भारतया राजधानी न्हूदिल्लीइ फुक्क स्कूल अनिश्चितकालया नितिं बन्द याउगु दु। बिहिवाः दिल्लीया वातावरणमन्त्री गोपाल राय नं सशरया वायु प्रदूषण खराब जुगुलि कन्ह्यः शुक्रवाःनिसें दक्को स्कूल बन्द यायेगु धका धाउगु दु।

मन्त्री राययात उदृत यासें भारतीय समाचार माध्यम एएनआई नं च्वःगु दु, ‘सहरया वायु प्रदूषणया अवस्थाया हुनिं दिल्लीया फुक्क स्कूल शुक्रवाःनिसें मेगु सुचं मवःतले तकया नितिं बन्द यायेगु जुइ।’ भारतया सर्वोच्च अदालतं स्यनावंगु वायु प्रदूषण दथुइ मचातय्गु निति भौतिक कक्षा संचालन यायेगु केजरीवाल नेतृत्व सरकारया आलोचना यायेधुंकाः शुक्रवाःनिसें फुक्क स्कूल बन्द यायेत्यंगु खः।

बुधवाः अदालतं ‘वयस्कपिन्सं छेँय् हे च्वनाः ज्या यानाच्वंगु इलय् मचातय्त धाःसा स्कूल वनेत वाध्य याःगु’ धासें दिल्ली सरकारयात न्ह्यसःचिं थंगु खः। लिपांगु छुं वाः थुखे दिल्लीया वायु प्रदूषणय् छुं सुधार मवःगु नं अदालतया धापू दु।

अथेहे, अदालतं केन्द्र सरकारयात २४ घण्टाया दुने वायु प्रदूषण नियन्त्रण सम्बन्धी योजना हयाः कार्यान्वयन यायेत तकं धाःगु दु।

छिमेकी देय् भारतय् न कोभिड–१९ या न्हुगु भेरियन्ट ओमिक्रोनया निम्ह संक्रमितपि पिहावंगु दु।

भारतया केन्द्रीय स्वास्थ्य मन्त्रालयया सहसचिव लभ अग्रवालं कर्नाटकय् निम्ह ओमिक्रोनया संक्रमित पिहावंगु दु।

६६ दँ दुम्ह व ४० दँ दुम्ह निम्ह मिजंपिन्त कोरोना संक्रमण पुष्टि जुगु दु। थ्व नाप ओमिक्रोन भेरियन्ट फैलै जुगु २६ गु देय् थ्यंगु दु।

नाइजेरियाया उत्तरी राज्य कानोय् छगः डुगा फातापूबलय् मस्तलिसें म्ह्वतिं २९ सीगु दुसा न्हय्म्ह जिवित हे उद्धार याःगु दु ।

धार्मिक ज्याझ्वलय् ब्वति कायेत वनाच्वंपिं मनूत गयाच्वंगु नांचा खुसि छीगु झ्वलय् फातापूगु संचारमाध्यमतय्सं न्ह्यथंगु दु । सीपिंलय् आपाःधइथें ६दँनिसें १२दँया स्कुले मस्त लाःगु दु ।

क्षमता स्वयां अप्वः यात्रु तःगु व खराब मौसमया हुनिं दुर्घटना जूगु धाःगु दु । उद्धार याःपिन्त अस्पताल यंकूगु सुरक्षाकःमिं धाःगु दु ।

नांचाय् ५० स्वयां अप्वः यात्रु गयाच्वंगु दुगु खः । खुसिइ तनाच्वंपिन्त मालाच्वंगु दनिगुलिं सीपिनि ल्याः थहांवनेफुगु धाःगु दु ।

युरोपेली युनियनं हलिंया गरिब अले विकाशशिल देय्या भौतिक पूर्वाधारय् ३सः बिलियन युरो लगानि याइगु जूगगु दु ।

हलिमय् चिनया अप्वयाच्वंगु प्रभावयात निस्तेज यायेत इयुं थुलि तःधंगु लगानिया खाका तयार याःगु खः । थ्व रकम खास यानाः सडक, पुल, बन्दरगाह, विमानस्थल, उर्जालिसेंया क्षेत्रय् लगानि यायेगु इयुया तयारी दु ।

इयुं थुकियात चिनया तसकं महत्वकांक्षी बेल्ट एण्ड रोड इनिसिएटिभ (बिआरआई) या बिकल्प धाःगु दु । चिनं बिआरआईया त्वहलय् गरिब अले विकाससिल देशय् त्यासाया कु जक कुबीकूगु इयुया द्वपं दु ।

चिनिया त्यासां हलिंया गुलिखे देय् टाट पल्टे जुइगु अवस्थाय् थ्यंगु अले छुं देय्या महत्वपूर्ण सामरिक केन्द्र चिनिया अधिनय् वंगु इयुया तर्क दु ।

इयुं थःगु लगानिं हलिंया मेगु देय्यात दिगो साझेदारी अले लाभदायक आयोजनाय् प्रेरित याइगु जिकिर याःगु दु ।

भारतं डिसेम्बर १५ तारिखनिसे अन्तर्राष्ट्रिय उडान शुरू यायेगु थ्व स्वया न्ह्ययागु योजना आःया लागि स्थगित याउगगु दु।

कोभिड–१९ या न्हुगु ओमिक्रोन भेरियन्टया त्रासया कारण डिसेम्बर १५ तारिखनिसे अन्तर्राष्ट्रिय उडान शुरु यायेगु योजना आःया लागि स्थगित याउगु दु धका भारतीय सञ्चारमाध्यमं धाउगु दु।

भारतया नागरिक उड्डयन महानिर्देशनालयं बुधबाः छगु परिपत्र जारी यासे ओमिक्रोनपाखे लिपागु अवस्थायात कया भारतपाखे वइगु व अन्तर्राष्ट्रिय व्यावसायिक उडान शुरु यायेगु उपयुक्त ई लिपा जानकारी बिइगु महानिर्देशनालयं जारी याउगु परिपत्रय् उल्लेख याउगु दु।