Display Style:
Column Style
हाकनं अप्वःयावल कोरोना संक्रमण
दिल्लाथ्व नवमी ११४१,साउन ३ आईतवाः
लिपांगु २४घौदुने हलिंन्यंकं ४गू लख ७८द्वम्ह मल्याक कोरोना भाइरसया न्हूपिं संक्रमित थप जूगु दु ।
थ्वलिसे हलिंन्यंकं कोरोना संक्रमितया ल्या १९गू कोती ७गू लख ४८द्वलं पुलाःवन । वंगु २४घौदुने थप जूपिं संक्रमितमध्ये दकले उप्वः बेलायतय् ५४द्व ६सः व ७४म्ह दु । बेलायतय् थ्व ईलय् ४१म्ह मनूत संक्रमितया हुनिं मन्त ।
अथेहे निगूगु देय्या कथं इन्डोनेसिया खः । अन २४घौदुने ५१द्व ९सः व ५२म्ह संक्रमित थप जूगु दु । थ्वहेदथुइ द्वछि व ९२म्ह मदुगु धलः दु । थ्व ईलय् भारतय् ४१द्व २सः व ८३म्ह संक्रमित थप जूगु दुसा ५सः व १७म्ह मन्त ।
अथेहे बेलायतया स्वास्थ्य मन्त्री साजिद जाविद कोरोना संक्रमित जुयादीगु दु । वंगु जुननिसें स्वास्थ्य मन्त्री जुयादीम्ह साजिदयात संक्रमण पुष्टि जूगु खः । खोपया निगुलिं डोज कायेधुंकूम्ह मन्त्री साजिदया शनिवाः चान्हय् पीसीआर रिपोर्ट पोजेटिभ वःगु खः ।
शुक्रवाः साजिदं प्रधानमन्त्री बोरिस जोन्सन नापलानादीगु खः । बेलायतय् लिपांगु ईलय् सक्रिय संक्रमितया ल्या अप्वःगु दु । लिपांगु निन्हुथुखय् मदिक्क ५०द्वम्ह न्हूपिं संक्रमित थप जूगु दु ।
तालिवान विद्रोहीया ७द्वम्ह कैदी त्वतेत माग
दिल्लाथ्व षष्ठी, श्रावण १, शुक्रबाः
तालिवानी विद्रोहीतय्सं अफगान सरकारया नियन्त्रणय् दुपिं ७द्वम्ह कैदीतय्त त्वःतेत माग याःगु दु ।
तालिवानीतय्सं स्वला तक युद्धविराम यानाः जूसां कारागारय् दुपिं थः कार्यकर्तातय्त त्वःतेत माग याःगु खः । तर सरकारी अधिकारीपिन्सं धाःसा तालिवानीतय्गु समस्या ज्यंकेत इमिसं माग तःगु प्रतिक्रिया ब्यूगु दु ।
तालिवानीतय्गु उगु प्रस्तावयात अफगान सरकारं आःत लिसः मब्यूनि । अमेरिकी सेना स्वदेश लित वनेगु झ्वः न्ह्यानाच्वंगुलिसे तालिवानी विद्रोहीतय्सं थःपिनिगु सशस्त्र ज्यापहः तच्वयेकूगु दु । विद्रोहीतय्सं आःतक प्यंगू जिल्लामध्ये स्वब्वय् छब्व थःपिनिगु नियन्त्रण दुगु दाबी यानावःगु दु ।
वंगु दँ वार्ता यायेगु झ्वलय् अफगान सरकारं न्याद्वम्ह मल्याक तालिवानी लडाकूतय्त त्वःतूगु खः । त्वःतूपिं मध्ये यक्व धइथें लडाकू हाकन सशस्त्र हिंसाय् दुथ्याःगु सरकारी अधिकारीतय्सं धयाच्वंगु दु ।
अफगान सेनां देय्न्यंकं तालिवानीतय्गु ज्यापहः नियन्त्रणय् कायेगु कुतः यानाच्वंगु दु । तर विद्रोहीतय्सं थःपिन्त तःधंगु सफलता चूलाःगु धागु दु ।
जर्मनी व बेल्जियमय् खुसिबाः वल
दिल्लाथ्व षष्ठी, श्रावण १, शुक्रबाः
जर्मनी व बेल्जियमय् खुसि बाः वयाः सीपिनिगु ल्या ७०म्ह पूगु दु । इपिं मध्ये ११म्ह बेल्जियमया नागरिक खः । खुसि सिथय् च्वंगु यक्व धइथें छेँ चुइकायंकूगु दु ।
खुसि बाः वयाः जर्मनीया राइनल्याण्ड प्यालाटिनेट व उत्तर राइन वेस्टफालिया दकले उप्वः प्रभावित जूगु दु । खुसिइ लःया सतह अप्वयाः मानव बस्तीइ दुहाँवःबलय् सलंसः छेँ डुबानय् लाःगु दु । उद्दार यायेत सेना तकं परिचालन याःगु दु ।
खुसि बाः वयाः बिस्थापित जूपिन्त सुरक्षित थासय् तयेयंकूगु दु । जर्मनीइ दँय्दसं वा वयाः द्वलंद्व मनूत विस्थापित जुइगु याः ।
अझं छुं दिं मदिक्क वा वइगु प्रक्षेपण जुयाच्वंगुलिं सतर्क अवस्थाय् च्वनेत मौसम विभागया अधिकारीतय्सं इनाप याःगु दु । जलवायू परिवर्तनया हुनिं यक्व वाः वःगु धागु दु ।
इमिसं वातावरण संरक्षणय् ध्यान मब्यूसा वइगु ईलय् न थन्यागु प्राकृतिक प्रकोपया हुनिं क्षति फयेमालीगुप्रति वाः चायेकूगु दु ।
कोरोनाविरुद्वया न्हूगु मापदण्डयात कया विरोध प्रदर्शन
दिल्लाथ्व पंचमी ११४१,असार ३१ बिहीवाः
सरकारं जारी याःगु कोभिड–१९ विरुद्धया न्हूगु स्वास्थ्य मापदण्डयात फ्रान्सेली जनतां विरोध याःगु दु ।
राष्ट्रपति इम्यानुयल म्याक्राेंनं बार, रेष्टुरेन्ट व सिनेमा हलय् दुहाँवनेत खोप काःगु प्रमाणपत्र वा पीसीआर परीक्षणया नेगेटिभ रिपोर्ट आवश्यक जुइगु प्रावधानयात न्ह्याकेत स्वयेधुंका विरोध जूगु दु ।
सरकारी योजना विरूद्ध कुहाँवःपिं ब्वज्यामि व प्रहरी दथुइ ल्वापु नं जूगु दु । ब्वज्यामितये भीड पनेत प्रहरीं अस्रु ग्यांस छ्यलेमाःगु खः । राष्ट्रपति म्याक्रोनं कोरोना भाइरस विरुद्व न्ह्यायेत स्वास्थ्यकर्मीतयेर्त अनिवार्य खोप लिसें आम जनताया नितिं न्हूगु स्वास्थ्य नियमया घोषणा यानादीगु खः ।
राष्ट्रपति म्यांक्रोया आलोचकतयेसं शपिंग मल, क्याफे, बार व रेष्टुरेन्टय् स्वास्थ्य पास जाँचया व्यवस्थां मनूतय् स्वतन्त्रतायात क्वत्तय्गु द्वपं बिउगु दु । खोपया अनिवार्यता सरकारया मनमानी व पूवंक अलोकतान्त्रिक व्यवहार धासें उमिसं भिंकेत इनाप याःगु दु ।
उखे राष्ट्रपति म्याक्राेंनं धाःसा खोपं फ्रान्सयात सामान्य स्थितिइ हयेगु पायेछि पहः जूगु दावी यानादीगु दु । फत्तले आपालं मनूयात खोप कायेत प्रोत्साहित यानाच्वनागु वयेकया धापू दु ।
अमेरिकां दोभाषेया रुपय् ग्वहालि याःपिन्त सुरक्षित थासय् यंकिगु
दिल्लाथ्व पंचमी ११४१,असार ३१ बिहीवाः
संयुक्त राज्य अमेरिकां ल्वापुया इलय् अफगानिस्तानय् थः सैनिकयात दोभाषेया रुपय् ग्वहालि चूलाकुपिं अनुवादकतयेत सुरक्षित थासय् यंकिगु जूगु दु ।
इमित थ्वहे जुलाईया लिपांगु वालंनिसें अमेरिका वा मेगु छुं नं देशय् यंकिगु जूगु खः । वंगु छुं वालय् तालिबानं देय्या थी थी थासय् तच्वकं थःगु पकड दयेकावयाच्वंगु दु ।
ह्वाइट हाउसया प्रवक्ता जेन सासाकीं दोभाषेतयेत बहादुर मनूया छुमां बिउसें उमिगु वंगु आपालं दँ निसें म्हितुगु भूमिकाया मू पुलेत थःपिं तयार दूगु धयादील । झण्डै २५सःम्ह मनूत अमेरिका वा ३गूगु देशय् सैन्य सुविधाया नितिं प्रतिरक्षारत दूगु धाःगु दु ।
अमेरिकीलिसेंया सैनिक लितयंकेगु झ्व लिपांगु चरणय् थ्यंबलय् इमगिु ग्वहालिमिया कथं ज्या याःपिं अनुवादकत जोखिमय् लानावःगु चिउता थप जूगु खः । अमेरिकाया नेतृत्वय् सन् २००१ थुखे जुयावःगु नेटो सैनिकया अभियान अफगानिस्तानय् अन्त्य जुइत्यंगु दु ।
सेप्टेम्बर ११ तक्क फुक्क विदेशी सैनिक अफगानिस्तानं पिहाँवनिगु ई सीमा दु । अमेरिकी राष्ट्रपति जो बाइडेनं वइगु अगस्ट अन्तिम तक्क थःपिनि सैनिक लिहाँवइगु घोषणा यानादीगु दु ।
