एलन मस्कं ट्विटरया जिम्मेवारी काये धुका माइक्रो ब्लगिङ प्लेटफर्मय् छगु लिपा मेगु ह्यूपाः वयाच्वंगु दु।

दकलय् न्हापां मस्कं ट्विटरया नां हिलां एक्स तःगु खः। आः थुगु प्लेटफर्मयात हलिमयन्यकं एक्सया नामं म्हसिइगु दु। मस्कं थःगु प्लेटफर्मय् मेगु न्हुगु सुविधा हःगु दु। थुगु सुविधापाखे आः कल तक यायेफइगु जूगु दु।

वास्तवय् एलोन मस्कं थःगु प्लेटफर्म एक्सय् अडियो व भिडियो कल सेवा यायेगु सुविधा न दुथ्याकूगु दु। एक्सया प्रयोगकर्तातय्स आः थःपासापिं दथुइ निः शुल्क अडियो व भिडियो कल याये फइगु जुगु दु।

प्रयोगकर्तातयेत एक्सपाखे अडियो वा भिडियो कल यायेत छु न नम्बर मालिइमखु ।थुकियात कया अप्पोसिया मस्कं ट्विटरय् कल सुबिधा तया मार्क जुकरबर्गया हवाटस अपलाइ चुनौती बिइत्यःगु धका सञ्चारमाध्यं धाय्गु न याना हःगु दु।

प्यालेस्टाइनया प्रधानमन्त्री मोहम्मद श्तायेहं राष्ट्रपति महमुद अब्बाससमक्ष थःगु सरकारपाखे राजीनामा लःल्हागु दु।

वयलकं फेब्रुअरी २०, २०२४ य् राष्ट्रपति मोहम्मद अब्बासय् सरकारया राजीनामा लःल्हागु खः। थुगु निर्णय गाजापट्टीइ प्यालेस्टिनी जनताविरुद्धया आक्रमणनापं सम्बन्धित राजनीतिक, सुरक्षा व आर्थिक घटनानाप स्वागू धका धाःगु दु।

श्तायेहया सरकार अप्रिल २०१९ य् राष्ट्रपतिया आदेशपाखे गठन याःगु खः। प्यालेस्टाइनी मेलमिलाप व चुनावया तयारीया जिम्मा बिःगु खः।

लोकह्वाम्ह गजल गायक पकंज उदास मन्त। ताःईनिसे बिरामी जुयाच्वम्ह उदास सोमवाः मदुगु धका वयकःया म्ह्याय् नायाब उदासं सामाजिक सञ्जालपाखे जानकारी बिःगु खः।

पंकज उदास ७३ दँय् मदुगु खः। नायाब च्वंगु दु, तसकं दुःखं छिकपिन्त धयाच्वनेमाःगु दु कि पद्मश्री पंकज उदास २६ फेब्रुअरी २०२४ य् मन्त। वयकः ताःईनिसे बिरामी जुयाच्वंगु खः।

इन्डियन एक्सप्रेसया कथं पंकज उदास सोमवाः सुथय् ११ बज ब्रिच क्यान्डी अस्पतालय् मदुगु धका धाःगु खः।

अमेरिकां क्यान्सर जाँच यायेगु स्क्रिनिङया लागि न्हुगु प्रविधिया परीक्षण शुरु याःगु दु। अमेरिकी नेशनल इन्स्टिच्युट अफ हेल्थ (एनआईएच) न क्यान्सर स्क्रिनिङया लागि उदीयमान प्रविधिया मूल्याङ्कन याइगु क्लिनिकल परीक्षण शुरु याःगु धका चिनियाँ समाचार संस्था सिन्ह्वां धाःगु दु।

क्यान्सर स्क्रिनिङ रिसर्च नेटवर्कं क्यान्सरया म्हसिका गुकथं यायगु धइगु अनुसन्धान याइ। उकियाना उपचार यायेगुलि याउसे च्वनिइ धका उल्लेख याःगु दु । बहु–क्यान्सर पत्ता लगे यायेगु परीक्षण थे जाःगु उदीयमान प्रविधिं क्यान्सरया जाँचय् ह्यूपा हयेफइगु व यक्को मनू तयेगु जीवन ताःहाकेगुलि ग्वाहालि भलसा एनआईएच न काःगु दु। एनसीआईया निर्देशक डब्ल्यू किम्रिन रथमेलं याउक  बहु–क्यान्सर पत्ता लगे यायेगु अध्ययनया कथं पाइलट अध्ययन शुरु यायेगु धका धाःगु दु।

निवाः न्ह्यः रुसी राष्ट्रपति भ्लादिमिर पुटिनं थःगु देशय् अनुसन्धानकर्ता डाक्टर क्यान्सरविरुद्धया वासः पत्ता लगे यायेगु तालाकेगुलि ग्वाहालि जुइ धका धाःगु दु। उगु सूचं न क्यान्सर जाँच व वासः आविष्कारय् आशा यायेगु खबरय् उल्लेख याःगु दु।

भारत झारखण्डया मुख्यमन्त्री हेमन्त सोरेनयात जग्गा घोटाला सम्बन्धी द्धपनय् प्रवर्तन निर्देशालय (ईडी) टोलीं ज्वंगु दु।

न्हिच्छियकं झारखण्डया राँचीइ वयकःया हे निवासय् बयान कया ईडीं मुख्यमन्त्री सोरेनयात ज्वंगु खः। ज्वने न्ह्यः हे औपचारिक घोषणा जुइ यायेगु ल्यः दनिइगु इलय् हे सोरेनं चान्ह्यः हे राज्यपाल थाय् वना मुख्यमन्त्री पदपाखे राजिनामा बिःगु दु धका बीबीसी हिन्दीं धाःगु दु।

ईडी सम्पत्ति शुद्धीकरण, विदेशी मुद्रा कानुनया उल्लङ्घन लगायत विषय छानबिन याइगु केन्द्रीय निकाय खः। ईडीं सोरेनयात राँचीया सेना याःगु मातहतय् दुगु प्यंगु एकड स्वया अप्पो जमिनय् नक्कली भ्वँत दयका अवैध न्यायेगु व मिइगु याःगु द्धपनय् ज्वंगु खः। उगु घटनाय् सोरेननाप न्यनेकने यायेगु ज्या जुइ धुकुगु दु।

जग्गा घोटाला सम्बन्धी मामिलाय् अनुसन्धान यायेगु ज्या न्ह्याये धुका ईडी न आतक झींप्यम्ह ज्वने धुकुगु दु। अभियुक्तंसरकारी अधिकारीनाप मिले जुया भूमाफियाया नामय् ठगी याना उगु जग्गा हस्तान्तरण याःगु अनुसन्धानपाखे खनेदुगु दु।