Display Style:
Column Style
हलिंन्यंक कोरोनाभाइरस सीपिं ३० लखया न्ह्यःने थ्यंबलय् लंपिं ८ लखत्या पुल
विकाश | बछलाथ्व चतुर्थी ११४०,बैसाख १६ गते
हलिंन्यंक कोरोना भाइरस (कोभिड १९) पाखें संक्रमित जूपिनिगु ल्याः २९ लाख ९६ हजार ८ सय ८५ थ्यंगु दु ।
सीपिनिगु ल्याः २ लख ७द्वः व १९५ थ्यंबलय् ८ लाख ७२ हजार ६०७म्ह लनेधुंकूगु दु ।
कोरोना भाइरसं दक्कले आपाः प्रभावित देय् अमेरिकाय् आःतक्क ९ लाख ८७ हजार ३०६म्ह थ्यंगु दुसा ५५ हजार ४८८म्ह सीगु दु । न्युयोर्कय् जक २२ हजार २ सय ७५म्ह सीगु दु ।
अमेरिकाय् थुगु ल्वय् लंपिनिगु ल्याः धाःसा संख्या एक लाख ९ हजार ५०१म्ह दु ।
स्पेनय् २ लख २६द्वः व ६२९म्ह संक्रमित जूगुलिइ छगू लख १७द्वः ७२७म्हेसित लनेधुंकूगु दु । २३द्वः व १९०म्हेसित लंगु दु ।
अथे हे, इटलीइ १ लख ९७द्वः ६७५म्ह संक्रमितमध्ये २६द्वः व ६४४म्ह सीधुंकूगु दु । ६४द्वः व ९२८ लंगु दु ।
ईटालीइ संक्रमण नियन्त्रणय् वयाच्वंगु धासें वइगु मे महिनाया ४ निसें लकडाउन छ्वासुकेगु घोषणा नं यायेधुंकूगु दु ।
फ्रान्सय् १ लख ६३द्वः व ४७३म्ह संक्रमित जूबलय् २२द्वः व ८९० सीगु दु । ४५द्वः व ६८१म्हेसित ल्वय् लंगु दु ।
जर्मनीइ १ लख ५७द्वः व ७७०म्ह संक्रमित जूबलय् ल्वय् लंपिं १ लख १४द्वः व न्यासः थ्यंगु दु । ५द्वः व ९७६ म्ह सीगु दु ।
थुगु भाइरस पिहांवःगु देय् चीनय् ८३द्वः व ९१३म्ह संक्रमित जूबलय् ७८द्वः २७७म्हेसित ल्वय् लनेधुंकूगु दु । सीपिनिगु ल्याः ४द्वः व ६३७ दु । चाइनां वुहानया दक्वं अस्पताल संक्रमित मुक्त जूगु घोषणा यायेधुंकूगु दु ।
हलिमय् न्यंक संक्रमितपिनिगु ल्याः थहां वनाच्वंगु इलय् ल्वय् लंपिनिगु ल्याः नं धमाधम थहां वनाच्वंगु दु । थ्व हे दथुइ गुलिखे देशं संक्रमण नियन्त्रणय् वःगु घोषणा तकं यायेधुंकूगु दु ।
अमेरिकाय् ग्वःफसं ७म्ह सित
लहना न्यूज | ने.सं. ११४० बछलाथ्व पारु (२४ अप्रिल २०२०), शुक्रवाः
दक्षिणी ओक्लाहामा, टेक्सस् व लुइजियानाय् वःगु ग्वःफसं म्होतिं नं ७म्ह सीगु दुसा दर्जनौं घाःपाः जूगु दु ।
थुगु लागाय् बुधवाः व विहिवाः तसकं ग्वःफय्, खुसिबाः वःगु विविसीं न्ह्यथंगु दु ।
ओक्लाहामा व टेक्सासय् तसकं ग्यानापुक्क वःगु ग्वःफसय् लानाः न्याम्ह सीगु खः ।
लुइसियानाय् छम्ह ग्वःफसं यानाः सीगु दुसा मेम्ह छम्ह धाःसा खुसिबालं सीगु खः ।
राष्ट्रिय मौसम सेवाकथं स्थानीय ईकथं सनिलया ६ताःइलय् ओनालास्का शहर व टेक्सासया पोल्क व स्यान ज्याकिन्टो शहरया मेमेगु लागाय् तसकं ग्यानापुक्क ग्वःफय् वःगु खः ।
ओनालास्काया स्थानीय सञ्चारमाध्यमकथं अनय् ग्वःफसं स्वम्ह मनूत सीगु खःसा स्वीम्ह स्वयां अप्वः मनूत घाःपाः जूगु खः ।
छेँ, व्यवसाय व मेमेगु पूर्वाधारयात अतिकं खति लाकूगु सञ्चारमाध्यमं न्ह्यथंगु दु ।
अथे हे, सनिलया ४ः३०ताः इलय् वःगु ग्वःफसं दक्षिणी ओक्लाहोमाय् निम्ह सीगु दु । लुइसियानय् मेम्ह छम्ह मिसा नं ग्वःफसं सीगु स्थानीय अधिकारीतसें न्ह्यथंगु दु ।
थुगु महिनाया शुरुइ जक ग्वःफय् व खुसिबाःया हुनिं उगु लागाय् २६म्ह सीधुंकूगु दु ।
थ्वया नापनापं अमेरिकाय् ग्वःफसं यानाः सीपिनिगु ल्याः ७४म्ह थ्यंगु दु ।
डब्ल्यूएचओयात ३ करोड डलर बिइगु चीनया घोषणा
लहनान्युज | चौलागा औसी ११४०, बैसाख ११ बिहिवाः
चीनं विश्व स्वास्थ्य संगठन (डब्ल्यूएचओ)यात ३ करोड अमेरिकी डलर बिइगु घोषणा याःगु दु ।
अमेरिकां डब्ल्यूएचओयात ग्वाहालि मयायेगु निर्णय याःगु छु ई लिपा चीनं ग्वाहालि यायेगु घोषणा याःगु दु । चीनं कोरोना भाइरस (कोभिड(१९) विरुद्धया लडाइँया लागि थुगु ग्वाहालि यायेत्यःगु खः ।
थ्व स्वया न्ह्यः अमेरिकां डब्ल्यूएचओं थुगु महामारीयात नियन्त्रण यायेत माःगु पलाः मल्ह्वःगु आरोप बिसे आतक बिया वया च्वंगु ग्वाहालि मयायेगु निर्णय याःगु खः ।
चिनियाँ विदेशमन्त्री कङ शुआङं थ्व स्वया न्ह्यः निगु करोड डलर ग्वाहालि यायेगु धाःगु आः स्वगु करोड डलर मेगु ग्वाहालि याये त्यःगु धका धाःगु खः । थुकिइ हलियकं स्वास्थ्य प्रणाली
बलाकिगु ग्वाहालि जुइ धका धाःगु दु ।
अमेरिकी राट्रपति डोनाल्ड ट्रम्पं डब्ल्यूएचओयात पक्षपात याःगु आरोप बिया वयाच्वंगु खः । अमेरिकी राट्रपति ट्रम्पं कथं दँय् दँस अमेरिकाय् कर पुलिइपि मनू तयेस डब्ल्यूएचओ यात ४० निसे ५० करोड डलर बिया वया च्वंगु खः । चीनं चार करोड डलर ग्वाहालि याना वया च्वंगु खः ।
कोरोना परीक्षणया नमूना यंकाच्वंम्हेसित गोलिं कयेकाः स्यात
लहना न्यूज | ने.सं. ११४० चौलागा चतुर्दसि (२१ अप्रिल २०२०), मंगलवाः
कोरोना भाइरस (कोभिड–१९) परीक्षणया नितिं स्वाब मुंकाः प्रयोगशालापाखे वनाच्वंम्ह छम्ह सवारी चालकयात म्यान्मारय् गोलिं कयेकाः स्याःगु दु ।
म्यान्मारया पश्चिमी प्रान्त रखाइनपाखें स्वाब ज्वनाः याङ्गुन वनाच्वंम्ह छम्ह ल्याय्म्हयात गोलिं कयेकाः स्यानाब्यूगु खः । गोलिं लानाः २८दँ दुम्ह प्याए सोन विन माउङ सीगु खँ धाःगु दु ।
संयुक्त राष्ट्र संघयाकथं विश्व स्वास्थ्य संगठनया गाडीइ स्वाब परीक्षणया नितिं याङ्गुन यंकाच्वंगु इलय् गोलि कयेकूगु खः ।
सीम्ह मनू स्वदँ न्ह्यःनिसें विश्व स्वास्थ्य संगठन (डब्लूएचओ)या नितिं ज्या याना वयाच्वंम्ह खः ।
उगु आक्रमणय् छम्ह स्वास्थ्यकःमि नं घाःपाः जूगु दुसा वय्कःया आः वासः जुयाच्वंगु धाःगु दु ।
आःतक म्यान्मारय् सच्छि व झिंगुुम्ह मनूयात कोरोना भाइरसया संक्रमण जूगु दुसा न्याम्ह सीधुंकूगु दु ।
थुगु लागाय् सरकारी सेना व अराकन चरमपन्थी दथुइ युद्ध जुयाच्वंगु दु । कोरोना भाइरसया महामारीया इलय् युद्धविरामया नितिं इनाप याःसां नं युद्ध द्यूगु मदुनि । म्यान्मारया थीथी चरमपन्थीं महामारीइ युद्धविरामया घोषणा याःगु खः । तर म्यान्मारया सेनां उकियात अस्वीकार याःगु खः ।
आक्रमणया जिम्मेवारी आःतक छुं नं पक्षं काःगु मदुनि । छगू पुचलं मेगु पुचःयात द्वपं बियाच्वंगु दु । दच्छि न्ह्यःनिसें थुगु लागाय् युद्ध न्ह्यानाच्वंगु खः । तर, लिपांगु इलय् आक्रमण अप्वया वनाच्वंगु दु ।
म्यान्मारया सेनाया प्रवक्ता टुन टुन नयीं सरकारयात ग्वाहालि यानाच्वंम्ह चालक स्यायेमाःगु सेनायात छुं नं कारण मदुगु धाःगु दु ।
क्यानाडाय् लाथेपाथे गोलिं कयेकूगु इलय् १६म्ह सित
लहना न्यूज | ने.सं. ११४० चौलागा त्रयोदसि (२० अप्रिल २०२०), सोमवाः
क्यानाडाया नोभा स्कटिया प्रान्तय् प्रहरीया भेषय् वःम्ह छम्ह बन्दुकधारीं म्हिगः आइतवाः लाथेपाथे गोलिं कयेकूगु इलय् म्होतिं नं १६म्ह सीगु दु ।
प्रहरीया कथं कोरोना भाइरसया हुनिं लकडाउन जुयाच्वंगुलिं मनूत छेँ दुने दुगु इलय् उम्ह मनू छेँछेँय् दुहांवनाः मनूतय्त गोलिं कयेकूगु व गुलिखे छेँय् मि तयाब्यूगु खः ।
बन्दुकधारी धाःसा प्रहरी कारबाहीस सीगु बिबिसीं न्ह्यथंगु दु ।
सीपिं मध्ये छम्ह प्रहरी अधिकृत नं जूगु धाःगु दु । हेलिफ्याक्सपाखें उत्तरय् थ्यंमथ्यं १०० किलोमिटरया दुरीइ लाःगु चीधंगु ग्रामीण शहर पोर्टापिय् उगु घटना जूगु खः । प्रहरीया कथं छगू चिखागु छेँया दुने व पिने मनूतय्गु सीम्ह लूगु खः ।
घटना लिपा हे प्रहरीं स्थानीयवासीपिन्त छेँ दुने च्वनेत व छेँय् तालं ग्वयेत इनाप याःगु खः ।
प्रहरीं बन्दुकधारी ५१दँ दुम्ह ग्याब्रियल वोर्टम्यान जूगु धाःगु दु । वय्कः नं पोर्टापिकया हे अस्थायी बासिन्दा जूगु प्रहरीं न्ह्यथंगु दु । वोर्टम्यान प्रहरीया लं पुनाः रोयल क्यानेडियन च्वयातःगु प्रहरी कारय् वःगु खः ।
क्यानेडियन प्रहरीया प्रवक्ता डानियल ब्राइनं उम्ह संदिग्धलिसें १६म्ह सीगु पुष्टि याःगु दु ।
