क्यारेबियन देय् डोमिनिकन रिपब्लीकय् निजी विमान दुर्घटना जूबलय् ९ म्ह सीगु दु ।

डोमिनिक रिपब्लीकया राजधानी सान्टो डोमिन्गोपाखें अमेरिकाया फ्लोरिडाया नितिं ब्वःगु विमानय् समस्या वयेधुंका आपत्कालिन अवतरणया झ्वलय् दुर्घटनाय् लाःगु खः ।

‘ला इजाबेला’ एयरपोर्टं ब्वःगु १५गू मिनेटय् हे विमानय् समस्या वयेधुंका लिक्कसंया ‘लास अमेरिकाज’ एयरपोर्टय् अवतरणया कुतः याःगु खः । उगु हे झ्वलय् दुर्घटना जूबलय् ६म्ह विदेशी लिसें छम्ह डोमिनिकन यात्रु व चालक दलया निम्ह दुजः मदूगु वायुसेवा कम्पनी हेलीडोसा एभिएसन ग्रुपं न्ह्यथंगु दु ।

सीपिं ६ म्ह विदेशी यात्रुतये राष्ट्रियता व म्हसिका ध्वाथुइकुगु मदु ।

बेलायतय् कोरोना सक्रमण हाकन तीव्र जूगु दु । म्हिगः छन्हुं हे थ्यंमथ्यं ६०द्वम्हेसित संक्रमण जूगु धागु दु ।

उकिइ मध्ये सत्या मनूत मन्त । बेलायतया डिपार्टमेन्ट अफ हेल्थ एण्ड सोशल केयरं सार्वजनिक याःगु धलः कथं बेलायतय् उकिमछिं मनूतय्त छक्वलं संक्रमण जूगु पुष्टि याःगु दु ।

म्हिगः संक्रमण पुष्टि जूपिं मध्ये ओमिक्रोनया संक्रमित न दु । थ्व ल्या वंगु जनवरी थुखय्या दकले उप्वः खः । बेलायतय् ८९.२ प्रतिशत मनूतय्त खोपया न्हापांगु डोज अले ८१.४ प्रतिशत मनूतय्त निगूगु डोज तयेकेधुंकूगु दु ।

अथेहे, ४१.९ प्रतिशततय्सं बुस्टर डोज कायेधुंकूगु अवस्थाय् न कोरोना संक्रमितया ल्या अप्वःगु हुनिं बेलायतं थप प्रतिबन्ध तयेगु तयारी न्ह्याकूगु दु ।

प्रधानमनत्री बोरिस जोनसनं बेलायती जनतातय्सं लापरबाही याःगु हुनिं कोरानाया संक्रमण हाकन न्यंगु धासें च्यूताः कयादीगु दु । संक्रमण नियन्त्रण व रोकथामया नितिं जनता थः हे सचेत जुइमाःगु  वय्कया धापू दु ।

कोरोनाया संक्रमण नियन्त्रण यायेत बेलायत सरकारं तत्पर जूगु प्रधानमन्त्री जोनसनया धापू दु ।

अमेरिकी विदेशमन्त्री एन्टोनी ब्लिङ्केनं चीनया आक्रमक गतिविधिप्रति अमेरिकाया गम्भीर च्यूताः दुगु धयादीगु दु ।

ब्लिङ्केनं इण्डो प्यासिफिक क्षेत्रया साझेदारतनाप अमेरिकां आर्थिक व सैन्य सम्बन्ध तच्वयेकेगु धयादीगु दु । दक्षिण पूर्वी एशियाली देय्या न्हापांगु भ्रमण यानाः इण्डोनेसिया थ्यंकझाःम्ह ब्लिङ्केनं इण्डो प्यासिफिक क्षेत्रयात हलिंया दकले गतिशील क्षेत्रया कथं व्याख्या न यानादिल ।

अथेजुयाः थ्व क्षेत्रय् दसकौं ई बियाः जूसां सम्बन्ध भिंकेमाःगु वय्कया धापू दु । जाकार्तास्थित युनिभसिर्टी अफ इण्डोनेसियाय् न्वचू बीगु झ्वलय् वय्कलं निश्चित नियमय् न्ह्यायेमाः धइगु देय्तय्त निराश मयायेगु धयादिल ।

ब्लिङ्केनं इण्डो प्यासिफिक देय्त ग्याचिकू व जबरजस्तीं मुक्त जुइमाःगु न धयादीगु दु । सुं न देय्यात अमेरिका वा चीन ल्ययेमाः धइगु मानसिकता तयार याकेगु गलत जुइगु वय्कलं धयादिल ।

चीननापया द्वन्द्वयात अमेरिकां प्रश्रय मबीगु स्पष्ट यानादिसें ब्लिङ्केनं उत्तर पूर्वी एसियानिसें दक्षिण पूर्वी एशियातक अले मेकङ खुसिनिसें प्यासिफिक आइल्याण्डतक चीनया आक्रमक गतिविधियात थःपिन्सं सहः मयायेगु न धयादीगु दु ।

थ्व क्षेत्रया देशं न चीनया व्यवहारय् सुधार चाहे याःगु जुयाः अमेरिकां उकिइ भूमिका म्हितीगु अमेरिकी विदेशमन्त्री ब्लिङ्केनं दाबी यानादीगु दु । वय्कया विचाःप्रति चीनं आः तक छुं न कथंया प्रतिक्रिया मब्यूनि ।

विदेशमन्त्री ब्लिङ्केन इण्डोनेसियां मलेसिया व थाइल्याण्ड झाइगु जूगु दु ।

भारत प्रशासित काश्मिरया श्रीनगरय् प्रहरी दुगु बसयात लक्षित यानाः आतंकवादी हःताः जूगु दु ।

आतंकवादीतय्सं गोलीं कयेकूबलय् २म्ह प्रहरी घटनास्थलय् मन्त । घटनाय् १२म्ह प्रहरी घाःपाः जूगु दु । मोटरसाइकलय् वःपिं आतंकवादीतय्सं प्रहरी दुगु बसयात प्यखेरं घेरा तयाः लालाथे गोलीं कयेकाः बिस्यूवंगु धागु दु ।

थःगु ज्यां लिहाँवयाःच्वंपिन्त गोलीं कयेकूगु खः । श्रीनगरय् प्रहरीयात हतियारया सुविधा मरु । अथेजुयाः इमिसं जवाफी कारबाही यायेमफुत ।

भारतीय प्रधानमन्त्री नरेन्द्र मोदीं घटनाप्रति दुःख प्वंकाः अन्यागु घृणित ज्याय् दुथ्यापिन्त कानुनी दायराय् हयेगु धयादीगु दु ।

बेलायती प्रधानमन्त्री बोरिस जोनसनं ‘ओमिक्रोन आपतकाल’ घोषणा याउगु दु।

जोनसनं न्हुगु ओमिक्रोनया संक्रमण यक्को अप्पोगुलि आपतकाल घोषणा याउगु दु। जोनसनं ओमिक्रोनया व्यापक लहर वःगु धासे आपतकाल घोषणा याउगु दु धका बीबीसीं धाउगु दु।

‘ओमिक्रोनको भीषण लहर वयेफुगु खँ सुना न शंका यायेम्वाः’, टेलिभिजनय् सम्बोधन यायेगु झ्वलय् जोनसनं धाउगु दु, ‘न्हुगु भेरियन्टविरुद्धया लडाइँ झीसं छगु आपतकाल सामना याना च्वनागु दु।’ओमिक्रोन भेरियन्ट यक्को फैलै जुगु धका बेलायतय् कोभिड सतर्कता थकाना प्यंगु तहय् थ्यकूगु छु ईलिपा हे जोनसनं ‘ओमिक्रोन आपतकाल’ घोषणा याउगु दु।

जोनसनं थुगु वाः दुने हे १८ दँ स्वया च्वय्यापिन्त सकसित बुस्टर डोज खोप बिइगु जानकारी बिउगु दु। कोभिड खोपया निगुगु डोज आवश्यकता कथं सुरक्षा प्रदान मयाउगुलि बुस्टर डोज कायेमाःगु धका धाउगु दु। ओमिक्रोन फैलै मजुगुलि सेनाया ४२ टोली दक्को क्षेत्रय् परिचालन याइगु धका जोनसनं धाउगु दु। अथहे इङल्याण्डभर थप खोप केन्द्र व घुम्ती सेवा स्थापना याउगु धका धाउगु दु।