कलंकीइ बसया ठक्कर नका मोटरसाइकलय् गयावम्ह मोटरसाइकल चालक घाइते जुगु दु सा छम्ह सीउगु दु।

मनमैजु च्वम्ह २१ दँ दुम्ह संगीत बुढामगरया ज्यान वंगु खः। बसया ठक्करं गम्भीर घाइते जुम्ह उपचारया झ्वलय् कलंकीइ च्वंगु शहीद मेमोरियल अस्पतालय् म्हिगः बहनि ७ः४५ बजे मदुगु धका प्रहरीं धाउगु दु।

स्वयम्भूपाखे वना च्वंगु बा ६ ख १४५९ नम्बरया बसं बागमती प्रदेश ०२–०२८ प ७६१४ नम्बरया मोटरसाइकलयात म्हिगः बहनि ७ः१५ बजे कलंकीइ ठक्कर नकूगु खः।

थौं २४क्वःगु भूकम्प सुरक्षा दिवस । वि सं १९९० माघ २ गते महाभूकम्प वंगु दिं लाकाः २०५५ सालंसिनसें प्रत्येक दँ भूकम्प सुरक्षा दिसव हनेगु यानावःगु दु ।

थुगुसिइ ‘भूकम्पीय सचेतना, सुरक्षित संरचना’ नारा बियाः थ्व दिवस हनीगु जूगु दु । भूकम्पं यानाः मजूसें कमजोर संरचनाया हुनिं मानवीय व भौतिक क्षति याइगु जूगुलिं भूकम्प प्रतिरोधी संरचना दयेकेत नागरिकदथुइ चेतना ब्वलंकेगु ताः तयाः थ्व नारा क्वःछ्यूगु खः ।

भूकम्प सुरक्षा दिवस मूल समारोह समितिं थौं न्हिनय् यल दरबार क्षेत्रय् विशेष ज्याझ्वः यायेत्यंगु दु । ज्याझ्वःयात प्रधानमन्त्री शेरबहादुर देउवा, गृहमन्त्री बालकृष्ण खाँण व सहरी विकासमन्त्री रामकुमारी झाँक्रीं भर्चुअल सम्बोधन याइगु जूगु दु ।

ज्याझ्वलय् गृह मन्त्रालय, यल महानगरपालिका, भूकम्प प्रविधि राष्ट्रिय समाज नेपाल (एनसेट) नाप सरकारी व गैरसरकारी संस्थाया प्रतिनिधि जक दुथ्याइगु धागु दु ।

अथेहे भूकम्प सुरक्षा डिजिटल प्रदर्शनी न भर्चुअल प्रविधि मार्फत याइ । नेपाः भूकम्पीय जोखिम क्षेत्रय् लाःगु जूगुलिं भूकम्प सुरक्षा सम्बन्धि जनचेतना अत्यावश्यक धयातःगु दु ।

नेपालय् विसं १९९० लिपा २०७२ सालय् म नेगु महाभूकम्प वनेधुंकूगु दु । पश्चिम नेपालय् ५सः दँनिसें महाभूकम्प मवंगु हुनिं शक्ति सञ्चय जुयाःच्वंगु थीथी अध्ययनं क्यंगु दु ।

मध्यपुर थिमि नगरपालिकाया मेयर मदनसुन्दर श्रेष्ठ न कोरोना सक्रमित जुगु दु।

मध्यपुर संचार समाजया अध्यक्ष बाबुकाजी श्रेष्ठं लहनान्युजया बिउगु जानकारी कथं पुष ३० गते कोरोना सक्रमित जुया आः वयकः होम आइसोलेसनय् च्वना च्वंगु दु। स्वास्थ्य सामन्य अवस्थाय् दु धका जानकारी बियादीगु दु।

कोरोना रोकथाम तथा नियन्त्रणय् खटेजूपि व सार्वजनिक क्षेत्रय् ज्यायाइपिन्त सरकारं थौंनिसे बुस्टर डोज खोप बिइत्यंगु दु।

खुला न्ह्यः खोपकाये धुकुपि अग्रपङ्क्तिइ खटे जूपि सकसित थःगु न्ह्यः खोप केन्द्रपाखे बुस्टर डोज कायेत स्वास्थ्य मन्त्रालयं धाउगु दु। मन्त्रालयया कथं अस्पताल व स्वास्थ्य संस्थाय् ज्याइपि स्वास्थ्यकःमि व कर्मचारी, दक्को सुरक्षाकःमि, सञ्चारकःमि, सार्वजनिक फोहर सङ्कलक, सरसफाइकःमि, एम्बुलेन्स व शव वाहन चालक, मिसा स्वास्थ्य स्वयंसेविका, त्रिभुवन अन्तर्राष्ट्रिय विमानस्थलय् खटेजुइपि कर्मचारीपिन्स बुस्टर डोज कायेदइ।

अथेहे सरकारी कार्यालय, सामुदायिक सेवा प्रवाह याइपि सङ्घ संस्था, बैंकिङ्ग सेवा, सार्वजनिक यातायातया चालक नाप सहचालकपिन्त न बुस्टर डोज बिइ धका स्वास्थ्य मन्त्रालयं धाउगु दु। वइगु १४ गतेनिसे ६० दँ दुपि जेष्ठ नागरिक व रोग प्रतिरोधात्मक क्षमता कम जूपिन्त न बुस्टर डोज खोप बिइगु तयारी दु।

रोग प्रतिरोधात्मक क्षमता कमजूपि बिरामीपि सक्रिय क्यान्सर रोगी, अङ्ग प्रत्यारोपणयापि बिरामी, एचआईभीजूपि बिरामी, उपचारया झ्वलय रोग प्रतिरोधात्मक क्षमता कमजूया वासः नयाच्व बिरामीपिन्त बिइगु तयारी दु। न्हापागु व निगुगु मात्रा गू खोप कयातःगु खः, बुस्टर डोज न व हे खोप कायेमाः व न्हापा कयातःगु खोप कार्ड कया वनेमाः धका मन्त्रालयं धाउगु दु। पूर्ण खोप काउगु खुला दये धुकूपिन्त बुस्टर डोज बिइत्यंगु खः।

महिला बालबालिका तथा जेष्ठ नागरिक मन्त्री उमा रेग्मी न कोरोना संक्रमित जुगु दु।

मन्त्री रेग्मीं सामाजिक सञ्जालय् थः कोरोना जुगु जानकारी बिउगु खः। “कोरोनां दुःख बिल पोजेटिभ खनेदत,” मन्त्री रेग्मीे फेसबुकय धाउगु दु।