Display Style:
Column Style
क्यूवाया नागरिकपिं आन्दोलित
दिल्लाथ्व चतुर्थी ११४१,असार ३० बुधवाः
क्युवाय् सरकार विरोधी ज्यापहः अप्वःगु दु । देय्या थी थी थासय् सरकारया विरोधय् थी थी ब्वज्या जुयाच्वंगु दु ।
ब्वज्याया ज्यापहः अराजक जूगु धासं्े सुरक्षाकर्मीं बल छ्यबलय् छम्ह सीगु दु । शवाना शहरय् जूगु ब्वज्याया झ्वलय् प्रहरीया कारवाहीलय् छम्ह सीगु लिसें आन्दोलन थप तच्वगु आन्तरिक मन्त्रालयं न्ह्यथंगु दु ।
आर्थिक असमनाता जूगु धका सर्वसाधारणं सरकारया कुँख्यसें देय्यंक ब्वज्या न्ह्याकुगु खः । कोरोना भाइरसया महामारीया हुनिं देशय् थप आर्थिक संकट वःसा नं उकिया समाधानया नितिं सरकारं प्रभावकारी पलाः न्ह्याकुगु धासें सर्वसाधारणं विरोध ब्वज्या न्ह्याकुगु अन्तर्राष्ट्रिय समाचार संस्थातयेसं न्ह्यथंगु दु ।
थुखे सरकारं धाःसा आन्दोलनय् घुसपैठ जूगु दावी याःगु दु । अमेरिकां प्रतिबन्ध तयेधुंका लिपांगु ई क्युवाय् आर्थिक संकट थप जुयावंगु सरकारी अधिकारीतयेसं न्ह्यथंगु दु् ।
दक्षिण अफ्रिकाय् हिंसात्मक प्रदर्शनय् सीपि ७२ म्ह थ्यन
लहानान्युज | दिल्लाथ्व चतुर्थी ११४१,असार ३० बुधवाः
दक्षिण अफ्रिकाय् जुयाच्वंगु हिंसात्मक प्रदर्शनय् सीपिनिगु ल्याः ७२ म्ह थ्यंगु दु।
पूर्व राष्ट्रपति ज्याकोब जुमा जेल चलान जुइवं सुरु जुगु हिंसात्मक प्रदर्शनय् ७२ म्हेसिगु ज्यान वंगु धका बीबीसीं धागु दु। ज्याकोब जुमा निर्दोष जुगु धासे वया समर्थकपिन्स रिहाइया माग यासे विरोध प्रदर्शन यागु खः।
हिंसा तच्वया वंगुलि दक्षिण अफ्रिकाय् लुटपाटया घटना न अप्वोया वंगु दु। प्रहरीं आःतक १२ सय स्वया अप्वो प्रदर्शनकारीपिन्त ज्वने धुकुगु दु।
वंगु वाःय् जुमां प्रहरी समक्ष आत्मसमर्पण यागुलि वया समर्थकपिन्स विरोध प्रदर्शन यागु खः। जुमायात भ्रष्टाचार यागु आरोप लगे जुगु खः।
दक्षिण अफ्रिकाय् ब्वज्या तच्वेवं सेना परिचालन
दिल्लाथ्व तृतीया ११४१,असार २९ मंगलवाः
दक्षिण अफ्रिकाया पूर्व राष्ट्रपति याकुब जुमायात त्वःतेत माग यानाः न्ह्यानाच्वंगु ब्वज्या तच्वःगु दु ।
थीथी थासय् ब्वज्या जूगुलिसे हिंसात्मक घटनात जूगु दु । ब्वज्यालिसलिसे लुटपाट व चोरीया घटना तकं जुइवं थीथी शहरय् सेना परिचालन याःगु दु । पूर्व राष्ट्रपति जुमायात भ्रष्टाचार याःगु द्वपं ब्यूगु खः ।
अनलिं न्यायालयं छानविन यायेत जुमायात अदालतय् सःतूगु खःसां वय्कलं अदालतया आदेशयात अस्वीकार यानादिल । तर अदालतं जुमायात हिरासतय् मकाःसें जेल सजाय न्यंकाब्यूगु खः ।
थ्वहे निर्णयलिसे पूर्व राष्ट्रपति जुमां प्रहरीया न्ह्यःनय् आत्मसमर्पण यानादीगु दु । अनलिं वय्कया समर्थकपिन्सं मदिक्क सडक ब्वज्या यानावःगु दु । ब्वज्यां हिंसात्मक रुप कायेवं प्रशासनं सेना परिचालन याःगु दु ।
स्थिति नियन्त्रणं पिहाँवनेत्यंगु धासें दक्षिण अफ्रिकी सरकारं सुरक्षा व्यवस्था कडा याःगु दु । लिपांगु ईलय् ब्वज्याय् सुरक्षाकःमिपिन्सं हस्तक्षेप यानाहःगु दु । थ्वहेदथुइ छवाःदुने ६म्ह ब्वज्यामि सीधुंकूगु दु ।
निसःम्ह मल्याक ब्वज्यामितय्त ज्वनायंकूगु दु । ८९दँया पूर्व राष्ट्रपति जुमा सन् २०१८ न्ह्यः गुदँ तक सत्ताय् च्वंबलय् पदीय दुरुपयोग यानाः अकुत सम्पति मुंकूगु धासें अदालतं छानविन प्रक्रिया न्ह्याकूगु खः ।
अशान्त जुल दक्षिण अफ्रिका
दिल्लाथ्व व्दितिया ११४१, असार २८ सोमबाः
पूर्वराष्ट्रपति ज्याकव जुमां प्रहरीया न्ह्यःने आत्मसमर्पण याःगुलिसें दक्षिण अफ्रिका अशान्त जूगु दु ।
पूर्वराष्ट्रपति जुमाया समर्थकतय्सं वय्कःया रिहाइया माग यासें शहरया थीथी भागय् प्रदर्शन याःगु दु । दक्षिण अफ्रिकाया जोहानेसबर्गय् मुंपिं प्रदर्शनकारीतय्सं यातायात सेवा अवरुद्ध याःगु ह्वःताः लाकाः छुं लुटेरा पुचलं शहरया पसलय् लुटपाट याःगु दु ।
प्रदर्शनया झ्वलय् ६०म्हेसित ज्वंगु दु । प्रदर्शनकारीतय्सं जुमा निर्दोष खःगु धासें रिहा मयाःतल्ले आन्दोलन लित मकायेगु चेतावनी ब्यूगु दु । उमिसं थाय्थासय् आगजनी व तोडफोड यायेधुंकाः प्रहरीलिसे जूगु झडपय् छुं प्रदर्शनकारी घाःपाः जूगु दु ।
थ्व हे दथुइ, दक्षिण अफ्रिकाया राष्ट्रपति सिरिल रामाफोसां प्रदर्शकारीतय्त धैर्य तयेत अपील यानादीगु दु । वंगु बुधबाः जुमां थःगु निवास लिक्क दुगु कारागारय् वनाः प्रहरीया न्ह्यःने आत्मसमर्पण याःगु खः ।
आत्मसमर्पण मयाःसा ७९ दँया पूर्वराष्ट्रपतियात ज्वनेगु चेतावनी बियाकथं जुमां आत्मसमर्पण याःगु खः । भ्रष्टाचारया द्वपं लायेधुंकाः जुमायात अदालतय् उपस्थित मजूगु हुनिं वंगु वालय् १५ लाया जेल सजाय न्यंकूगु खः ।
कतारय् न्हापांखुसी विधानसभा निर्वाचन जुइगु
दिल्लाथ्व व्दितिया ११४१, असार २८ सोमबाः
कतारं थःगु न्हापांगु विधानसभा निर्वाचनया पर्यवेक्षणया लागिं छगू समिति गठन याःगु दु ।
वइगु अक्टोबरय् जुइगु विधानसभा निर्वाचनया निष्पक्षता अनुगमन यायेत समिति गठन यानागु आन्तरिक मन्त्रालयं न्ह्यथंगु दु । स्वब्वय् निब्वअथवा ४५ मध्ये ३० दुजःया सल्लाहकार काउन्सिलया लागिं मतदान जुइगु कतार सरकारं न्ह्यथंगु दु ।
कतारया अमिर शेख तमिम बिन हमद अल थानीं १५ काउन्सिल दुजः नियुक्ति याइगु कानुनी व्यवस्था दु । प्रधानमन्त्री शेख खालिद बिन खलिफा अल थानीया निर्देशनय् गठन जूगु पर्यपेक्षण समितिया गृह मन्त्रालयया अधिकारीतय्सं नेतृत्व याइगु धाःगु दु ।
कतारय् थ्वयां न्ह्यः स्थानीय तहया निर्वाचन जुइधुंकूगु दु । मेगु खाडी देशय् थें कतारय् नं राजनीतिक दलतय्त धाःसा प्रतिबन्ध तयातःगु दु । प्रधानमन्त्री शेख खालिदं आकिवं जुइगु विश्वकप फुटबल न्ह्यः हे कतारय् निर्वाचन जुइधुंकीगु धयादीगु खः ।
लिपांगु छुं लाय् कतारं संवैधानिक प्रक्रिया व वैधानिक विधि लिनाः चुनावी प्रक्रिया न्ह्यःने यंकेगु धाःगु खः । करिब ३० लख जनसंख्या दुगु कतारय् १० प्रतिशत स्वयां अप्वः विदेशी कामदार दुगु अनया सरकारं न्ह्यथंगु दु ।
