भारतया दक्षिणी राज्य केरलाय् तच्वकं वा वया चलखं सीपिनिगु ल्याः ९३ म्ह थ्यंगु दु। बीबीसीया कथं केरलाया वायनाड जिल्लाय् मंगलवाः सुथय् चलः वनाः आपालं मनूत बेपत्ता जुयाच्वंगु दु।

चलः वःगु थासय् ६५ म्हेसिगु सीम्ह लुयावःगु खः। वायनाड जिल्लाया मुण्डक्काई, अतामाला, चोरलमाला व कुनहोल्म क्षेत्रय् चलखं लिच्वः लाःगु दु। मदिक्क वा वयाच्वंगु व ताँ दुनावःगु हुनिं उद्धार यायेगु ज्या जुयाच्वंसा अन समस्या जुयाच्वंगु दु।

स्थानीय प्रशासनया कथं उद्धार यायेगुलि सेना व प्रहरीलिसें २०० म्ह संलग्न जुयाच्वंगु दु। प्रान्त स्वास्थ्यमन्त्री बिना गोरेजं छुं ई लिपा क्षतिया सही विवरण बी फइगु लिसः ब्यूगु दु।

घाःपाः जूपिं १२५ म्हेसिगु वासः जुयाच्वंगु व २५० म्हेसिगु उद्धार यायेधुंकूगु वय्कलं धयादीगु दु। मदिक्क वा वःगु हुनिं केरलाय् झीगु जिल्लाय् स्कुल व कलेज बन्द जूगु दु।

भारत सरकारं चलखय् लानाः ज्यान गुमेयापिं छेँजःपिन्त नीगु लख व घाःपाः जूपिन्त ५० हजार राहत बीगु घोषणा याये धुकुगु दु।

जापानया छगू लुँखानी युनेस्कोया विश्व सम्पदा धलखय् लागु दु। दक्षिण कोरियां थःगु आपत्ति लित कायेवं मध्य जापानया साडो टापुइ च्वंगु साडो लुँखानी विश्व सम्पदा धलखय् दुथ्यागू खः।

थ्व स्वया न्ह्यः निक्वःगु विश्वयुद्धया झ्वलय् उगु खानीइ कोरियापाख् झण्डै निद्धः मनूतय््त जबरजस्ती ज्या यायेगु लागिु तःगु खः धका दक्षिण कोरियां आपत्ति प्वकूगु खः।

जापान खानी सञ्चालनया दक्को सम्पूर्ण इतिहास पारदर्शी कथं चायकेत सहमत जुइवं दक्षिण कोरियां थःगु आपत्ति लित काःगु धका जापानी सञ्चार माध्यम द जापान टाइम्सं धाःगु दु।

झींखुगु शताब्दीइ न्ह्यागू उगु खानीइ उत्खननया ज्या याःगु खः। उगु साडो टापु ज्वालामुखी लाभापाख मिले जूया पहाड दु खः। उगु दथुइ कुनिना धइगु समतल भूमिइ लुँ व वहःया तधःगु भण्डार लुगु खः।

इजरायलया प्रधानमन्त्री बेन्जामिन नेतान्याहुं विद्रोही पुचः हमासयात पूर्ण रुपं नष्ट मयाःतले गाजाय् जुइगु आक्रमण दिकेमखुगु धका धयादीगु दु।

विरोध व बहिष्कारया दथुइ अमेरिकी कांग्रेसया मंकाः अधिवेशनयात सम्बोधन यासें नेतान्याहुं हमास विरुद्धया कारवाही दिके मखु धका धयादीगु खः। थ्व स्वया न्ह्यः नं इजरायलं हमास विरुद्धया कारबाही दिके मखु धकाः धायेगु याना वयाच्वंगु खः।

नेतान्याहुं अमेरिकाय् संसदयात सम्बोधन यानाच्वंगु इलय् सत्तारुढ डेमोक्र्याटिक पार्टीया सांसदतय्सं बैठक बहिष्कार याःगु खःसा यक्वसिनं विरोध याःगु खः। इमिसं थःपिं हिंसा व नरसंहारया विरोधी खः धका बीबीसीं जानकारी ब्यूगु दु।

नेतान्याहुं प्यालेस्टाइन, इरानय् हमास समूह, लेबनानय् हिजबुल समूह व यमनय् हुथी विद्रोही विरुद्धया अभियानय् इजरायल संलग्न जूगु धयादिसें नेतान्याहुं अमेरिकी समर्थन व ग्वाहालिया निंतिं आह्वान यानादीगु खः।

अमेरिकाया सिक्रेट सर्भिस अर्थात् गुप्तचर संस्थाया निर्देशक किम्बर्ली चिटल थःगु पदं राजीनामा बिउगु दु। राष्ट्रपतिया उम्मेदवार डोनाल्ड ट्रम्पयात गोली प्रहार याःगु घटना लिपा गोप्य सेवाया प्रमुख चितलं राजीनामा ब्यूगु खः।

बीबीसीया कथं नोभेम्बरय् जुइगु राष्ट्रपति चुनावय् रिपब्लिकन पार्टीया उम्मेदवार ट्रम्पयात लक्षित यानाः छुं दिं न्ह्यः जूगु आक्रमणयात थःगु मिसन एजेन्सीं पनेगु ज्याय् असफल जूगु स्वीकार याःगु दु। जुलाई १३ य् पेन्सिलभेनियाय् जूगु चुनावी सभाय् छम्ह बन्दुकधारीं ट्रम्पयात गोली क्ययेकूगु खः।

वयां याकनं हे चितलयात डेमोक्रेत रिपब्लिकनतय्सं पदं राजीनामा बीत दबाब ब्यूगु खः। चितलयात वर्तमान राष्ट्रपति जो बिडेनं एजेन्सीया प्रमुख नियुक्त याःगु खः। ट्रम्पया जवगु न्हाय्पंनय् गोलीं कयेकूगु खः। न्हाय्पं ठीक जुयाच्वंगु दु धका चिकित्सकं धाःगु दु।

हलिमयय् दकलय् धनीम्ह एलोन मस्कया कम्पनी टेस्लां वइगु दँय् मानवीय रोबोट उत्पादन व छ्यलीइगु ज्या न्ह्याकेत्यंगु दु।मस्कं सामाजिक सञ्जाल ‘एक्स’पाखें वइगु दँनिसें मानवीय रोबोटया उत्पादन व छ्यलाबुला बारे जानकारी ब्यूगु दु।

मस्कं थुज्वःगु रोबोट न्हापां टेस्लां छ्यलीगु व निदँ लिपा अर्थात सन् २०२६ य् जक मेमेगु कम्पनीयात मीइगु धका धाःगु दु। बीबीसीया समाचारय् थुगु दँनिसें टेस्लाया कारखानाय् अज्याःगु रोबोट छ्यलेगु योजना दुगु खँ न्ह्यथनातःगु दु, तर लिबाःगु दु। मस्कं थ्वसिबें न्ह्यः अज्याःगु रोबोटयात २० हजार डलरय् मीगु घोषणा याःगु खःसां थुकिया मू आःतक सार्वजनिक याःगु मदुनि।

थुपिं रोबोटतसें मनूत थें ज्या यायेफु। ‘होण्डा’ व ‘बोस्टन डायनामिक्स’ लिसेंया मेमेगु कम्पनीं नं थःगु हे कथंया मानवीय रोबोट विकास यानाच्वंगु दु। एलोन मस्कं धयाच्वंगु हरेक योजनायात धक्का बियाच्वंगुलिं रोबोट मानव योजना तकं वइगु दँतक पूवने मफइगु सम्भावना दु। सन् २०१९ य् वइगु दँनिसें सतकय् ‘सेल्फ ड्राइभिङ’ अर्थात अटोमेटिक ट्याक्सी चले जुइगु घोषणा जूसां नं थ्व घोषणा आःतक लागू जूगु मदुनि।

विद्युतीय सवारी साधनया माग म्हो जुयाच्वंगु इलय् टेस्लां कृत्रिम बुद्धिमत्ता अर्थात ‘कृत्रिम बुद्धिमत्ता’ (एआई), स्वचालित सवारी साधन व रोबोट थेंज्याःगु प्रविधिइ ध्यान बियाच्वंगु दु।