वंगु २४ घण्टाया दुने कोरोना भाइरस (कोभिड–१९) या संक्रमणं थप ११ म्हेसिगु ज्यान वंगु दु।

अथेहे थौ देयन्यक १ हजार ३८६ म्हेसित संक्रमण पुष्टि जुगु दु। स्वास्थ्य तथा जनसंख्या मन्त्रालयया कथं देयन्यक ९ हजार २५१ म्हेसिगु नमुना परीक्षण याउगु खः।

६ हजार ४४३ म्हेसिगु पीसीआर परीक्षण याउगुलि १ हजार १८३ म्ह व २ हजार ८०८ म्हेसिगु एन्टीजेन परीक्षण याउगुलि २०३ याना १ हजार ३८६ म्हेसित कोरोना संक्रमण पुष्टि जुगु दु।

वंगु २४ घण्टाय् ८ हजार ७०४ म्ह संक्रमणमुक्त जुगु दु।

येँ महानगरपालिकां थ्व हे वइगु माघ २४ निसे फागुन ५ गते तक कोरोनाविरुद्ध फाइजर खोपया निगुगु मात्रा या ज्याझ्वः सञ्चालन याइगु जुगु दु।

जिल्ला खोप समन्वय समिति येँ माघ २० गतेया निर्णय कथं कामपां फाइजरया निगुगु मात्रा खोप बिइगु सूचं सार्वजनिक याउगु खः।

कामपा स्वास्थ्य विभाग प्रमुख बलराम त्रिपाठीं जारी याउगु सूचं कथं तोके याउगु शनिबाः बाहेक मेगु दिं सुथय् १० बजेनिसे ४ः०० बजे तक खोप ज्याझ्वः सञ्चालन जुइ। थुगु खोप बिइगु निति कामपा ३२ गु हे वडाय् खोप समन्वय समितिया निर्णय कथं विद्यालयय् खोप केन्द्र तोके याना ज्याझ्वः सञ्चालन याइ।

सूचं कथं खोप कायेत लक्षित समूहय् १२ निसे १७ दँ दुपिन्त न्हापागु खोप काउगु २१ दिं दुपिन्त उगु खोप बिइत्यंगु खः।

थौं विद्याया द्यः कथं कयातम्ह ससू द्यःया पूजा यायेगु दिं श्रीपञ्चमी कथं हनिइगु याः।

थौं वसन्त पञ्चमी कथं कयातःगु दिं ससूद्यःया पुजा यायेगु चलन दु। थौं यलया लेलेय् सरस्वती कुण्ड, थिमीया सरस्वतीख्यः, विशालनगरया नील सरस्वती, आर्यघाटया सरस्वती द्यः, मैतिदेवी, स्वयंभूया सरस्वती द्यःया थाय् पुजा यायेगु याः।

थौं हनुमानध्वाकाया नासलचुकय् राष्ट्रपतिपाखे वसन्त श्रवण याइगु ज्याझ्वः जुइगु दु। थौंया दिं विद्या, बुद्धि, कला व संगीतनाप स्वाउगु नखःया कथं कायेगु याः ।

ससूद्यःयात पूजा यायेगु याइ। ससूद्यःयात थौं पूजा याना मस्तयसं आखः च्वयेगु सुरु यायेगु व मचापिन्स न्ह्यापं प्वाखन्हिगु  न यायेगु याः। संगीत प्रशिक्षणया थौंया दिं निसे सु यायेगु बालाइगु विश्वास याः।

पेट्रोलियम पदार्थया भाः थकाउगु व एमसीसीया विरोधय् नेकपा एकीकृत समाजवादी निकट विद्यार्थी संगठन अनेरास्ववियू न मशाल जुलुस पिकाउगु दु।

अनेरास्ववियु न येँया शंकरदेव क्याम्पसं मशाल जुलुस पिकाउगु दु। उगु मशाल जुलुस पिकाउगुलि प्रहरीं हस्तक्षेप याना मशाल स्यानाबिउगु खः।

प्रर्दशन याउगुलि विद्यार्थीपिन्स पेट्रोलियम पदार्थया भाः थकाउगु खारेज याः, महङ्गी नियन्त्रण याः, एमसीसी खारेज याः धका नारा लगे याउगु दु। प्रदर्शन लिपा कोणसभा यासे अनेरास्ववियुया अध्यक्ष सुदेश पराजुलीं जनतायात कर थपे याना सरकारं पेट्रोलियम पदार्थया भाः थकाउगु द्धपः बिउगु खः।

अथेहे एमसीसी देशया हित विपरित जुगुलि थुकियात पारित याये मज्यू धका धाउगु खः। पेट्रोलियम पदार्थ भाः थकाउगु व एमसीसीया विरोधय् नेकपा एकीकृत समाजवादी निकट विद्यार्थी संगठन अनेरास्ववियू न मशाल जुलुस पिकाउगु खः।

स्वनिगलय् थप ४६३ म्हेसित कोरोना संक्रमण पुष्टि जूगु दु।

स्वास्थ्य मन्त्रालयया कथं येँ ३१६ म्हेसित कोरोना सक्रमित पुष्टि जूगु दु। अथेहे, यलय् १०४ म्ह व ख्वपय् ४३ म्हेसित कोरोना संक्रमित पुष्टि जुगु दु।

अथेहे मेमेगु जिल्लाय् स्वास्थ्य मन्त्रालयया कथं कास्कीइ ६५, मोरङय् ६१, काभ्रेपलाञ्चोकय् ४७, नुवाकोटय् ४४, सुनसरीइ २८ नाप चितवन व कैलालीइ २६÷२६ म्हेसित कोरोना संक्रमण पुष्टि जुगु दु।

मकवानपुर, पाल्पा व रुपन्देहीइ २०÷२० म्ह, दाङ १८, झापा, दादिङ व कञ्चनपुरय् १४, तनहुँइ १३, स्याङजाय् १२ नाप धनकुटा, धनुषा व गोरखाय् १०÷१० म्हेसित कोरोना संक्रमित थपे  जुगु दु धका मन्त्रालयं धाउगु दु।