श्रद्धालु दाता उपासक पञ्चवीरसिंह तुलाधरपाखें बुद्ध–जन्मभूमि नेपाः देया थेरवाद बुद्धशासनय् प्रव्रजित भिक्षु, श्रामणेर व अनागारिकापिनिगु भिंउसाँयया तातुनाः बुद्धशासनप्रति थःगु नुगः तःफाःयासे ग्यसुलाःगु प्रव्रजित स्वास्थ्य अक्षय कोष निस्वनाः आवधिक व्याज रकमजक छ्यलाबुला यासे उगु अक्षय कोषयात परन्तुतक न्ह्याकातुं तयेका लागी रु. १,११,११,१११।–(एककरोड एघारलाख एघारहजार एकसय एघार) तका दां अखिल नेपाल भिक्षुमहासंघयात छगू ज्याझ्वः दथुइ सश्रद्धापूर्वक दोहलप्यूगु जुल।

महासंघया उपाध्यक्ष भिक्षु धर्ममूर्ति महास्थविरया लसकुस न्वचु तयादीगु खःसा नेपाःया संघनायक भिक्षु बोधिसेन महास्थविर, संघउपनायक भिक्षु गुणघोष महास्थविर, अखिल नेपाल भिक्षु महासंघया नायो भिक्षु मैत्री महास्थविरसहित पदाधिकारीपिं व अनागारिका पञ्ञावती, अनागारिका डा. धम्मविजया, अनागारिका दानवतीया उपस्थितिस संघनायक महास्थविरयात दाता उपासकं श्रद्धादान लःल्हाःगु खः।

श्रद्धादान दातायात श्रद्धेय संघनायक भन्तेनं भिक्षुमहासंघपाखें बिशेष साधुवाद–पत्र लःल्हाना बिज्याःगु खः। भिक्षुमहासंघया कोषाध्यक्ष भिक्षु बोधिज्ञान महास्थविरं साधुवाद–पत्र वाचन यानाबिज्याःगु  खः। दाता उपासक पञ्चवीर सिंह तुलाधरं थेरवादी भन्ते गुरुमांपिनि स्वास्थ्योपचारया लागी भिक्षु महासंघ न्ह्यज्यानाः मूलधन सुरक्षित यासे अक्षय कोषमार्फत् निरन्तर ग्वहालि इनेज्या जुयातुं वनी लिसें अक्षय कोष नं वृद्धि जुयावं वनी धयागु विश्वास प्वंकादिल । श्रद्धादानया दाताया सदीच्छाकथं थेरवाद बुद्धशासनय् समर्पित भिक्षु, श्रामणेर तथा अनागारिकापिनि लागि निर्देशिकासहित भिक्षु महासंघपाखें पारदर्शीरुपं अक्षय कोषया आवधिक व्याज रकम सदुपयोग यायेगु जुइ धकाः महासचिव भिक्षु कोण्डन्यं प्रतिवद्धता प्वंकाबिज्यात।

नेपाल परम्परागत बुद्धधर्म संघया अध्यक्ष प्रा. डा. नरेशमान वज्राचार्यं लसता नुगःखं प्वंकुुसे संघपाखें नं १ लाख ग्वहालि घोषणा यानाबिज्याःगु खःसा ज्याझ्वलय् स्वयम्भूवीरसिंह व हितलक्ष्मी कंसाकारपाखें ४ लाख, युवा बौद्ध समूह, येँपाखें १ लाख, पूर्ण–मथुरा स्मृति कोषपाखें १ लाख ११ हजार १ सय ११, न्हुच्छेमाया तुलाधरपाखें १ लाख ५ हजार, सानुबाबु सायमि व भगवान् देवी मानन्धरपाखें १ लाख, बलराम व उमा चित्रकारपाखें १ लाख, दि. अमृतसागर व दि. केशलक्ष्मी तुलाधरया नामं १ लाख, दि. नीरशोभा चित्रकारया नामं ५० हजार, मोहनदेवी चित्रकारपाखें ५० हजार, शान्तलक्ष्मी वज्राचार्यपाखें ५० हजार श्रद्धादान घोषणा याःगु दु। नेपाःया संघनायक भिक्षु बोधिसेन महास्थविरं श्रद्धादान दातासहित सकलसितं आयुआरोग्यकामना याना बिज्यायेधुंका भिक्षुसंघपाखें बुद्धवचन परित्राण पाठ यानाबिज्याःगु खः।

भिक्षु महासंघया अध्यक्ष भिक्षु मैत्री महास्थविरं श्रद्धादानयात च्वछासें सकलसितं साधुवाद ज्ञापनंल्यू पुण्यानुमोदनां ज्याझ्वः क्वचाःगु खः। ज्याझ्वलय् नेपाल वायु सेवा निगमया पूर्व महाप्रबन्धक सुगतरत्न कंसाकार, धर्मोदय सभाया महासचिव सागरमान वज्राचार्य, युवा बौद्ध समूहया अध्यक्ष मदन बहादुर तुलाधर, उपाध्यक्ष राजु शाक्य, पूर्व अध्यक्ष डा. त्रिरत्न मानन्धर, आनन्द भुवन विहारया उपाध्यक्ष विद्यासागर तुलाधरलगायतया सहभागिता जूगु खः।

६६ क्वःगु नेपाल प्रहरी दिवसया समुदाय प्रहरी साझेदारी अन्तर्गत नेपाल खड्गी सेवा समिति ( खड्गी समाज ) व नेपाल प्रहरीया मंकाः ग्वसालय् छगु हिंदान ज्याझ्वः जुगु दु।

उगु ज्याझ्वलय् मूपाहाँ कथं येँ काठमाडौं महानगर मेयर बिद्यासुन्दर शाक्य झायादीगु खः।

प्रहरी नायब महानिरिक्षक उत्तम सुबेदी, समितिया संरक्षक मनोज नेवाः खड्गी, सिन्हः स्वां खलः, लायन्स क्लब अफ काठमाडौं ब्लड सर्कल, नेपाल स्काउट (सिद्धि गणेश, युनिक, नोदन व प्रतिबिम्ब क्रूज), सिविन लगायतया संघ संस्थापिनिगु न सहभागी दुगु खः।

नेकपा (माओवादी केन्द्र) न पार्टी निकट विद्यार्थी संगठन अनेरास्ववियू (क्रान्तिकारी) या अध्यक्ष ल्ययेगु जिम्मेवारी अध्यक्ष पुष्पकमल दाहालयात बिउगु खः।

पार्टी केन्द्रीय कार्यालय पेरिसडाँडाय् शनिबाः च्वंगु स्थायी कमिटी बैठकं अनेरास्ववियू (क्रान्तिकारी) या अध्यक्ष ल्ययेगु जिम्मेवारी अध्यक्ष दाहालयात बिइगु निर्णय जुगु दु धका प्रवक्ता कृष्णबहादुर महरां जानकारी बिउगु दु।

अख्तियार दुरुपयोग अनुसन्धान आयोगं प्रदेश २ या मुख्यमन्त्री कार्यालय छापा मारे याउगु विरोधय् जनता समाजवादी पार्टी (जसपा) नेपालं प्रदेशया च्याःगु जिल्लाय् विरोध प्रदर्शन याउगु दु।

शनिबाः जिल्ला सदरमुकामय् जसपाया नेता नाप कार्यकर्तापिन्स अख्तियारं छापामारीविरुद्ध मसाल जुलुस पिकागु खः। प्रदेश राजधानी जनकपुरय् निर्धारित ई स्वया निघौ लिपा कार्यक्रम सुरु याउगु खः।

जुलुसय् सहभागी नेता व कार्यकर्तापिन्स ‘सुयागु इसाराय् छापा मारे याये दइ मखस, संघीयताय् प्रहार यो दइ मखु, अख्तियार प्रमुख होसियार, देशद्रोही अख्तियार मुर्दावाद, अख्तियार प्रमुख राजीनामा बिउ’ लगायत नारा थ्वयकूगु खः।

थौं देयन्यक थप ८६७ म्हेसित कोरोना संक्रमण पुष्टि जूगु दु।

शनिबाः देयन्यक ५ हजार ५९८ म्हेसिगु पीसीआर परीक्षण याउगुलि ६५९ म्ह व २ हजार ३२१ म्हेसिगु एन्टिजेन परीक्षणय् २०८ म्ह याना ८६७ म्हेसित कोरोना संक्रमण पुष्टि जुगु दु धका स्वास्थ्य मन्त्रालयं धाउगु दु।

थ्व नाप आःतक नेपालय् कोरोना संक्रमित जूपि ८ लाख ८८ हजार ५४७ म्ह थ्यंगु दु। अथेहे कोरोनाया कारण थप गुम्ह सीउगु दु। आःतक नेपालय् ११ हजार १ सय ५७ म्ह कोरोनाया कारण सी धुकुगु दु।

अथेहे १ हजार १२३  म्ह संक्रमित कोरोनामुक्त जुगु दु। थ्व नाप आःतक नेपालय् ७ लाख ६७ हजार ८१९ म्ह कोरोना संक्रमणमुक्त जुइ धुकुगु दु।

आःतक नेपालय् १७ हजार ६४२ म्ह सक्रिय संक्रमितपि दु।