Display Style:
Column Style
चीनया छगू अन्तरिक्ष यान चन्द्रमाया चट्टान हयेत ताःलात
कौलाथ्व चतुर्थी ११४१, असोज २५ सोमबाः
चीनया छगू अन्तरिक्ष यान ४० दँया इतिहासय् न्हापांखुसिइ चन्द्रमाया सतहया चट्टान संकलन यायेत ताःलाःगु दु ।
चिनीयाँ अन्तरिक्ष एजेन्सीया कथं चीनया चाँग ई ५ मिसनं ४०दँया इतिहासय् चन्द्रमाया चट्टान कया पृथ्वीइ लिहाँवयेत ताःलाःगु चिनियाँ समाचार संस्था सिन्ह्वां न्ह्यथंगु दु ।
उगु मिसनय् दुथ्यागु अमेरिकाया वाशिङटन बिश्वबिद्यालयया बिशेषज्ञ बै्रड जोलिफं उगु चट्टानया आयु थ्यंमथ्यं २ गू अर्व दँया जुइगु ताकं याःगु दु । वयेकया कथं चन्द्रमा लगभग ४ गू अर्ब दँ पुलांगु खः, थ्व पृथ्वी थें हे पुलांगु खः ।
बैज्ञानिकतये टोलीं चन्द्रमा जःखःया क्षेत्रया दँ निर्धारणया नितिं चट्टानया नमुना संकलन याःगु न्ह्यथंगु दु । जोलिफं चीनया बेइजिङ प्रयोगशालाय् थुगु चट्टानया खँय् थप अनुसन्धान याना याकनं हे न्हूगु तथ्य सार्वजनिक यायेगु न्ह्यथंगु दु ।
चीनं चांग ई ५ मिसन वंगु २४ नोभेम्बरय् प्रक्षेपण याःगु खः । थ्वहे मिसनं ४गू दशकया इतिहासय् चन्द्रमाया सतहया चट्टान पृथ्वीइ हयेत ताःलाःगु खः ।
अमेरिकी व तालिवान दथुई न्हापांखुसि खँल्हाबल्हा
कौलाथ्व चतुर्थी ११४१, असोज २४ आईतवाः
अफगानिस्तानयात तालिवानतय्सं नियन्त्रणय् कायेधुंकाः न्हापांखुसि अमेरिका व तालिवानदथुइ खँल्हाबल्हा जूगु दु ।
कतारया राजधानी दोहाय् तालिवानया वरिष्ठ अधिकारी व अमेरिकाया प्रतिनिधिदथुइ शनिवाः भेटवार्ता जूगु खः । थ्व वार्ता न्ह्यानाच्वंगु दनि । अफगातिस्तानय् न्हूगु सत्ता वयेधुंसां आः न यक्व हे विदेशी नागरिकत अन हे दनि ।
अथेजुयाः इमित थःथःगु देशय् अःपुक्क लिहाँवनेगु लकस दयेकाबीत अमेरिकां इनाप यानाच्वंगु दु । न्ह्यानाच्वंगु भेटवार्ताय् न अमेरिकां थ्वहे मुद्दा ल्ह्वंगु दु । अमेरिकाया सेना अफगानिस्तानं लिहाँवनेधुंकाः जूगु भेटवार्तायात अतिकं महत्व बियाः स्वःगु दु ।
वंगु अगस्टया लिपांगु ईलय् अमेरिकाया सेना अफगानिस्तानं लिहाँवनेधुंकाः २०दँलिपा अफगानिस्तानय् हाकन तालिवानतय्गु सत्ता वःगु खः ।
थ्व भेटवार्तां तालिवानतय्सं सन् २०२० य् वाशिङ्टनलिसे याःगु शान्ति सम्झौताया पुनरवलोकन याइगु विश्लेषण याःगु दु ।
लद्दाखया विषयस भारत व चीन दथुई वार्ता जुइगु
कौलाथ्व चतुर्थी ११४१, असोज २४ आईतवाः
भारतया लद्दाखय् शान्ति बहालीया नितिं थौं चीन व भारत दथुइ उच्चस्तरीय वार्ता जुइत्यंगु दु ।
चीन व भारतया सीमा मोल्डोय् जुइत्यंगु निगू पक्ष दथुया थ्व १३गूगु वार्ता खः । भारतं लद्दाखय् तैनाथ चिनियाँ सैनिक लितकायेत चीनयात तक्वःमछि इनाप याःसा नं अटेर याना वयेधुंका भारतं थौंया वार्ताय् चीनयात सेना लितकायेगु नितिं थप दवाव बिइगु भारतीय सञ्चारमध्यमतयेसं न्ह्यथंगु दु ।
थ्वयान्ह्यः वंगु जुलाई ३१य् थुपिं निगू पुचः दथुइ कमाण्डर स्तरय् १२गूगु वार्ता जूगु खः । ९ घौ तक्क जूगु वार्ताय् लद्दाखया हट स्प्रिंग्स, गोगरां चिनिया सैनिक चिइकेत भारतं याःगु इनाप चीनं अटेर यायेधुंका भारतं चीनलिसे थप असन्तुष्ट जूगु खः ।
लिपांगु ई भारतीय विदेशमन्त्री एस जयशकर व चिनियाँ समकक्षी वांग यी दथुइ द्धिपक्षी वार्ता जूगु खः । वार्ताय् भारतीय विदेशमन्त्री जसशंकरं लद्दाखया कचवं ज्यंकेगु नितिं छगू पक्षीय हिउपालं ज्या मयायेगु धका चीनयात सेना लितकायेत दबाब बियादीगु खः ।
भारत व चीन दथुइ लद्दागया विषयलय् टक्वःमछि मुँज्या च्वंसा नं समस्या ज्यने फूगु मदुनि ।
चीन व ताइवानदथुइ अप्वःगु तनावय् अमेरिकाया च्यूताः
कौलाथ्व द्धितीया ११४१, असोज २२ शुक्रवाः
अमेरिकां चीन व ताइवानदथुइ अप्वःगु तनावय् थःगु च्यूताः तःगु दु । ताइवानया सर्ग व जःखःया समुद्री क्षेत्रय् अप्वःगु चीनया सैन्य प्रभावयात कयाः अमेरिकां च्यूताः तःगु खः ।
चीनं मदिक्क प्यन्हुतक ताइवानया हवाई क्षेत्रय् दर्जनौं फाइटर जेट ब्वयेकेवं ताइवानं विरोध यानाच्वंगु दु । ताइवानया स्वतन्त्रता व सम्प्रभुताया पक्षय् अमेरिकी राष्ट्रिय सुरक्षा सल्लाहकार जेक सुलिभानं ऐक्यबद्धता प्वंकूगु दु ।
ताइवानं थःत स्वतन्त्र देय् धायेगु यानावःगु दु । तर चीनं धाःसा ताइवानयात बृहत चीनया छगू महत्वपूर्ण ब्वः धायेगु यानावःगु दु ।
ताइवानयात जुयाच्वंगु चिनियाँ थिचोमिचो अप्वःसा थःपिन्सं न चीनविरुद्ध पलाः न्ह्याकेत बाध्य जुइगु धकाः अमेरिकां धागु दु ।
पाकिस्तानया बलुचिस्तानय् शक्तिशाली भुखाय् ब्वल
कौलाथ्व ११४१, असोज २१ बिहीवाः
पाकिस्तानया बलुचिस्तान क्षेत्रय् वंगु भुखाचां म्होतिइ २०म्ह सीगु दु ।
थौं सुथय् ब्वगु भुखाचाय् लाना हताहत जूपिनि ल्याः अप्वयेफयगु अधिकारीतयेसं धाःगु दु । सीपिंलय् अप्वः धैथें मिसा व मस्त दु । सच्छि व ५०म्ह सिवें अप्वः घाःपाः जूपिन्त अस्पताल यंकुगु व उमिगु अवस्था तच्वः जूगु स्थानीय अधिकारीतयेत उद्धृत यासें समाचार माध्यमतयेसं न्ह्यथंगु दु ।
क्वेटा शहरय् मनूत बिस्युंवनाच्वंगु लुँ सामाजिक सञ्जालय् खनेदूगु दु । प्रारम्भिक रिपोर्टय् ५गू फुति ७ गू रेक्टरस्केलया भुखाचा ब्वगु ताकं याःगु दु ।
क्वेटा शहरनिसें सच्छि व ७०गु किलोमिटर तापाक्क हरनाई धइगु थासय् भुखाचाया केन्द्रविन्दु दूगु धाःगु दु । भुखाचां जूगु क्षतिया विस्तृत विवरण धाःसा वयेत ल्यंदनिइ ।
