प्रधानमन्त्री शेरबहादुर देउवाया प्रेस प्रमुखय् गोविन्द परियार नियुक्त याउगु दु।

प्रधानमन्त्री ताः ईनिस निजी सचिवालय तक मदयकूगु आः देउवा थःगु टीम दयकेगु सुरु याउगु दु। प्रधानमन्त्री देउवां पत्रकार परियारयात प्रेस प्रमुख नियुक्त याउगु खः।

वःगु बुधबाःनिसें वःगु मौसमय् ह्यूपाः कथं थौं नं देय्या यक्व धइथें थासय् वा वइगु व च्वापु गाईगु मौसम पूर्वानुमान धाःगु दु ।

उच्च पहाडी व हिमाली लागाय् च्वापु गाःगु मौसम पूर्वानुमान महाशाखां धागु दु । वंगु बुधवाःनिसें पश्चिम नेपालं सक्रिय जूगु पश्चिमी न्यून चापीय वायु प्रणालीया हुनिं देय्न्यंकं मौसमय् बदली जूगु दु ।

गुलिख्य थासय् नं न्यानाः वा वःगु दु । स्वनिगलय् म्हिगः सनिलय्निसें मध्यम कथंया वा वयाच्वंगु दु । वा वःगुनाप स्वनिगः जःखःया शिवपुरी, फूल्चोकी, चन्द्रागिरिनापया गुँइ च्वापु गायाः त्वइसेच्वं ।

वंगु पुस १४ व माघ ६ गते न थुपिं गुँइ च्वापु गाःगु खः । देय्या छुं छुं थासय् प्वँनाप वा वःगु दु । थौं न्हिनय् न देय्न्यंकं सामान्यनिसें पूर्ण बदली जुयाः यक्व धइथें थासय् नं न्यानाः मलः त्वइगु अले प्वँनाप वा वइगु महाशाखां प्रक्षेपण याःगु दु ।

गण्डकी व लुम्बिनी प्रदेशया छथाय् निथाय् तसिक्कं वा वइगु धागु दु । प्रदेश १, मधेश प्रदेश व वाग्मती प्रदेशय् न नं न्यानाः वा वइगु, मलः त्वइगु अले प्वँ गाइगु सम्भावना दु ।

उखय्, सुदूरपश्चिम, कर्णाली व लुम्बिनी प्रदेशया छथाय् निथाय् हल्का वा वइगु सम्भावना दु । मौसम बदली जुयाः वा वइगु झ्वः शनिवाः तक जुइगु महाशाखां धागु दु ।

आइतवाः न आंशिक बदली जूसां न्हिनय्निसें मौसम भिनावइगु मौसम पूर्वानुमान महाशाखां प्रक्षेपण याःगु दु ।

किपू नगरपालिका वडा नं. १० य् नेवाः वसः सुयेगु स्वलायंकं जूगु तालिम समापन जूगु दु ।

ज्याझ्वलय् न्ववानादिसें मूपाहाँ किपू नगरपालिकाया मेयर रमेश महर्जनं थुगु नेवाः वसः सुयेगु सयेकेगु तालिमया समापन जूगु खःसां धात्थेंया ज्या यायेगु शुरु जूगु धका धयदीगु दु। स्वला जक सयेकाः पूवनी मखुगु धयादिसें मेयर महर्जनं बांलाक सयेकेत अझं निपाः प्यपाः लं सुयेबलय् स्यनेफुगु व अथे स्यन धकाः नुगः मछिंके मज्यूगु धयादिसें मिहिनेत याना वं वं वनकि अथें हे बांलाक सयेके फइगु धका धयादीगु दु। झीगु पहिचान, झीगु म्हसीका नं ल्यंनीगु व आम्दानी नं जुइगु जूगुलिं थुकीयात निरन्तरता बिया ज्या यानादीत सकल ब्वतिकयादीपिंत इनाप यानादिगु खः।

उप मेयर सरस्वती खड्कां विशेषयानां परिवारय् मिसापिं उद्यमशील जुल धाःसा परिवार बांलाइगु धयादिसें सकल नगरबासीयात ल्हाःतय् सीप तयाबीगु नगरपालिकाया दायित्व हे नं जूगुलिं नगरपालिकां थुगु ज्या मद्दिक्क याना च्वनागु न्ह्यथनादिल । वयकलं नेपाल सरकारं सन् २०३० तकया दुने दिगो विकासया लक्ष्य पूवकेगु धकाः अन्तर्राष्ट्रिय प्रतिवद्धता यानातःगु खँय् वाःचायेका सकलसित उगु नेपाल सरकारया प्रतिवद्धतायात थःथःगु थासं ग्वहालि यायेमाःगु खँय् बः बियादिगु खः।

वडा १० या अध्यक्ष अमन महर्जनया सभापतित्वय् जूगु ज्याझ्वलय् वडा ६ या अध्यक्ष न्हुच्छेबहादुर महर्जन वडा नं. १ या अध्यक्ष हर्ष महर्जन, वडा २ या अध्यक्ष रमेशमान डंगोल, वडा ३ या अध्यक्ष राजेन्द्र महर्जन, वडा ४ या अध्यक्ष राजेन्द्र बानियाँ, वडा ९ या अध्यक्ष गंगाराम महर्जनपिंसं दसि पौ लःल्हानादीगु खः । 

एमाले निकट विद्यार्थी संगठन अनेरास्ववियु न पेट्रोलियम पदार्थय् भाः थकाउगु लितकायेमाः धका धासे प्रधानमन्त्रीया पुतला च्याकूगु दु।

त्रिचन्द्र क्याम्पस न्ह्यने अनेरास्ववियु न प्रधानमन्त्री शेरबहादुर देउवाया पुतला च्याकूगु खः।

स्वनिगलय् थप १ हजार ५०९ म्हेसित कोरोना संक्रमण पुष्टि जूगु दु।

स्वास्थ्य मन्त्रालयया कथं येँ थप १,२४९ म्हेसित कोरोना सक्रमण पुष्टि जुगु दु। अथेहे, यलय् १८३ म्ह व ख्वपय् ७७ म्हेसित कोरोना संक्रमण पुष्टि जुगु दु।

अथेहे मेमेगु जिल्लाय् स्वास्थ्य मन्त्रालयया कथं दकलय् अप्पो कास्की १९६, मोरङय् ८५, झापाय् ७६, रुपन्देहीइ ६७, काभ्रेपलाञ्चोकय् ५१, चितवनय् ५८ व बाँकेय् ५० म्हेसित कोरोना संक्रमण पुष्टि जूगु दु।

अथेतु, तनहुँइ ४०, स्याङ्जाय् ३४, दाङय् २९, मकवानपुरय् २६, कञ्चनपुरय् २४, बागलुङय् २२ व बर्दियाय् २० म्ह कोरोना संक्रमितपि थपे जुगु दु धका मन्त्रालयं धाउगु दु।