इजिप्टया विदेशमन्त्री बदर अब्देलाट्टी व जोर्डनया समकक्षी आयमान सफादी दथुइ काइरोय् नापलाःगु दु। उगु बैठकय् वय्कलं गाजा पट्टीइ याकन हे युद्धविराम यायेत इनाप यानादीगु दु।

निम्हं विदेशमन्त्रीं निगू मू आज्जु पूवंकेत क्षेत्रीय व अन्तर्राष्ट्रिय साझेदारलिसे निरन्तर ज्या यायेत इनाप न याःगु दु। गाजाय् तत्काल युद्धविराम जुइमाःगु व एन्क्लेभय् मानवीय ग्वाहालि आपूर्तिया निति माक्क पहुँच जुइमाःगु खँ धाःगु दु।

इजरायलं नकतिनि जक क्रसिङ्गया प्यालेस्टाइनी पक्षयात नियन्त्रणय् काःगु खः। इजिप्टया विदेशमन्त्रीं इजरायलं प्यालेस्टाइनीयात थःगु भूमिं विस्थापित यायेत स्वःगुलि व्यवस्थित नीतियात अस्वीकार यानागु खः धका धाःगु दु।

भारत उत्तर प्रदेशया उन्नावय् जूगु बस दुर्घटनाय् लानाः १८ म्ह मनूत सीगु दु। आगरा–लखनऊ द्रुतमार्गय् थौं सुथय् यात्रुवाहक बस दुर्घटना जूगु खः।

बिहारया सीतामढीं दिल्ली वनाच्वंगु बस दुरु ज्वनावःगु ट्यांकरयात दुर्घटना जूगु धका बीबीसीं जानकारी ब्यूगु दु। उगु बसय् च्वनावःपि १४ म्ह मिजंपि, स्वम्ह मिसा व छम्ह मचाया ज्यान वंगु खः।

भारतीय सञ्चार माध्यमया कथं उगु दुर्घटनाय् लानाः १९ म्ह घाःपाः जूगु दु धका धाःगु दु। भारतीय प्रधानमन्त्री नरेन्द्र मोदीं दुर्घटनाय् लानाः सीपि छेँ जःपिन्त निगु लख व घाःपाः जूपिंत न्यय् द्धः बिइगु घोषणा यागु दु।

रुसी राष्ट्रपति भ्लादिमिर पुटिनं रुसी सेनाय् भर्ना जूपिं भारतीय नागरिकपिन्त मुक्त यायेगु बचं ब्यूगु दु। भारतीय प्रधानमन्त्री नरेन्द्र मोदीया भ्रमणया झ्वलय् रुसी राष्ट्रपति पुटिनं याकनं हे भारतीयतय्त मुक्त यायेगु बचं ब्यूगु खः।

भारतीय विदेशमन्त्री विनयमोहन क्वात्रां मोदी व पुटिन दथुइ रुसी सेनाय् भारतीय नागरिकयात मुक्त यायेगु विषयस सहलह जूगु जानकारी ब्यूगु दु। मस्कोय् पत्रकारतलिसे जूगु खँल्हाबल्हाय् वय्कलं धयादी, ‘रुसी सेनाय् भर्ना जूपिं भारतीयतय्त याकनं त्वःतेगु नितिं प्रधानमन्त्रीं थ्व विषययात कडा रुपं ल्ह्वंगु दु।

विदेशमन्त्री क्वात्राया कथं आःतक थ्यंमथ्यं ३५ निसें ५० म्ह भारतीयत रुसी सेनाय् भर्ना जुइधुंकूगु दु। इपिं मध्यय् १० म्ह छेँय् लिहां वनेधुंकल ।युक्रेनलिसे जुगु युद्धय् म्हतिइ न प्यम्ह भारतीय सी धुकुगु दु धका द हिन्दुं जानकारी ब्यूगु दु। तर भारतीय विदेश मन्त्रालयं थ्वसिबें न्ह्यः असार ११ गते निम्ह सीगु पुष्टि याःगु दु।

व स्वयां न्ह्यः फेब्र्रुअरी व मार्चय् छम्ह छम्ह भारतीय नागरिक सीउगु खः। हिन्दूया कथं निम्ह भारतय् हय् धुुकुगु दु। निम्ह धाः सा आप्तक तनाच्वंगु दु। थ्यंमथ्यं ३० म्ह स्वदेश लिहाँ वयेत परराष्ट्र मन्त्रालयलिसे स्वापू तये धुुकुगु दु।

दक्षिण कोरियाली कम्पनी सामसुङया ३० हजार कर्मचारीपिन्सं अनिश्चितकालीन हडताल न्ह्याकूगु दु

थ्वसिबें न्ह्यः प्रविधि कम्पनी सामसुङया कर्मचारीतय्सं तलब वृद्धि व मेमेगु सुविधाया माग यासें स्वन्हुयंकं हडताल याःगु खः। तर थ्व हे झ्वलय् कर्मचारी युनियनं थःपिनिगु मागयात कयाः व्यवस्थापन पक्ष गम्भीर मजूगु धासें थनिंनिसें अनिश्चितकालीन हडताल न्ह्याकूगु दु।

मेमोरी चिप, स्मार्टफोन व टेलिभिजन दयेकीगु विश्वया दकलय् तःधंगु कम्पनी सामसुङ इलेक्ट्रोनिक्स खः। संघया वेबसाइटय् न्हापांगु आम हडताल लिपा नं कम्पनीं वार्ता यायेगु मनसाय क्यंगु मदुगुलिं निक्वःगु अनिश्चितकालीन आम हडताल आह्वान याःगु उल्लेख यानातःगु दु। कर्मचारीतय्गु हडतालया हुनिं उत्पादन अवरुद्ध जूगु दु।

तर सामसुङं थ्व दाबीयात अस्वीकार याःगु बीबीसीं जानकारी ब्यूगु दु। कम्पनीया थ्यंमथ्यं ५५ दँया इतिहासय् थुलि तःधंगु हडताल जूगु थ्व न्हापांखुसी खः। थ्व हडताल लिपा कोरिया स्टक एक्सचेञ्जय् सामसुङया शेयरय् थहां वंगु दु।

भारतया उत्तर प्रदेश हाथरसय् छगु धार्मिक ज्याझ्वलय् १ सय १६ म्हेसिगु ज्यान वःगु दु। हिन्दूया सत्सङ्ग ज्याझ्वलय् जूगु उगु घटनाय् मेपि न अप्पो घाःपाः जूगु दु धका बीबीसीं धाःगु दु।

सीपि अप्पो थे मचापि व मिसापि धका धाःगु दु। घाःपाः जूगुनिगु अस्पतालय् वासः याकाच्वंगु दु। प्रधानमन्त्री नरेन्द्र मोदीं हाथरस घटनाय् दुःख प्वकूसे सीपिनिगु परिवारयात निगु लाख व घाःपाः जूपिन्त ५० हजार बिइगु धका घोषणा याःगु दु।

उत्तर प्रदेश सरकारं सीपिनिगु परिवारयात निगु लाख व घाःपाः जूपिन्त ५० हजार बिइगु घोषणा याये धुकुगु दु।