अस्ट्रेलियाय् कोरोनाया हुनिं छन्हूं हे ७६म्ह सीइधुंका ३ गू राज्यय् आपत्काल घोषणा याःगु दु ।

न्यू साउथ वेल्स, भिक्टोरिया व क्विन्सल्यान्डय् आपत्काल घोषणा याःगु खः । लिसें अष्ट्रेलियाया ओमिक्रोन संक्रमित राज्यया नितिं थप ५७ द्वः स्वास्थ्यकर्मी परिचालन जूगु दु ।

अष्ट्रेलियाया स्वास्थ्यमन्त्री ग्रेग हन्टं अष्ट्रेलियाय् न्हियान्हिथं ७३द्वः कोरोना संक्रमति जुइगु न्ह्यागुलिं  ५७द्वःम्ह  स्वास्थ्यकर्मी थप जूगु जानकारी बियादील ।

स्वास्थ्यकर्मीतयेसं वालय् विदा तकं काये मदइगु नियम लागु याःगु दु । म्हिगः  अष्ट्रेलियाय् कोरोनाया हुनिं छन्हूं हे ७६म्ह सीगु खः ।

थ्व कोरोनां छन्हंू हे थुलि तःधंगु ल्याःखय् मनूत सीगु थ्व न्हापांखुसिइ खः  ।

अफगानिस्तानय् ५गू फुति ३गू म्याग्नेच्युटया भ्वखाय् ब्वबलय् २६म्ह सीगु दु ।

पश्चिीमी प्रान्तया कादिस जिल्ला केन्द्र बिन्दु जुया वंगु भुखाचां छेँया पौ कुतुंवःबलय् उपिं सीगु खः । सीपिंलय् अप्वः धैथें मिसा व मस्त लाःगु दु ।

घटनाय् ४ म्ह घाःपाः जूगु दु । भुखाचाया हुनिं ७ सः सिवें आपा छेँ दुंगु दुसा सलंसः लिच्वःलय् लाःगु दु । तच्वकं वाः वःगु दथुइ भुखाचा वंगुलिं उद्धार ज्याय् थाकुगु दु ।

अफगानिस्ताय् भोकमरी समस्यां बिकराल रुप कयाच्वंबलय् भुखाचा वना अनया जनता थप लिच्वःलय् लाःगु दु ।

प्रशान्त महासागरया टापु देय् टोंगाया समुद्री तटय् जूगुु ज्वालामुखी विष्फोट लिपाया क्षति आंकलन यायेत व मानवीय ग्वहालिया नितिं न्युजिल्याण्डं छगः बिमान टोंगा छ्वगु दु ।

न्युजिल्याण्डया प्रधानमन्त्री जसिन्डा आर्डर्नं उगु क्षेत्रय् सुनामीया हुनिं तःगु क्षति याःगु धका स्थिति थुइकेत बिमान छ्वयागु जानकारी बियादील ।

टोंगाया जनताया जीवन रक्षाया नितिं बिश्व समुदायं थःथःगु क्षेत्रपाखें ग्वहालिया कुतः न्ह्याकुगु दु । ज्वालामुखी बिस्फोटया हुनिं प्रशान्त क्षेत्रया टापु खरानीं त्वपूगु दुसा अनया सञ्चार बिच्छेद जूगु लिसें मत आपुर्ती तकं बन्द जूबलय् म्होतिइ ८० द्वःम्ह मनू लिच्वःलय् लाःगु दु ।

उकिया लिच्वः अमेरिका व जापानय् नं लाइगु संभावना अप्वःगु धका उगु देयेतयेसं सतर्कता नालाकाःगु दु । अमेरिका व जापानं थःगु प्रशान्त तटीय क्षेत्रया मनूतयेत सुरक्षित थासय् वनेत अपील याःगु दु  ।

फ्रान्सय् कोरोनाबिरुद्धया खोप मकाःपिं मनूतय्त तःगु प्रतिबन्धबिरुद्ध ब्यापक प्रदर्शन जूगु दु ।

राजधानी पेरिसलिसेंया शहरय् मुंपिं द्वलंद्वः सर्वसाधारणं राष्ट्रपति इमानुएल म्याक्रोंयात कोरोना भाइरसया नां ब्युसें प्रदर्शन याःगु खः ।

आः जुइगु चुनावय् राष्ट्रपति पदया उम्मेदवार फ्लोरियन फिलिपपोटया नेतृत्वय् याःगु बिरोध प्रदर्शनय् राजनीतिक दलया कार्यकर्ता अले सर्वसाधारणया ब्वति दुगु खः ।

प्रदर्शनकारीतय्सं फ्रान्सय् ल्याय्म्हतय्त खोपया बारे जानकारी तकं मदुगु धासें खोप अनिवार्य याये गलत जूगु नं धाःगु दु । प्रदर्शनया हे झ्वलय् टेनिस स्टार नोभाक जोकोभिजयात अष्ट्रेलिया सरकारं खोप मकाःगु हे हुनिं भिसा मब्यूगुलिइ नं प्रदर्शनकारीं अष्ट्रेलियाली सरकारबिरुद्ध नं नारा थ्वयेकूगु खः ।

फ्रान्सया इतिहासय् एलो टिसर्ट धुंकाःया थ्व हे तःधंगु प्रदर्शन जूगु धाःगु दु । प्रदर्शनयात ध्यानय् तयाः सुरक्षा ब्यबस्था क्वात्तुकूगु दु । फ्रान्सय् कोरोनाबिरुद्धया खोप मकाःपिं तःधंगु ल्याखय् दनि ।

थ्वयां न्ह्यः, फ्रान्सया तःधंगु सदनं खोप अनिवार्य यायेगु बिधेयकयात मान्यता ब्यूगु खः ।

जापान व अमेरिकाय् सुनामी वयेफू धका चेतावनी बिउगु दु।

प्रशान्त महासागरय् ज्वालामुखी विस्फोट जुगुलि सुनामीया जोखिम बढे जुगु धका अनया मौसम विभागं चेतावनी बिउगु दु।

जापानया मौसम विभागं ३ मिटर उचाइ तक सुनामीयन लहर वयेफूगु सम्भावना दु धका धाउगु दु। अथेहे, अमेरिकाया क्यालिफोर्निया, ओरेगन, वाशिङ्टन, अलास्का लगायत क्षेत्रय् सुनामीया खतरा दु धका बीबीसीं धाउगु दु।

अथेहे, रुसं न सुनामीय चेतावनी जारी याउगु दु।