सरकारं सहसचिव प्रा. गोपालप्रसाद सिग्देलयात सचिवय् बढुवा याउगु दु।

मन्त्रिपरिषदया बिहीबाः च्वंगु बैठकं प्रा. सिग्देलयात बढुवा यायेगु निर्णय जुगु धका कानून, न्याय तथा संसदीय मामिलामन्त्री ज्ञानेन्द्रबहादुर कार्की न जानकारी बिउगु दु।

उगु बैठकं थीथी मन्त्रालय मातहतया विकास आयोजनाया लागि अस्थायी दरबन्दी स्वीकृत याउगु दु।

राष्ट्रपति विद्यादेवी भण्डारी समक्ष इजिप्ट, जर्मनी, नर्वे व फ्रान्सया राजदूतपिन्स थःथःगु ओहोदाया प्रमाणपत्र पेस याउगु दु।

राष्ट्रपति भवनय् थौं बिहीवाः ग्वसाः ग्वंगु विशेष समारोहय् नेपालया लागि इजिप्ट, जर्मनी, नर्वे व फ्रान्सया राजदूतपि नोहा हम्दी अहमद एलगेब्ली, टोमास हाइनरिस प्रिन्च, तोरुन ड्रामदाल व जिल बुरबाओले थःथःगु ओहोदाया प्रमाणपत्र पेस याउगु दु।

उगु ज्याझ्वलय् परराष्ट्रमन्त्री डा. नारायण खड्का, प्रधानसेनापति प्रभुराम शर्मा, परराष्ट्र सचिव भरतराज पौड्याल नाप राष्ट्रपति कार्यालय व परराष्ट्र मन्त्रालयया उच्च अधिकारीपिनिगु उपस्थिति दुगु खः।

नेपाल टेलिकमं कन्ह्यनिसे शुक्रवाः निसे २५ गते तक ६० दँ निसे ज्येष्ठ नागरिकपिन्त निःशुल्क सिम कार्ड बिइगु जुगु दु।

संयुक्त राष्ट्र सङ्घं ग्वसाः ग्वंगु विश्वव्यापी रूपं अक्टोबर १ य् हनेगु कथं अन्तर्राष्ट्रिय ज्येष्ठ नागरिक दिवसया लसताय् नेपाल टेलिकमं देयन्यक च्वपि ज्येष्ठ नागरिकपिन्त सम्मान कथं निःशुल्क सिम प्रदान यायेत्यंगु खः।

सिम असोज १५ गते निसे २५ गते तक ६० दँ स्वया च्वय् च्वपिन्त निःशुल्क रूपं प्रदान यायेत्यंगु खः।उगु सिमय् १० रुपैयाँ ब्यालेन्स दइगु नाप ४० मिनेट खँल्हाय दइ, २० गु सन्देश छ्वय फइ व ६० एमबी डाटा प्रयोग यायेगु सुविधा लच्छितक उपलब्ध दइ।

निःशुल्क सिम कार्डया लागि छगु प्रति पासपोर्ट साइजया फोटो, परिचय व दँ खुले जुगु प्रमाणपत्र (नागरिकता प्रमाणपत्र, जेष्ठ नागरिकया परिचयपत्र) या प्रतिलिपि संलग्न यायेमाः।

लुँया भाः छु दिं न्ह्यनिसे लगातार घटे जुया वयाच्वंगु दु।

थौं लुँ तोलां २ सय रुपैयाँ घटे जुगु दु। म्हिगः तोलां ८८ हजार ९ सय रुपैयाँ जुगु खःसा थौं लुँ तोलाया ८८ हजार ७ सय रुपैयाँय् कुहावंगु दु।

अथेहे, वहः न घटे जुगु दु। वहः तोलां थौं ३५ रुपैयाँ घटे जुया तोलाया ११ सय २० रुपैयाँ न किनबेच जुगु दु।

स्वन्हु लगातार घटे जुया म्हिगः बुधबाः ५० अंक थहावंगु शेयर बजाः थौं बिहीबाः हाकन कुहावंगु दु।

शेयर कारोबार मापक नेप्से परिसूचक ३२ दशमलव ५१ अंकं घटे जुया २ हजार ६ सय ३३ दशमलव ४२ अंकय् कुहावंगु दु।

अथेहे ‘क’ वर्गया कारोबार मापन याइगु सेन्सेटिभ इन्डेक्स न ६ दशमलव ४१ अंकं कुहावंगु दु। थौं नेप्से परिसूचक नाप शेयर कारोबार रकम न कुहावंगु दु।

छन्हु हे २२ अर्ब रुपैयाँ तक कारोबार जुगु नेपाली शेयर बजाः थौं बिहीबाः ३ अर्ब ७० करोड रुपैयाँ जक शेयर कारोबार जूगु दु। शेयर बिक्रीया चाप खने मदुसा शेयर कारोबार रकम धासा घटे जुगु दु।

थौं बिहीबाः जम्मा ४९ हजार ८ सय ३५ गु जक कारोबार जुगु दु। २५ कम्पनीया ७३ लाख २१ हजार १४ कित्ता जक शेयर किनबेच जुगु दु।