आजीवन कारागारया सजाय फयाच्वंम्ह अमेरिकी अर्बपति रोवर्ट डस्र्ट कारागार दुने हे मन्त ।

थः हे सहकर्मीयात स्याःगु द्वपनय् क्यालिफोर्नियाया छगू कारागारय् जन्मकैदया सजाय फयाच्वंम्ह डस्र्ट कारागारय् हे मदुगु खः । ७८दँया डस्र्टयात थगुने सेप्टेम्बरय् ज्वंगु खः ।

जहान वेपत्ता जूगु विषय मेपिन्त धयाबीगु ग्याःचिकुं वय्कलं थः सहकर्मीयात स्यानागु स्वीकार याःगु खः । वनापं वय्कःयात निम्ह जःलाखलायात स्याःगु द्वपं नं लाःगु खः ।

रियल स्टेट ब्यापारी डस्र्टया अमेरिकाया वल्र्ड टे«ड सेन्टरय् तकं लगानी दु ।

उत्तर कोरियां थौं सुथय् हाकनं मेगु मिसाइल परीक्षण याःगु दु । हाइपरसोनिक मिसाइल परीक्षण यानागु धाःगु छवाः हे मब्यूनिबलय् उत्तर कोरियां मेगु मिसाइल परीक्षण याःगु दक्षिण कोरिया व जापानं धाःगु दु ।

स्थानीय ई कथं थौं सुथय् ७ताः ई जुयाः २७ मिनेट वंबलय् जमिनं पूर्वी समुद्रपाखे मिसाइल परीक्षण याःगु व उगु परीक्षण ब्यालेस्टिक मिसाइल जुइफुगु दक्षिण कोरियाया सैन्य प्रमुख ज्याकुथिं धाःगु दु ।

अथे हे, जापानी कोस्ट गार्डं नं ब्यालेस्टिक मिसाइल थें खनेदुगु परीक्षण उत्तर कोरियां याःगु धाःगु दु । उगु मिसाइल जापानया एक्सक्लुसिभ इकोनोमिक जोन दुने कुतुंवंगु नं क्योदो न्युज एजेञ्सीं धाःगु दु ।

जापानी प्रधानमन्त्री फुमिओ किसिदां उत्तर कोरियां मदिक्क मिसाइल परीक्षण याःगु चिन्ताया विषय जूगु धयादीगु दु । अमेरिका, जापानलिसें ६ राष्ट्रं वंगु वालय् कोरियाली प्रायद्विपयात अस्थिर दयेकेगु ज्याखँ मयायेत इनाप यासें मंकाः विज्ञप्ति पिथनेधुंकाः थ्व न्हापांगु परीक्षण खः ।

राष्ट्रसंघया लागि अमेरिकी राजदूत लिण्डा थोमस ग्रिनफिल्डं उत्तर कोरियाया ज्याखं क्षेत्रीय सुरक्षायात अस्थिर दयेकूगु प्रतिक्रिया ब्यूगु दु ।

उत्तर कोरियाली नेता किम जोङ उनं धाःसा अन्तर्राष्ट्रिय समुदायया चिन्तायात बेवास्ता यासें थः देय्या प्रतिरक्षा प्रणालीयात बल्लाकेत व अत्याधुनिक दयेकेत प्रतिवद्ध दुगु धयावःगु दु ।

भारतय् छन्हुया दुने छगु लाख ८० हजार कोरोना संक्रमित जुगु दु।

भारतया केन्द्रीय स्वास्थ्य मन्त्रालयया कथं सोमबाः कोभिड–१९ या छगु लाख ७९ हजार ७२३ न्हुपि संक्रमित जूपि थपे जुगु दु। लिपागु २४ घण्टाय् १४६ म्ह कोरोना संक्रमणं सीउगु दु धका मन्त्रालय धाउगु दु।

अथेहे, न्हिन्हि संक्रमण दर (पोजिटिभिटी रेट) १३.२९ प्रतिशत थहावंगु दु धका भारतीय समाचार माध्यमं धाउगु दु। भारतमा कोभिड–१९ नाप ओमिक्रोन भेरियन्टया संक्रमितपि न बढे जूगु दु।

आःतक ४ हजार ३३ म्हेसित थुगु भेरियन्टया संक्रमण पुष्टि जुइ धकुुगु दु।

अमेरिकाया न्युयोर्कय् छखा भवन च्याःबलय् ९ मस्तलिसें १९ सीगु दु ।

घटनाय् ६३ घाःपाः जूगु दु । ३२म्हेसित अस्पताल भर्ना याःगुलिइ छुंया अवस्था तच्वः दुगुलिं सीपिनि ल्याः अप्वयेफुगु अनुमान याःगु दु ।

न्युयोर्कया मेयर एरिक एडम्सया कथं १९तजाःया भवनया नितँ व स्वतं पिहांवःगु मि दक्वं तलाय् त्यंगु खः । २सः स्वयां अप्वः अग्नी नियन्त्रकया ग्वहालिइ मि नियन्त्रणय् काःगु खः ।

मि गुकथं च्यात धइगु सीमदुनिसां इलेक्ट्रिकल हिटरया हुनिं मि च्याःगु जुइफुगु अनुमान याःगु दु । मिं नःगु नितँजाःया लुखा चालाच्वंगु हुनिं मि दक्वथसां न्यंगुलिं अप्वः मानविय क्षति जूगु धाःगु दु ।

काजकस्तानय् इन्धनया भाः थहांवंगु विरुद्ध जूगु प्रदर्शनया झ्वलय् आःतक्क सच्छि व ६४ सीगु अनया सञ्चार माध्यमं दाबी याःगु दु ।

प्रदर्शनया हे झ्वलय् खुद्वः स्वयां अप्वःयात नियन्त्रणय् काःगु दु । काजकस्तानया मुख्य सहर अल्माटीइ सरकार विरोधी प्रदर्शनय् दर्जनौँ नागरिक सीधुंकूगु जुइफुगु संचार माध्यमतय् आशंका दु ।

रुसी सेना तैनाथ जुइधुंकाः आन्दोलनकारीं प्रदर्शनयात हिंसात्मक दयेकायंकूगु दुसा १२ सुरक्षाकःमि नं सीगु दु । राष्ट्रपति कासिम–जोमार्ट टोकायभं रुसयाके ग्वहालि फ्वनेधुंकाः अन वःगु रुसी सेनां रबरका गोली व अश्रुग्यास कयेकेगु यानाच्वंगु दु ।

प्रदर्शनकारीं नं भौतिक संरचना च्याकाबीगुलिसें सलंसः सवारी ज्वलं तोडफोड याःगु दु । देय्न्यंक कफर््यु न्ह्यानाच्वंगु हे इलय् जूगु प्रदर्शनय् अझं तःम्हेसिया ज्यान वनेफुगु अनुमान याःगु दु ।

सरकारं इन्धनलिसें ग्यासया भाः नियन्त्रण सम्बन्धी प्रावधान चीकेधुंकाः आन्दोलन न्ह्याःगु खः । तर, आन्दोलनय् राजनीतिक मुद्दात नं स्वानावःगु दु ।

लिपांगु इलय् आन्दोलनकारीं रुसी फौज लिहांवनेमाःगु व राष्ट्रपतिया राजीनामा माग याःगु दु ।