टर्कीइ म्हिगः आइतवाः जुगु राष्ट्रपति चुनावय् सू ना नं ५० प्रतिशत स्वया अप्पो मत महगुलि हाकन चुनाव जुइगु दु।

समाचार संस्था रोयटर्सया कथं दकलय् अप्पो मतहःपि निम्ह उम्मेदवार दथुइ मे २८ य् हाकन चुनाव जुइ त्यःगु खः।

आइतवाः जुगु चुनाव बहालवाला राष्ट्रपति रेसेप तय्यिप एर्दोगानं दकलय् अप्पो मत काःगु खः।

एर्दोगानं ४९.३९ प्रतिशत मत हःगु खःसा वयकःया निकटतम् प्रतिस्पर्धी विपक्षी गठबन्धनका केमाल किलिक्डारोग्लुले ४४.९२ प्रतिशत मत ल्याए। मेम्ह उम्मेदवार सिनान ओगानं ५.३ प्रतिशत मत हःगु खः।

भारतया केरलाय् डुङ्गा डुबे जुया २१ म्हेसिगु ज्यान वंगु दु। केरलाया मलप्पुरमय् डुङ्गा दुर्घटना जूगु खः।

दुर्घटनाय् मेपि न घाःपाः जूगु दु। उगु डुङ्गाय् ग्वम्ह च्वना वःगु दु धका धाःसा सिइमदुनि।

केरलाया मुख्यमन्त्री विजय पिनारई न उद्धार ज्या याकन यायेत निर्देशन बिःगु दु।

श्रीलङ्काय् सच्छि स्वया अप्पो वासःया अभाव जूगु दु।

अनया सरकारी अस्पतालय् छ्यला च्वंगु सच्छि स्वया अप्पो वासः अभाव जूगु दु धका म्हिगः संसदय् स्वास्थ्यमन्त्री केहेलिया रामबुकवेलां जानकारी बिःगु दु।

सरकारी अस्पतालय् १ हजार ३ सय ४७ प्रकारया वासः छ्यला च्वंगुलि उकि मध्ये १ सय १२ प्रकारया वासः अभाव जूगु दु धका मन्त्री रामबुकवेलां जानकारी बिःगु खः।

श्रीलङ्का सरकारं वासः आयातय् वार्षिक ५० अर्ब रुपैयाँ (१५ करोड ५० लाख अमेरिकी डलर) खर्च याना वयाच्वंगु खः।

जम्मु–कश्मीरय् भारतीय सेनायात आक्रमण जूगुलि न्याम्ह मदुगु दु। जम्मु कश्मीर को पुँछ धाःगु थासय् भारतीय सेना च्वनावंगु गाडीइ ग्रिनेडं आक्रमण याःगु खः।

थुगु आक्रमण चरमपन्थी समूहया ल्हाः दुगु धका भारतीय सेनां धाःगु दु।

भारतीय सेनाया नर्दन कमाण्ड हेडक्वाटरपाखे जारी विज्ञप्तिइ बिहीबाः न्हिनय् करिब ३ बजे सेना च्वना वंगु गाडीइ चरमपन्थीपिन्स ल्हातं ग्रिनेड आक्रमण याःगु खः। वया लिपा गाडीइ मिँ च्याःगु खः।

थुगु घटनाय् राष्ट्रिय राइफल्सया न्याम्ह जवानपि सीउगु दु धका विज्ञप्तिए न्ह्यथना तःगु दु। आक्रमणय् छम्ह तसकं घाःपाः जूगु दु सा वयागु उपचार रजौरीस्थित सैनिक अस्पतालय् जुयाच्वंगु दु धका भारतीय मिडियां धाःगु दु।

अमेरिकी डलर अर्बपति एलन मस्कयागु कम्पनी स्पेस एक्सं दयकूगु रकेट परीक्षण उडान यायेगु झ्वलय् विष्फोट जूगु  दु।

आःतक दकलय् शक्तिशाली धयातःगु स्टारशिप रकेट टेक्ससया परीक्षणय् केन्द्रपाखे ब्बःगु छु ई लिपा हे आकाशय् विष्फोट जूगु खः।

थुगु यान अन्तरीक्ष यात्रीपिन्त चन्द्रमा, मंगल ग्रह व मेमेगु अन्तरीक्ष अभियानय् यकेगु आज्जुं दयकूगु खः । एलन मस्कया थ्व महात्वाकांक्षी परियोजना खः।

ब्बःगु स्वगु मिनेट लिपा हे स्टारशिप रकेटया क्याप्सुल याःगु फस्ट स्टेज रकेट बुस्टरपाखे अलग जुइमाःगु व मजुगु खः। वया लिपा रकेट बिस्फोट जूया परीक्षण उडान असफल जूगु खः।

व स्वया न्ह्यः वंगु सोमबाः थुगु यान परीक्षण यायेत्यःगु खःसा लिपागु इलय् स्थगित याःगु खः।