अमेरिकाया पूर्वराष्ट्रपति नाप राष्ट्रपति पदया उम्मेदवार डोनाल्ड ट्रम्पं थः निर्वाचनय् त्यात धाःसा थःगु सरकारय् टेस्ला कम्पनीया मालिक अर्बपति व्यवसायी एलन मस्कयात मन्त्री दयकेगु घोषणा यानादीगु दु।

समाचार एजेन्सी रोयटर्स नाप खँ ल्हायेगु झ्वलय् ट्रम्पं मस्क वौद्धिक मनू खः धका धयादीसे अज्याम्ह मनूयात थःगु मन्त्रिमण्डलय् दुथ्याकेगु घोषणा यानादीगु खः।

मस्कं छु दिं न्ह्यः थःगु सामाजिक सञ्जाल एक्सय् ट्रम्पया अन्तवार्ता काये धुका ट्रम्पया खँ थुकथ पिहावःगु खः। अन्तरवार्ताया झ्वलय् मस्कं अटोमोबाइलया प्रशंसा यानादीसे दक्को विद्युतीय कार न्यायेमाःगु धका धयादीगु खः।

मस्कं धासा थुगु विषय ट्रम्पनाप छु न खँल्हावल्हा मजुगु धका धयादीगु खः। द वासिङ्टन पोष्टया कथं मस्कं थ्व स्वया न्ह्यः सन् २०२० य् चुनावय् राष्ट्रपति जो बाइडेनयात समर्थन याःगु खः।

थाइल्यान्डय् पेतोङतार्न सिनावात्रा प्रधानमन्त्री जूगु दु। पूर्वप्रधानमन्त्री लिसे अर्बपति व्यवसायी थाक्सिन सिनावात्राया म्ह्याय् पेतोङतार्नयात शुक्रवाः थाई संसद् न प्रधानमन्त्रीइ ल्यःगु खः।

३७ दँ दुम्ह पेतोङतार्न थाइल्यान्डया दकलये म्हो दँ जक दुम्ह प्रधानमन्त्री जूगु दु। थाई संसदय् जुगु मतदानय् पेतोङतार्नयात पक्षय् ३१९ मत वःगु दु धका बेंग्कक पोस्टं धाःगु दु।

अथेहे पेतोङतार्नया विपक्षय् १४५ मत लागु खःसा २७ म्ह सांसदपिन्स ब्बति मकाउगु खः। शुक्रवाः सुथय् फेउ थाई पार्टीया महासचिव सोरावङ थिएंग्थोंग न शुक्रवाः पेतोङतार्नयात प्रधानमन्त्रीया कथं मनोनयन याःगु खः। पेतोङतार्न थाइल्यान्डय् निम्हम्ह प्रधानमन्त्री मिसाम्ह जुगु दु।

थ्व स्वया न्ह्यः पेतोङतार्नया काकी यिङ्गलक सिनावात्रा थाइल्यान्डया प्रधानमन्त्री जुगु खः। श्रीथा टाविसिनयात संवैधानिक अदालतं प्रधानमन्त्रीं बर्खास्त यायेवं पेतोङतार्न सिनावात्रा न्हुम्ह प्रधानमन्त्रीया कथं ल्यःगु खः।

रुसया भूभागय् युक्रेनया सेना दुहां वःगु दु। युक्रेनया राष्ट्रपति भोलोदिमिर जालेन्स्कीं थःगु सेना रुसया कुस्र्क क्षेत्रय् दुहां वंगु जानकारी ब्यूगु दु।

राष्ट्रपति जालेन्स्कीं बुधवाः बहनी सामाजिक संजालय् च्वंगु दु, “युक्रेनया सेनां रुसया कुस्र्क क्षेत्रय् थीथी दिशां छगू निसें निगू किलोमिटर न्ह्यःने तक दुहां वःगु दु।” राष्ट्रपति जेलेन्स्की नं ट्विटरय् (थौंकन्हय् एक्स) किपा व भिडियो पोष्ट याःगु दु।

छगू भिडियोय् जेलेन्स्की नं सेनाया शीर्ष कमाण्डर ओलेजेन्ड्र सिरस्कीलिसे खँ ल्हानाच्वंगु खनेदूगु दु। उगु भिडियोय् युक्रेनया कमाण्डर सिरस्कीं रुसी भूमिइ आक्रमणया झ्वलय् १०० म्ह रुसी सैनिक ज्वंगु धका धाःगु दु।

वय्कलं युक्रेनया सेनायात रुसी सेनाया नियन्त्रणं मुक्त यायेफइगु भलसा नं प्वंकादीगु दु। युक्रेनया सेनां रुसपाखें गुलि जग्गा कब्जा यात धैगु आःतक स्पष्ट मजूनिगु बीबीसीं बुखँ पिथंगु दु।

अफ्रिकी देशय् मन्कीपोक्स (एमपक्स)या संक्रमण अप्वोगुलि विश्व स्वास्थ्य संगठनं स्वास्थ्य संकटकाल घोषणा याःगु दु।

बुधवाः च्वंगु अन्तर्राष्ट्रिय स्वास्थ्य संगठनया आकस्मिक समितिया बैठकय् दुजःपिनिगु सुझाव लिपा डब्लुएचओया महानिर्देशक डा. टेड्रोस अडानोम ग्रेब्रेयससं स्वास्थ्य आपतकाल घोषणा याःगु डब्लुएचओं जानकारी ब्यूगु दु।

विश्व स्वास्थ्य संगठनं अन्तर्राष्ट्रिय कानुन कथं ल्वय् तीव्र गतिं न्यना वनीगु खतरा दुसा विश्व स्वास्थ्य संगठनं आपतकालया घोषणा याइ। अफ्रिकन सेन्टर फर डिजिज कन्ट्रोल एण्ड प्रिभेन्सनं मंगलवाः स्वास्थ्य संकटकाल घोषणा याःगु दु।

याकन सरे जुइगु एमपक्स ल्वय् अफ्रिका महादेशया गणतन्त्र कंगोय् सुरु जूगु खः। आः थुकिया संक्रमण बुरुन्डी, केन्या, रुवान्डा व युगाण्डाय् फैलेजुया वनाच्वंगु दु। डब्ल्यूएचओया कथं आःतक ५२४ म्ह मनूत सीधुंकूगु दुसा १४ हजारसिबें अप्वा् मनूत संक्रमित जुइ धकुगु दु।

अष्ट्रेलियाया क्वीन्सल्याण्डया केन्सय् च्वंगु छगू होटलया पलिइ हेलिकोप्टर दुर्घटना जुयाः पाइलटया ज्यान वंगु दु। हेलिकोप्टरय् पाइलट जक दुगु खः।

वयात घटनास्थलय् हे सीगु घोषणा याःगु क्वीन्सल्याण्ड प्रहरीं जानकारी ब्यूगु दु। प्रहरीया कथं हेलिकोप्टर दुर्घटना लिपा मिं नयाः थ्यंमथ्यं ४०० म्हेसित होटलं पिने यंकूगु खः।

होटलया ८० व ७० दँया निम्ह पाहाँ अस्पताल भर्ना जूगु दु। उमिगु अवस्था सामान्य जूगु दु।प्रहरीं दुर्घटनाया अनुसन्धान यानाच्वंगु दु। हेलिकोप्टर भाडाय् काःगु छगू कम्पनीया कथं थ्व उडान अनधिकृत धका धागु दु।

प्रत्यक्षदर्शीतय्सं धाःकथं वा वयाच्वंगु इलय् हेलिकोप्टर मत मच्याकूसे तसकं क्वं वःगु खः। होटलया छतय् दुर्घटना जूगु खः। वयां लिपा हेलिकोप्टरया निगु पंखाः त्वधुला स्विमिंग पुखूलि कुतुंवंगु धका धाःगु दु।

स्थानीयबासीया कथं हेलिकोप्टर न्यायेवं बम विस्फोट जूगु थें तःधंगु सः वःगु खः।