Display Style:
Column Style
फ्रान्सेली जलसेना कोरोनापाखें संक्रमित
लहना न्यूज | ने.सं. ११४० चौलागा त्रयोदसि (२० अप्रिल २०२०), सोमवाः
फ्रान्सेली जलसेनाका द्वःछि व ८१म्हेसिके कोरोना भाइरसया संक्रमण खनदुगु दु । चाल्र्स द गोल नाबिक रुशोनोटिक जहाजय् च्वंपिं २द्वः व १०म्ह सैनिकया कोरोना परीक्षण याःगु खः । सैनिकतय्के कोरोनाया लक्षण खनेदयेधुंकाः परीक्षण याःगु इलय् द्वःछि व ८१म्हेसिके संक्रमण जूगु खनेदुगु रक्षामन्त्री फ्लोरेन्स पार्लीं सार्वजनिक यानादीगु खः ।
राष्ट्रियसभाया रक्षा, सुरक्षा समितिइ रक्षामन्त्रीं लःल्हानादीगु रिपोर्टकथं कोरोनापाखें संक्रमित द्वःछि व ८१म्ह मध्ये ५४५म्हेसिके लक्षण खनेदुगु खः । मेपिं २४म्ह तुलोय च्वंगु सेन्ट आन मिलिटरी अस्पताल भर्ना याःगु दुसा छम्हेसित संघन उपचार कक्ष (आइसीयू)य् भर्ना याःगु दु ।
कोरोना भाइरस नेगेटिभ खनेदुपिं सैनिकतय्त नं क्वारेन्टाइनय् तःगु दु । परीक्षण जूपिं फुक्कसिगु विस्तृत रिपोर्ट धाःसा तयार मजूनिगु धाःगु दु ।
थुगु घटनालिपा राष्ट्रियसभाया विदेश मामिला, रक्षा व सशस्त्र बल समितिया नायः सिनेटर क्रिश्चियन क्याम्बनं रक्षामन्त्री फ्लोरेन्स पार्लीयात सेनाया दुजःपिं अपरेशनय् वने न्ह्यः व्यवस्थित स्वास्थ्य जाँचया नितिं इनाप यायेगु संकेत ब्यूगु दु ।
मिसनय् खटय् जूपिं सैनिकतय्के कोरोना भाइरसया लक्षण खनेदयेधुंकाः मिसन पूवनेगु स्वयां निवाः न्ह्यः हे लिहांवःगु दु ।
निरन्तर समुद्री यात्राय् वनाच्वंपिं सैनिकतय्त गुथं कोरोना भाइरस संक्रमण जुल धइगु रहस्यमय जूगु खँ धाःगु दु ।
भारतय् कोरोना न्यासः म्ह मनूत सित
लहनान्युज | चौलागा द्धादशी ११४०, बैसाख ७ आइतवाः
भारतय् कोरोना भाइरस (कोभिड–१९) पाखे न्यासः म्ह मनूत सिइगु दु ।
भारतया स्वास्थ्य मन्त्रालयया तथ्यांक कथं आतक कोरोना भाइरसया कारण सिइपिनिगु ल्याः न्यासः व न्ह्यम्ह थ्यःगु दु । वःगु २४ घण्टाय् कोरोना भाइरसं नीन्ह्यम्ह थ्यःगु दु ।
संक्रमित जुपिनिगु ल्याः वःगु २४ घण्टाय् द्धःछि व स्वसः न्हुपि संक्रमित जुपि पिहा वःगु दु । आतक संक्रमित जुपिनिगु ल्याः १५ द्धः व ७१२ म्ह थ्यःगु दु ।
भारतया दकदय् अप्वो संक्रमित जुगु महाराष्ट्रय् २११ म्ह कोरोना भाइरसया कारण सिइगु दु । अथेहे, मध्यप्रदेशय् ७० म्ह, गुजरातय् ५३ म्ह, दिल्लीइ ४२ म्ह सिइ धुकुगु दु ।
भारतया उत्तर प्रदेशय् आतक ९६९ म्ह संक्रमित जुगु दुसा १४ म्ह सिइ धुकुगु दु । अथेतु, बिहारय् ८६ म्ह संक्रमित जुुया निम्ह सिइगु दु ।
आतक भारतय् २२३१ म्ह संक्रमित जुपि वास याका छेँय् लिहा वने धुकगु दु ।
स्पेनय् कोरोना भाइरसं सिपि २० द्धःथ्यन
लहनान्युज | चौलागा एकादशी ११४०, बैसाख ६ शञ्चवाः
कोरोना भाइरसं (कोभिड–१९) स्पेनय् सिपिनिगु मनू तयेगु ल्याः २० द्धः स्वया अप्वो थ्यन ।
स्पेनया स्वास्थ्य मन्त्रालयं कोरोना भाइरसया कारण सिपिनिगु ल्याः २० द्धः व ४३ म्ह थ्यःगु दु ।
स्पेनय् लिपागु २४ घण्टाय् न्यासः व ६५ म्ह थ्यःगु दु । वःगु न्हि स्वया छु भचा कम जुगु दु ।
स्पेनमा लिपागु २४ घण्टाय् स्वद्धः व स्वद्धः व खुसः स्वया अप्वो मनूत संक्रमित जुपि लुगु दु । थ्व नाप संक्रमित जुपिनिगु ल्याः छुगु लाख ९१ द्धः व ७२६ म्ह थ्यःगु दु ।
आतक अन ७४ द्धः स्वया अप्वो मनूत वास याका छेँय् लिहा वने धुकुगु दु ।
भारतय् कोरोनाया हुनिं छम्ह प्रहरी अधिकृत मन्त
लहना न्यूज | ने.सं. ११४० चौलागा एकादसि (१८ अप्रिल २०२०), सञ्चरवाः
भारतया पञ्जाबय् कोरोना भाइरस (कोभिड–१९)या हुनिं छम्ह प्रहरी अधिकारी सीगु दु । पञ्जाबया लुधियानया एसीपी अनिल कोहलीया कोरोना भाइरसया हुनिं थौं सञ्चरवाः मदुगु खः । वय्कः अपोलो अस्पतालय् भर्ना जुयादीम्ह खः ।
कोहलीयात लुधियानाया हे एसपीएस अस्पतालय् प्लाज्मा थेरापी बीगु तयारी याःगु खः । तर, थुगु प्रकृया शुरु याये न्ह्यः हे कोहली मदुगु खः । पञ्जाबया मुख्यमन्त्री अमरिन्दर सिंहं एसीपी अनिल कोहली मदुगुलिं दुःख प्वंकादिल । सामाजिक सञ्जाल ट्वीटरपाखें वय्कलं छुं दिं न्ह्यः जक एसीपीइ कोरोना भाइरस संक्रमण पुष्टि जूगु धयादीगु खः ।
५२दँ दुम्ह एसीपी कोहली आःतक छुं नं विदेशय् वंगु मदुनि ।
अथे हे, भारतया मेपिं २६म्ह सुरक्षाकःमियात नं कोरोना संक्रमित जूगु दु । भारतीय जलसेनाया २६म्ह सुरक्षाकःमिपिंके कोरोना पोजेटिभ खनेदुगु खः ।
भारतीय सञ्चारमाध्यमया कथं पोजेटिभ खनेदुपिं गुम्ह सैनिक मुम्बइलय् च्वंगु पश्चिम कमाण्डया खः । रिपोर्ट पोजेटिभ वयेवं उमिगु वासः यायेगु ज्या न्ह्याःगु दु ।
जलसेनाय् कोरोना खनेदुगु थ्व न्हापांगु घटना धाःसा मखु । थ्व स्वयां न्ह्यः अमेरिकी नौसेनाया दर्जनौं सैनिकत नं कोरोनाया संक्रमण पुष्टि जूगु खः ।
कोरोनां सीपिनिगु ल्याः १गू लख ५४द्वः स्वयां अप्वः थ्यन
लहना न्यूज | ने.सं. ११४० चौलागा एकादसि (१८ अप्रिल २०२०), सञ्चरवाः
कोरोना भाइरस (कोभिड–१९)या संक्रमणपाखें थौं सञ्चरवाः सुथय् तक सीपिनिगु ल्याः १गू लख ५४द्वः २०९म्ह थ्यंगु दु ।
जोन होप्किन्स विश्वविद्यालय कोरोना रिसोर्स सेन्टरया कथं थौं सञ्चरवाः सुथय् तक संक्रमित जूपिनिगु ल्याः २२गू लख ४३द्वः ५१२म्ह थ्यंगु दु । अथे हे, कोरोना संक्रमण लिपा लंपिनिगु ल्याः ५गू लख ६९द्वः थ्यंगु दु ।
कोरोना भाइरसया संक्रमणपाखें आःतक अमेरिकाय् दकलय् अप्वः ३७द्वः व ५४म्ह सीगु दु । अमेरिकाय् जक कोरोना संक्रमित जूपिनिगु ल्याः थ्यंमथ्यं ७गू लख थ्यंगु दुसा लंपिनिगु ल्याः ५९द्वः प्यसः व ५२म्ह थ्यंगु दु ।
अमेरिका लिपा दकलय् अप्वः इटालीइ २२द्वः ७४५म्ह मनूत सीगु दु । इटालीइ संक्रमित जूपिनिगु ल्याः १गू लख ७२द्वः अथे हे, ४७द्वः ७२७म्ह मनूत वासः यानाः लंगु दु ।
अथे हे, स्पेनय् २०द्वः २म्ह सीगु दुसा संक्रमित जूपिनिगु ल्याः १गू लख ९०द्वःम्ह थ्यन । स्पेनय् थ्यंमथ्यं ७४द्वः मनूत वासः यानाः लंगु दु ।
थ्व हे झ्वलय् यूरोपेली देय् फ्रान्सय् १८द्वः ७०३म्ह, बेलायतय् १४द्वः ६०७म्ह सीगु दु । अथे हे, बेल्जियमय् ५द्वः १६३म्ह, इरानय् ४द्वः ९४८म्ह, चीनय् ४द्वः ६३६म्ह, नेदरल्याण्डसय् ३द्वः ४७१म्ह, ब्राजिलय् २द्वः १७१म्ह, टर्कीइ द्वःछि ७६९म्ह, क्यानाडाय् द्वःछि ३५६म्ह, स्वीट्जरल्याण्डय् द्वःछि ३२७, स्वीडेनय् द्वःछि व प्यसःम्ह मनूत सीधुंकूगु दु ।
