चैत्र ३० गतेनिसे बैशाख २ गते तक जुइगु उगु जात्राया प्रसारप्रचारया निति ग्वहालि यायेत इनाप याउगु खः।

वयकलं स्वनिगःया दक्को हे नगरपालिकाया मेयरपिन्त उगु जात्राय् ब्बति कायेत इनाप यानादीगु खः।

उगु ज्याझ्वलय् न्ववानादीसे येँ महानगरपालिकाया मेयर विद्यासुन्दर शाक्यं स्वनिगः दुनेया दक्को जात्रा ऐतिहासिक महत्वबारे न्हुगु पुस्तापिन्त जानकारी बिया दक्को जात्रा याउगु प्रवर्द्धन यायेगु अभियान संचालन यायेमाःगु अवस्था वंगु दु धका धयादीगु खः। मेयर शाक्यं ऐतिहासिक नाप धार्मिक सम्पदा याउगु प्रवर्द्धनं पर्यटन प्रवर्द्धनय् महत्वपूर्ण भूमिका निर्वाह याइगु स्पष्ट यानादीगु खः।

थिमिइ जुइगु भुयुसिन्ह जात्रा, म्ये प्वाखनिगु जात्रा व खः जात्रा तसकं लोकंह्वाःगु जात्रा खः।