भारतया गुजरातय् वडोदरा हरनी तालय् डुङ्गा डुबे जूया १४ म्हेसिगु ज्यान वंगु दु। अथेहे खुम्ह बेपत्ता जूयाच्वंगु दु ।

म्हिगः जूगु दुर्घटनाय् १२ म्ह मचापि व निम्ह शिक्षकया ज्यान वंगु दु धका बीबीसीं धाःगु दु। डुङ्गाय् २७ म्ह च्वना वंगु खः। न्ह्यय्म्हेसित उद्धार याना अस्पतालय् भर्ना याःगु दु।

तःपिन्त मालेगु ज्या जुयाच्वंगु दु।

युक्रेन सेनां आजोभ सागरय् रुसी जासूस सैन्य विमान कूतुकाःगु दाबी याःगु दु। युक्रेनी सेना प्रमुखं वायुसेनां ताहाकःगु दूरीया राडार पत्ता लगे याइगु रुसया विमानयात नष्ट याःगु धका बीबीसी हिन्दीं धाःगु दु।

थुगु विमानं रुसया हवाई सुरक्षा प्रणाली पत्ता लगे याइगु जेट विमान सम्भावित निशाना न्हापा हे पत्ता लगे याइगु खः। थ्व स्वया न्हापा युक्रेन लगातार दक्षिणपूर्वी क्षेत्रय् रुसयात कब्जा यायेत ताः मलागु खः ।

तर युक्रेनं सैन्य विमान कूतुकुगुयात कया विज्ञतय्सं रुसया हवाई शक्तिया लागि तधःगु धक्का लाःगु धका धयावया च्वंगु दु। रुसी विशेषज्ञ तय्सं ए–५० नांया रुसी जासूस सैन्य विमानया विनाश तधःगु खँ जुगु धका धाउगु दु।

जापानया हानेदा विमानस्थलय् बिमान दुर्घटना जूगु दु। बिमान दुर्घटना जूया अन दक्को उडान अबरुद्ध जूगु दु। उडान रद्द जुइवं समस्या जूया अन यात्रु तय्ग लागि सरकारं बुलेट ट्रेनया व्यवस्था याःगु दु।

हानेदा एयरपोर्टय् जापान एयरलाइन्सया छगः विमान अवतरण यायेगु झ्वलय् मेगु छगः तटरक्षक विमान (कोस्ट गार्ड) नापं ल्वायेवं मिँन्वंगु खः। उगु घटनाय् न्यागः मनू सीउगु दु।

मेपि ३७९ म्ह यात्रु व चालकया दुजःपि धासा सकुशल उद्धार याःगु दु। हानेदा एयरपोर्टय् करिब सच्छि मल्याक उडान स्थगित जुगु दु। उगु घटनां करिब १० हजार यात्रु प्रभावित जुगु दु।

इजरायलया ड्रोन आक्रमणय् हमासया छम्ह शीर्ष नेता मदुगु दु धका लेबनान व प्यालेस्टिनी सुरक्षा स्रोतं दाबी याःगु दु।

समाचार एजेन्सी रोयटर्सया कथं इजरायलया आक्रमणं हमासया छम्ह कमाण्डर सालेह अल–अरुरी मदुगु धका लेबनान व प्यालेस्टिनी सुरक्षा स्रोतं दाबी याःगु दु।

तर इजरायल धाःसा थुगु बुखँया पुष्टि याःगु मदुनि।

रुसय् हवाई हमला जुगुलि नीम्ह मनू सीउगु दु सा सच्छि मल्याक घाःपाः जूगु दु। उगु आक्रमण युक्रेनं याःगु द्धपः बिःगु दु।

रुसया दक्षिण–पश्चिम क्षेत्र सिमानाया शहर बेलगोरोडय् शनिवाः हवाई हमला जूगु खः। आक्रमणय् स्वम्ह मचा व नीम्ह सीउगु दु धका बीबीसीं धाःगु दु।

थ्व स्वया न्हयः शुक्रवाः युक्रेनय् आक्रमण याउगुलि ३९ म्हेसिगु ज्यान वंगु खः। उकियात लिसः बिइगु कथं युक्रेनं रुसय् आक्रमण याःगु धका धाःगु दु।

बीबीसीया कथं रुस–युक्रेन युद्धया झ्वलय् रुसय् जूगु थुगु मिसाइल आक्रमण दकलय् तधःगु खः धका धाःगु दु । युक्रेनं ड्रोन आक्रमण यायेवं बेलगोरोडय् तधःगु सः वःगु खः।