वंगु २४ घण्टाया दुने देयन्यक  १० हजार २५८ म्हेसित कोरोना संक्रमण पुष्टि जूगु दु।

थ्य स्वया न्ह्यः वंगु वैशाख २८ गते ९ हजार ४८३ म्हेसित संक्रमण पुष्टि जुगु खः। स्वास्थ्य तथा जनसंख्या मन्त्रालयया कथं देयन्यक २२ हजार ८२८ म्हेसित परीक्षण याउगु खः।

१७ हजार ८७२ म्हेसिगु पीसीआर टेष्ट याउगुलि ८७३० म्ह व ४ हजार ९५६ म्हेसिगु एन्टीजेन परीक्षण याउगुलि १५२८ म्हेसित संक्रमण पुष्टि जुगु खः। अथेहे २४ घण्टाय् ५६२ म्ह संक्रमणमुक्त जुगु दु सा छम्ह सीउगु दु।

देयन्यक ३९ हजार ४४ म्ह संक्रिय संक्रमितपि दु धका धाउगु दु।

मधेश प्रदेशय् थौं सार्वजनिक बिदा बिउगु दु।

प्रदेशया नां मधेश व राजधानी जनकपुरधाम तोके याउगु लसताय् थौं अनया सरकारं सार्वजनिक बिदा बिउगु दु।

मधेश प्रदेश सरकारया प्रवक्ता तक जुयादीम्ह अर्थमन्त्री शैलेन्द्र साह न प्रदेशया नां व राजधानी क्वःछिउगु लसताय् थौं मंगलबाः प्रदेशय् सार्वजनिक बिदा बिइगु धका धाउगु खः।

संघीय मामिला व सामान्य प्रशासनमन्त्री राजेन्द्र श्रेष्ठं पहिचानया आधारय् निगू तिहाई बहुमत प्रदेश नं २ या नां मधेश प्रदेश तयेत ताः लाःगुलिं मधेसवासी जनतायात थःगु सामाजिक संजालपाखे भिंतुना बियादीगु दु।

म्हिगः जुगु मतदानय् प्रदेशया नां मधेश व राजधानी जनकपुर यायेगु प्रस्ताव निगु तिहाइन पास याउगु खः।

मिलापुन्ही कुन्हु चाँगुनारायण द्यः येँया तलेजु देगलय् हयेगुु परम्परा दु ।

उगु हे दिं मखनय् महाद्यः देगः न्ह्यःने उकथं ‘चा’या थलबल तःछ्यायेगु जात्रा न जुगु दु। दँय् दसं मिलापुन्हीया दिं चाँगुनारायण लक्ष्मी व सरस्वतीया प्रतिक कथं वहःया कलश चाँगुनिसें न्यासि वयाः येँया हनुमानध्वाखा बसन्तपुर लागाय् च्वंगु तलेजु देगलय् हयेमाःगु परम्परा दु ।

उगु कलश येँया जमः थ्यनेधुंकाः हाकनं विधिवत् रुपं पूजाआजा यानाः चाँगुं ज्वनावःगु दथुया तःग्वःगु कलश राजोपाध्यायपिन्सं कुबियाः हयेमाःगु चलन दु ।

वहे झ्वलय् मखन थ्यंकाः द्यःयात अपशकुन क्यनेत उगु ‘चा’या थलबल तःछ्यायेगु परम्परा दयाः वयाच्वंगु खः  चाँगुनारायण येँ हःगु खः धकाः साक्षी च्वनेत येँया बसन्तपुरया कुमारी तकं बिज्याइगु प्रचलन दु ।

किपा नातिकाजी महर्जन 

प्रदेश २ या नां मधेश नामकरण जूगु दु। थौं सोमबाः च्वंगु प्रदेश सभा बैठकं प्रदेश सभाया नां मधेश प्रदेशया प्रस्तावय् निगु तिहाइ बहुमतं पास याउगु दु।

सोमबाः च्वंगु बैठकं मतदानय् ९९ म्ह सांसदपि सहभागी जुगुलि ८० म्हेसिया पक्षय् मत बिउगु खः। सरकारया नेतृत्व यानाच्वंगु जनता समाजवादी पार्टी (जसपा) नाप सत्तारुढ माओवादी केन्द्र व विपक्षी लोकतान्त्रिक समाजवादी पार्टी (लोसपा) न मंका कथं प्रदेशया नां मधेशया प्रस्ताव याउगु खः।

जसपाया ३९, माओवादीया ८ व लोसपाया १६ म्ह याना ६३म्ह सांसदपि नाप छम्ह नेपाल संघीय समाजवादी पार्टी न समर्थन याउगु खः। अथेशे राजधानी जनकपुर न थौं सोमबाः हे टुंग्ये याउगु खः। न्हापागु बैठकय् जुगु मतदानय् ७८ म्हेसिया जनकपुरया पक्षय् मत बिउगु खः।

प्रदेश २ या राजधानी नाप नामकरण सम्बन्धी अध्ययन विशेष समितिं स्थायी राजधानीया लागि शुरुइ न्ह्यगू प्रस्ताव याउगु खः । वया लिपा परिमार्जन यासे स्वंगू दयकूगु खः, उकि मध्ये जनकपुर निगु तिहाइ बहुमत मत पास याउगु खः।